အက်သလက်တီကိုအသင်း၏ တိုက်စစ်မှူး သစ်ဖြစ်သူ ဥရုဂွေးဝါရင့်တိုက်စစ်မှူးဆွာရက်ဇ်သည် အလာဗတ်စ်အသင်းအား (၁-၂)ဂိုးဖြင့် အနိုင်ရသည့်ပွဲစဉ်တွင် အသင်းအတွက် ဂိုးဖန်တီးမှုတစ်ကြိမ်နှင့် သွင်းဂိုး (၁)ဂိုး သွင်းယူခဲ့ပြီး နောက် (၂၁)ရာစုအတွင်း အသင်း၏ လာလီဂါအဖွင့် စွမ်းဆောင်ရည်အကောင်းဆုံးကစားသမားအဖြစ် မှတ်တမ်းဝင်ခဲ့ကြောင်း သိရသည်။
ဆွာရက်ဇ်သည် ပြီးခဲ့သည့် ၂၀၂၀ နွေရာ သီအပြောင်းအရွှေ့က ဘာစီလိုနာအသင်းမှ အက်သလက်တီကိုအသင်းသို့ အလွတ်ပြောင်းရွှေ့ကြေးဖြင့် ပြောင်းရွှေ့လာခဲ့သူဖြစ်ပြီး အသင်းသစ်အတွက် ပထမဆုံးရာသီမှာပင် လာလီဂါ သွင်းဂိုးစံချိန်မှတ်တမ်းတစ်ခုကို တင်ရှိခဲ့ခြင်းဖြစ်သည်။
ဆွာရက်ဇ်သည် အက်သလက်တီကိုအသင်းအတွက် လာလီဂါပွဲစဉ် (၁၂)ပွဲသာ ပါဝင်ကစားရသေးသော်လည်း (၉)ဂိုးသွင်းယူကာ ဂိုးဖန်တီးမှု (၂)ကြိမ်ပြုလုပ်ထားပြီး ဂိုးပါဝင်ပတ်သက်မှု (၁၁)ဂိုးအထိ ရှိခဲ့ခြင်းဖြစ်သည်။
ဆွာရက်ဇ်မတိုင်မီ (၂၁)ရာစုအတွင်း အက်သလက်တီကိုအသင်းအတွက် လာလီဂါ (၁၂)ပွဲပါဝင်ကစားပြီး ဂိုးပါဝင်ပတ်သက်မှုအများဆုံး ကစားသမားအဖြစ် စံချိန်တင်ထားသူမှာ ကိုလံဘီယာတိုက်စစ်မှူး ဖယ်လ်ကာအိုဖြစ်သည်။
ဖယ်လ်ကာအိုသည် ၂၀၁၁ နွေရာသီအပြောင်းအရွှေ့ကာလက ပေါ်တိုအသင်းမှ အက်သလက်တီကိုအသင်းသို့ ပြောင်းရွှေ့လာခဲ့ပြီးနောက် အသင်းအတွက် လာလီဂါ (၁၂)ပွဲပါဝင်ကစားရာတွင် (၉)ဂိုးသွင်းကာ ဂိုးဖန်တီးမှု(၁)ကြိမ်ပြုလုပ်ခဲ့ပြီး ဂိုး ပါဝင်ပတ်
သက်မှု(၁၀) ကြိမ်ရှိခဲ့ခြင်းဖြစ်သည်။
ထို့ကြောင့် ဆွာရက်ဇ်အနေဖြင့် ဖယ်လ်ကာအို၏ စံချိန်ကို ဂိုးပါဝင်ပတ်သက်မှု (၁)ကြိမ်အသာဖြင့်ကျော်ဖြတ်ကာ (၂၁) ရာစုအတွင်း အက်သလက်တီကိုအသင်း၏ လာလီဂါအဖွင့် စွမ်းဆောင်ရည်အကောင်းဆုံးကစားသမားအဖြစ် မှတ်တမ်းဝင်ခဲ့ခြင်းဖြစ်သည်။
ထို့ပြင် ဆွာရက်ဇ်အနေဖြင့် အေဂျက်စ်၊ လီဗာပူးလ်၊ ဘာစီလိုနာအသင်းတို့နှင့် သက်ဆိုင်ရာလိဂ်အလိုက် ဂိုးသွင်းဘုရင်ဆုများကို ရယူထားနိုင်ရာ ယခုရာသီတွင် အက်သလက်တီကိုအသင်းနှင့် လာလီဂါဂိုးသွင်းဘုရင်ဆုကို ရယူနိုင်ခဲ့ပါက မတူညီသည့်အသင်း (၄)သင်းနှင့် ဂိုးသွင်းဘုရင် ဖြစ်သည့် ကစားသမားအဖြစ်လည်း မှတ်တမ်းဝင်မည်ဖြစ်သည်။
