အာဆင်နယ်အသင်းနည်းပြ အာတီတာက ယခုရာသီတွင် FA ဖလားအောင်မြင်မှုရရှိခြင်းမှာ အသင်း၌တိုက်စစ်မှူး အူဘာမီယန်း ဆက်ရှိနေစေရန်အတွက် ဆွဲဆောင်မှုတစ်ခု ဖြစ်လိမ့်မည်ဖြစ်ကြောင်း သုံးသပ်ပြောကြားခဲ့သည်။
ပြီးခဲ့သည့်စနေနေ့က ကစားခဲ့သော FA ဖလား ဆီမီးဖိုင်နယ်ပွဲစဉ်တွင် အာဆင်နယ်အသင်းသည် လက်ရှိချန်ပီယံ မန်စီးတီးအသင်းအား (၂-၀)ဂိုးဖြင့် အနိုင်ရရှိခဲ့ပြီး (၂)ဂိုးစလုံးကို အူဘာမီယန်းက သွင်းယူပေးခဲ့သည်။
အူဘာမီယန်းသည် အာဆင်နယ်အသင်းတွင် အနာဂတ်လှုပ်ခတ်နေသည့် ကစားသမားတစ်ဦးဖြစ်ပြီး ယခုရာသီကုန်တွင် အသင်းမှထွက်ခွာမည်ဖြစ်ကြောင်း သတင်းများထွက်ပေါ်လျက်ရှိနေသည်။
၂၀၁၈ ဇန်နဝါရီအပြောင်း အရွှေ့ကာလတွင် အာဆင်နယ်အသင်းသို့ ရောက်ရှိိလာသော အူဘာမီယန်းသည် အသင်းအတွက် ခြေစွမ်းပြကာ ဂိုးများသွင်းယူပေးလျက်ရှိနေသော်လည်း အာဆင်နယ်အသင်းမှာ ဆုဖလားအောင်မြင်မှုနှင့် ဝေးကွာနေသည့်အပြင် လာမည့်ရာသီ ချန်ပီယံလိဂ်ဝင်ခွင့်အတွက်လည်း မျှော်လင့်ချက် မရှိတော့သဖြင့် ၎င်းမှာ ရာသီကုန်တွင် အသင်းကြီးတစ်သင်းသင်းသို့ ပြောင်းရွှေ့မည်ဟု သတင်းများထွက်ပေါ်နေသည်။
သို့ဖြစ်ရာ အာတီတာက ယခုရာသီ FA ဖလား ချန်ပီယံဆုကို ရယူခြင်းဖြင့် အူဘာမီယန်းအား ဆက်လက်ထိန်းသိမ်းနိုင်ရန် မျှော်လင့်နေခြင်းဖြစ်သည်။ မန်စီးတီးအသင်းအား အနိုင်ရသောပွဲအပြီးတွင် အာတီတာက ”သူ (အူဘာမီယန်း)နဲ့ စကားပြောကြည့်တာတော့ အခြေအနေ ကောင်းပါတယ်။
သူဟာ အောင်မြင်မှုတွေရယူလိုနေတဲ့ ကစားသမားတစ်ဦးပါ။ တကယ်လို့ ဒီအသင်းမှာ အောင်မြင်မှုတွေကို သူ တွေ့မြင်ရပြီး မှန်ကန်တဲ့လမ်းကြောင်းတစ်ခုမှာ သွားနေတယ်ဆိုတာကို တွေ့ရရင်တော့ ဒီအသင်းမှာ သူ ဆက်ရှိနေပါလိမ့်မယ်။ သူ့ကို ကျွန်တော် အများကြီးကူညီပေးနိုင်ဖို့ မျှော်လင့်ပါတယ်။ နောက်ပြီး ကျွန်တော်တို့ မှန်ကန်တဲ့လမ်းကြောင်းပေါ်ကို အရောက်သွားနိုင်မယ်လို့လည်း ယုံကြည်ပါတယ်”ဟု ပြောကြားခဲ့သည်။
အူဘာမီယန်းသည် အာဆင်နယ်အသင်း၌ ကစားသည့် (၃)ရာသီအတွင်း တတိယမြောက်ဖလားဗိုလ်လုပွဲတစ်ခုသို့ ရောက်ရှိခြင်းလည်းဖြစ်သည်။
၂၀၁၇-၁၈ ရာသီ လိဂ်ဖလားဗိုလ်လုပွဲတွင် သူ၏အသင်းမှာ မန်စီးတီးအသင်းကို (၀-၃)ဂိုးဖြင့် အရေးနိမ့်ခဲ့ရပြီး ဒုတိယဆုသာ ရရှိခဲ့သလို၊ ပြီးခဲ့သည့်ရာသီ ယူရိုပါလိဂ်ဖလားဗိုလ်လုပွဲတွင်လည်း အာဆင်နယ်အသင်းမှာ မြို့ခံပြိုင်ဘက် ချယ်လ်ဆီးအသင်းကို (၁-၄)ဂိုးဖြင့် အရေးနိမ့်ခဲ့၍ ချန်ပီယံဆုနှင့်လွဲပြီး ဒုတိယနေရာနှင့်သာ ကျေနပ်ခဲ့ရသည်။
