မန်ယူ ၂-၁ အက်စတွန်ဗီလာ
ပရီးမီးယားလိဂ်မှာ ခြေစွမ်းပြနေတဲ့ မန်ယူအသင်းဟာ အိမ်ကွင်း အိုးလ်ထရက်ဖို့ဒ်မှာ အက်စတွန်ဗီလာအသင်းကို အကြိတ်အနယ်ကစားပြီး (၂-၁)ဂိုးနဲ့ အနိုင်ရကာ အမှတ်ပေးဇယားထိပ်ဆုံးက လီဗာပူးလ်အသင်းနဲ့ အမှတ်တူညီသွားခဲ့ပြီ ဖြစ်ပါတယ်။
မန်ယူအသင်းရဲ့ ပွဲထွက်စာရင်းမှာ ရပ်ရှ်ဖို့ဒ်၊ မာစီယဲလ်၊ ဘရူဖာနန်ဒက်စ်၊ ပေါ့ဘာတို့နဲ့ လူစုံခဲ့သလို အက်စတွန်ဗီလာအသင်းကလည်း ဂရီးလစ်ရှ်၊ ဝက်ကင်စ်၊ အီဂါဇီ၊ ထရာအိုရေးတို့နဲ့ ပွဲထွက်လာခဲ့တာပါ။
မန်ယူအသင်းဟာ ဒီပွဲအနိုင်ရရင် အမှတ်ပေးဇယားထိပ်ဆုံးက လီဗာပူးလ်နဲ့ ရမှတ်တူမှာဖြစ်တာကြောင့် ပွဲစကတည်းက အကောင်းဆုံးကြိုးစားခဲ့ပါတယ်။ ဒါပေမဲ့ အက်စတွန်ဗီလာကလည်း မန်ယူအသင်းကို အကောင်းဆုံးတုံ့ပြန်ကစားခဲ့တာကြောင့် ပွဲဟာ အစကတည်းက ကြည့်ကောင်းခဲ့ပါတယ်။
ပွဲချိန် (၁၀)မိနစ်မှာ ရပ်ရှ်ဖို့ဒ်ရဲ့ ပေးပို့မှုကနေ မာစီယဲလ် ဧရိယာထိပ်က လှလှပပကန်သွင်းခဲ့ပေမဲ့ အက်စတွန်ဗီလာဂိုးသမား မာတီနက်ဇ် ပုတ်ထုတ်ကာကွယ်ခဲ့သလို၊ အက်စတွန်ဗီလာဘက်က မစ်ဂင်ရဲ့ မြေမကျဘောကန်ချက်ကိုလည်း မန်ယူဂိုးသမား ဒီဟေးယား ပုတ်ထုတ်ကာကွယ်ခဲ့ရတာပါ။
အဲဒီနောက်မှာ မန်ယူဘက်က ဧရိယာအပြင်ကနေ ဖရက်ဒ် အပိုင်ကန်သွင်းခွင့်ရခဲ့ပြီး ဂိုးဘားပေါ် ကျော်သွားခဲ့ပြီး အက်စတွန်ဗီလာဘက်က ထိုးဖောက်မှုတွေလည်း မန်ယူခံစစ်ကို အလုပ်ရှုပ်စေခဲ့ပါတယ်။
ပွဲချိန် မိနစ် (၄၀)မှာတော့ ဖိကစားနေတဲ့ အိမ်ရှင် မန်ယူအသင်း အဖွင့်ဂိုး ရခဲ့ပါတယ်။ ညာတောင်ပံက ရပ်ရှ်ဖို့ဒ်၊ ဝမ်ဘစ်ဆာကာတို့ရဲ့ တွဲလုံးကနေ ဝမ်ဘစ်ဆာကာ ဖြတ်တင်ပေးတာကို မာစီယဲလ်က အက်စတွန်ဗီလာနောက်ခံလူတွေကြားကနေ ခေါင်းတိုက်သွင်းယူခဲ့တာ ဖြစ်ပါတယ်။ ဒါကြောင့် မန်ယူအသင်းဟာ ပထမပိုင်းမှာ (၁-၀)ဂိုးနဲ့ အနိုင်ရနေခဲ့ပါတယ်။
ဒုတိယပိုင်းမှာတော့ အက်စတွန်ဗီလာတို့ ချေပဂိုးရဖို့ တိုက်စစ်ဖွင့်ကစားလာခဲ့ပြီး ပွဲချိန် (၅၁)မိနစ်မှာ ဂရီးလစ်ရှ်ရဲ့ ပေးပို့မှုကို ဝက်ကင်စ် ခေါင်းတိုက်ခဲ့ပေမဲ့ ဒီဟေးယား ပုတ်ထုတ်ကာကွယ်ခဲ့ရပါတယ်။
အဲဒီနောက်မှာ နှစ်သင်းစလုံး အပြန်အလှန်ထိုးဖောက်ကစားခဲ့ကြပြီး ဂိုးသွင်းခွင့်တွေလည်း ရခဲ့ကြပါတယ်။ အထူးသဖြင့် မန်ယူတိုက်စစ်မှူး ရပ်ရှ်ဖို့ဒ်ဟာ ဗီလာနောက်တန်းကို အကြိမ်ကြိမ်ထိုးဖောက်နိုင်ခဲ့ပေမဲ့ အဆုံးသတ်ပိုင်းမှာတော့ လိုအပ်ချက်တွေ ရှိနေခဲ့တာကြောင့် ဂိုးမရခဲ့ပါဘူး။
ပွဲချိန် (၅၈)မိနစ်မှာတော့ ဒုတိယပိုင်းမှာ ချေပဂိုးရဖို့ ကြိုးစားနေတဲ့ အက်စတွန်ဗီလာအသင်း ချေပဂိုး ရရှိခဲ့တာပါ။ ဘယ်တောင်ပံကနေ ဂရီးလစ်ရှ် ချပေးတာကို ထရာအိုရေးက ဂိုးသမားနဲ့ အနီးကပ်အနေအထားကနေ အပိုင်ကန်သွင်းယူခဲ့တာ ဖြစ်ပါတယ်။
ဒါပေမဲ့ အက်စတွန်ဗီလာရဲ့ ချေပဂိုးရပြီး (၃)မိနစ်အကြာဖြစ်တဲ့ ပွဲချိန် (၆၁)မိနစ်မှာတော့ မန်ယူတို့ ဦးဆောင်ဂိုး ပြန်ရခဲ့ပါတယ်။ ပယ်နယ်တီဧရိယာအတွင်းမှာ ပေါ့ဘာကို ဗီလာကွင်းလယ်လူ ဒူးဂလပ်စ်လူးဝစ်ဇ် တားဆီးဖို့ကြိုးစားရာမှာ ကစားပုံကြမ်းခဲ့တာကြောင့် မန်ယူအသင်း ပယ်နယ်တီရခဲ့ပြီး ဘရူနိုဖာနန်ဒက်စ်က အမှားအယွင်းမရှိ ကန်သွင်းယူခဲ့တာပါ။ ဒီပယ်နယ်တီဟာ မန်ယူအသင်းကို ရောက်လာပြီးနောက် ဘရူနိုဖာနန်ဒက်စ်ရဲ့ (၉)ဂိုးမြောက် ပယ်နယ်တီဂိုးလည်း ဖြစ်ပါတယ်။
မန်ယူအသင်းဟာ ဦးဆောင်ဂိုးပြန်ရပြီးနောက်မှာ ပိုကောင်းလာခဲ့ပြီး ဗီလာထက်လည်း ပိုပြီး အခွင့်အရေးတွေ ပိုရခဲ့ပါတယ်။ ဒါပေမဲ့ ရလာတဲ့အခွင့်အရေးတွေ ပေါ့ဘာ၊ ရပ်ရှ်ဖို့ဒ်တို့ အသုံးမချနိုင်ခဲ့သလို၊ ဘရူဖာနန်ဒက်စ်၊ မာစီယဲလ်တို့ရဲ့ ဂိုးရနိုင်လောက်တဲ့ ကန်သွင်းချက်တွေကိုလည်း ဗီလာဂိုးသမား မာတီနက်ဇ်က လက်စွမ်းပြကာကွယ်ခဲ့ပါတယ်။
ကျန်ပွဲချိန်တွေမှာ နှစ်သင်းစလုံး ဂိုးတွေ ထပ်ရဖို့ ကြိုးစားခဲ့ကြပေမဲ့ ရရှိလာတဲ့ အခွင့်အရေးတွေကို အသုံးချနိုင်ခြင်းမရှိသလို၊ နှစ်ဖက်အသင်းဂိုးသမားတွေ လက်စွမ်းပြခဲ့တာကြောင့် ဂိုးထပ်မရခဲ့ပါဘူး။
ဒါကြောင့် မန်ယူအသင်းဟာ ပွဲအပြီးမှာ အက်စတွန်ဗီလာအသင်းကို (၂-၁)ဂိုးနဲ့ အနိုင်ရခဲ့ကာ အမှတ်ပေးဇယားထိပ်ဆုံးက လီဗာပူးလ်အသင်း(၃၃ မှတ်)နဲ့ ရမှတ်တူသွားခဲ့ပြီး ဂိုးကွာခြားချက်ကြောင့် ဒုတိယနေရာမှ ဆက်လက်ရပ်တည်ခဲ့ပါတယ်။
