ဘာစီလိုနာအသင်း၏ ဥက္ကဋ္ဌရွေးကောက်ပွဲတွင် ဝင်ရောက်ရွေးချယ်ခံမည်ဖြစ်ပြီး ဥက္ကဋ္ဌသစ် ဖြစ်လာရန်လည်း ရေပန်းစားနေသော လာပေါ်တာသည် လက်ရှိ လီဗာပူးလ်နည်းပြ ယာဂန်ကလော့ပ်ကို ဘာစီလိုနာနည်းပြအဖြစ် ခန့်အပ်ရန် ဆန္ဒရှိနေကြောင်း သိရှိရသည်။
လာပေါ်တာသည် ဘာစီလိုနာအသင်း၏ ဥက္ကဋ္ဌသစ်အဖြစ် ရွေးကောက်တင်မြှောက်ခံရပါက အပြောင်းအလဲများစွာ ပြုလုပ်သွားရန် ရည်ရွယ်နေသူဖြစ်ပြီး လက်ရှိနည်းပြ ရော်နယ်လ်ကိုးမန်းကို ရာထူးမှထုတ်ပယ်၍ နည်းပြအပြောင်းအလဲပြုလုပ်ရန် လိုလားနေသူလည်းဖြစ်သည်။
လာပေါ်တာသည် မူလက ရော်နယ်လ်ကိုးမန်း၏နေရာကို ဘာစီလိုနာနည်းပြဟောင်း ဂွါဒီယိုလာ(လက်ရှိ မန်စီးတီးနည်းပြ)နှင့် အစားထိုးရန် ပစ်မှတ်ထားခဲ့သော်လည်း ဂွါဒီယိုလာက မန်စီးတီးအသင်းနှင့် သက်တမ်းတိုးစာချုပ် ချုပ်ဆိုခဲ့သည့်အတွက် ယာဂန်ကလော့ပ်ကို ပြောင်းလဲချိန်ရွယ်လာခဲ့ခြင်းဖြစ်ကြောင်းလည်း သိရှိရသည်။
ယာဂန်ကလော့ပ်သည် လီဗာပူးလ်အသင်းနှင့် ၂၀၂၄ ခုနှစ်အထိ စာချုပ်ချုပ်ဆိုထားသော်လည်း အသင်းအတွက် ပရီးမီးယားလိဂ်ချန်ပီယံဆုနှင့် ချန်ပီယံလိဂ်ဖလားတို့ကို ရယူပေးနိုင်ခဲ့ပြီဖြစ်သောကြောင့် စိန်ခေါ်မှုအသစ်ကို ရင်ဆိုင်လိုဖွယ်ရှိကြောင်း သုံးသပ်ခံထားရသည်။’
ယာဂန်ကလော့ပ် ကိုယ်တိုင်ကမူ လီဗာပူးလ်အသင်းနှင့် ချုပ်ဆိုထားသည့် လက်ရှိစာချုပ်ကို သက်တမ်းထပ်တိုးတော့မည်မဟုတ်ကြောင်းနှင့် နည်းပြအဖြစ်လည်း နှစ်ပေါင်းများစွာ လုပ်ဆောင်ဖွယ်မရှိကြောင်း ပြောကြားခဲ့ဖူးသည်။
သို့သော် လာ ပေါ်တာသည် ဘာစီလိုနာအသင်းကို ထိပ်တန်းနည်းပြတစ်ဦးဦး၏လက်သို့ အပ်နှံရန် ဆန္ဒပြင်းပြနေသည့်အတွက် ၎င်းသာ ဥက္ကဋ္ဌဖြစ်လာခဲ့ပါက ယာဂန်ကလော့ပ်ကို ချဉ်းကပ်ကမ်းလှမ်းဖွယ်ရှိကြောင်း စပိန်မီဒီယာအချို့က သုံးသပ်လျက်ရှိသည်။
