ဇန်နဝါရီ(၁၃)ရက်တွင်ယှဉ်ပြိုင်ကစားရမည့် အက်စတွန်ဗီလာနှင့် စပါးအသင်းတို့၏ ပရီးမီးယားလိဂ်ပွဲစဉ်ကို အက်စတွန်ဗီလာအသင်း၏ ကိုရိုနာဗိုင်းရပ်စ်ပြဿနာကြောင့် ရွှေ့ဆိုင်းလိုက်ပြီး ယနေ့မှာပင် စပါး – ဖူလ်ဟမ်ပွဲစဉ်ကို အစားထိုးယှဉ်ပြိုင်ရန် စီစဉ်ခဲ့ကြောင်း သိရသည်။
အက်စတွန်ဗီလာအသင်းသည် ပြီးခဲ့သည့် FA ဖလားပြိုင်ပွဲမတိုင်မီကတည်းက ဗိုင်းရပ်စ်ပြဿနာနှင့် ရင်ဆိုင်ခဲ့ရခြင်းဖြစ်ပြီး နည်းပြ ဒင်းန်စမစ်အပါအဝင် ပထမအသင်းမှ က စားသမားများ သီးခြားနေထိုင်မှု ပြုလုပ်နေရသလို၊ လေ့ကျင့်ရေးကွင်းကိုလည်း ပိတ်သိမ်းထားရသည်။
ယင်းအခြေအနေမှာပင် လီဗာပူးလ်အသင်းနှင့် FA ဖလားပွဲကို ယူ-၂၃ အသင်း နှင့် ယူ-၁၈ အသင်းမှ ကစားသမားများဖြင့် ယှဉ်ပြိုင်ကစားခဲ့သော်လည်း ယခုပရီးမီးယားလိဂ်ပွဲကိုမူ ရွှေ့ဆိုင်းပေးရန် တောင်းဆိုခဲ့ခြင်းဖြစ်ကြောင်း သိရသည်။
ယင်းတောင်းဆိုမှုကို ပရီးမီးယားလိဂ်အဖွဲ့ချုပ်က လက်ခံပေးခဲ့ပြီး ရွှေ့ဆိုင်းခဲ့ရသည့်ပွဲကို အမြန်ဆုံးပြန်လည်ယှဉ်ပြိုင်နိုင်လိမ့်မည်ဟု မျှော်လင့်ကြောင်းလည်း ကြေညာချက်တွင် ဖော်ပြခဲ့သည်။
ပရီးမီးယားလိဂ်အဖွဲ့ချုပ်သည် အက်စတွန်ဗီလာ – စပါး ပွဲကို ရွှေ့ဆိုင်းပေးခဲ့သည့်အပြင် ပွဲစဉ်အချို့ကိုလည်း အပြောင်းအလဲများ ပြုလုပ်ခဲ့သည်။
ပြီးခဲ့သည့် ဒီဇင်ဘာလ (၃၀) ရက်နေ့က ရွှေ့ဆိုင်းခဲ့ရသော စပါး – ဖူလ်ဟမ်ပွဲကို ယခုကြားရက်တွင် ပြန်လည်ယှဉ်ပြိုင်ကစားစေရန် စီစဉ်ခဲ့ခြင်းဖြစ်သည်။
ထို့ပြင် မူလက လာမည့်သောကြာနေ့တွင် ယှဉ်ပြိုင်က စားရမည့် ဖူလ်ဟမ် – ချယ်လ်ဆီးပွဲကို စနေနေ့သို့ ရွှေ့ပြောင်း လိုက်ပြီး မူလက စနေနေ့တွင် ယှဉ်ပြိုင်ရမည့် အက်စတွန်ဗီ လာ – အဲဗာတန်ပွဲကို တနင်္ဂနွေနေ့သို့ ရွှေ့ပြောင်းလိုက်ကြောင်းလည်း သိရသည်။
ပရီးမီးယားလိဂ်ပြိုင်ပွဲတွင် ကိုရိုနာဗိုင်းရပ်စ်ကူးစက်မှုမှာ မြင့်တက်နေပြီး ပြီးခဲ့သည့်ရက်သတ္တပတ်က ကူးစက်ခံရသူ (၄၀)ဦးရှိခဲ့သလို၊ ဇန်နဝါရီ(၄)ရက်မှ (၁၀)ရက်နေ့အတွင်း စစ်ဆေးမှုတွင် ကူးစက်ခံရသူ (၃၆)ဦး ထပ်မံပေါ်ထွက်ခဲ့ကြောင်းလည်း သိရသည်။
