မန်ယူအသင်းတိုက်စစ်မှူး ကာဗာနီ သည် လူမျိုးရေးခွဲခြားသည့်စကားလုံးသုံးစွဲမှုကြောင့် သုံးပွဲပယ်ပြစ်ဒဏ်နှင့် ဒဏ်ကြေးပေါင် (၁၀၀၀၀၀) ချမှတ်ခံရသည့်အပြင် လူမျိုးရေးခွဲခြားမှု ပညာပေးအစီအစဉ်ပါ တက်ရောက်ရမည်ဖြစ်ကြောင်း သိရသည်။
ကာဗာနီသည် နိုဝင်ဘာ (၂၉) ရက်က ဆောက်သမ်တန်အသင်းအား (၂)ဂိုးပြတ် ရှုံးနိမ့်နေရာမှ (၂-၃) ဂိုးဖြင့် ပြန်လည်အနိုင် ရသည့်ပွဲတွင် လူစားဝင်လာပြီးနောက် ဒုတိယချေပဂိုးနှင့် အနိုင်ဂိုး သွင်းယူပေးနိုင်ခဲ့သည်။
ကာဗာနီသည် ယင်းပွဲအပြီး Instagram ၌ မိတ်ဆွေတစ်ဦးအား ကျေးဇူးတင်ကြောင်း စာပြန်ရာတွင် စပိန်ဘာသာစကားဖြင့် “gracias negrito” ဟု ရေးသားခဲ့ကြောင်း သိရသည်။
Negrito ဆိုသည့်စကားမှာ တောင် အမေရိကနိုင်ငံအများစုတွင် ကျယ်ပြန့်စွာသုံးနှုန်းလေ့ရှိသော်လည်း အင်္ဂလန်တွင်မူ လူမျိုးရေးခွဲခြားသည့်စကားအဖြစ် သတ်မှတ်ထားသည်။
ထို့ကြောင့် အင်္ဂလန်ဘောလုံးအဖွဲ့ချုပ်(FA) က ဒီဇင်ဘာ (၁၇) ရက်တွင် စွဲချက်တင်ခဲ့ပြီး ကာဗာနီကလည်း တုံ့ပြန်ဖြေရှင်းခြင်းမရှိဘဲ လက်ခံခဲ့သောကြောင့် ဒီဇင်ဘာ (၃၁)ရက်တွင် ပြစ်ဒဏ်ချမှတ်ခဲ့ခြင်းဖြစ်သည်။
FA ၏ ပြစ်ဒဏ်အရ ကာဗာနီသည် (၃)ပွဲပယ်ပြစ်ဒဏ်နှင့် ဒဏ်ကြေး ပေါင်(၁၀၀၀၀၀)အပြင် လူမျိုးရေးခွဲခြားမှု ပညာပေးအစီအစဉ်လည်း တက်ရောက်ရမည်ဖြစ်သည်။
ပွဲပယ်ပြစ်ဒဏ်မှာ ချက်ချင်းကျခံရမည်ဖြစ်သောကြောင့် ကာဗာနီအနေဖြင့် ယနေ့ကစားမည့် ဗီလာအသင်းနှင့်ပွဲအပါအဝင် ဇန်နဝါရီ (၆)ရက်တွင် မန်စီးတီးအသင်းနှင့် လိဂ်ဖလားဆီမီးဖိုင်နယ်၊ ဇန်နဝါရီ (၉)ရက်တွင် ဝက်ဖို့ဒ်အသင်းနှင့် FA ဖလား တတိယအဆင့်ပွဲများကို လွဲချော်မည်ဖြစ်သည်။
