ချယ်လ်ဆီးဝါရင့်တိုက်စစ်မှူး ဂျရူးက မိမိအနေဖြင့် ယူရိုပြိုင်ပွဲတွင် ကစားခွင့်ရရန်အတွက် လာမည့်ဇန်နဝါရီအပြောင်းအရွှေ့ကာလတွင် အသင်းမှထွက်ခွာနိုင်ကြောင်း ပြောကြားခဲ့သည်။
အသက် (၃၄)နှစ်အရွယ်ရှိ ပြင်သစ်တိုက်စစ်မှူး ဂျရူးသည် ဒီဇင်ဘာ (၂)ရက်က ကစားခဲ့သည့် ချန်ပီယံလိဂ်အုပ်စုပွဲစဉ် ဆီဗီလာ (၀-၄) ချယ်လ်ဆီးပွဲတွင် ချယ်လ်ဆီးအသင်းအတွက် အနိုင်ဂိုး (၄)ဂိုးစလုံးကို သွင်းယူပေးခဲ့သည်။
သို့သော် ဂျရူးသည် ယခုရာသီတွင် ချယ်လ်ဆီးအသင်း၌ ပုံမှန်ပွဲထွက်ခွင့်ရရန် ရုန်းကန်နေရပြီး အရန်ကစားသမားအဖြစ်သာ ပါဝင်ကစားခွင့်ရနေသည်။
ဂျရူးက “ပုံမှန်ပွဲထွက်ခွင့်အတွက် နောက်ဆုံးအချိန်ထိ တိုက်ပွဲဝင်ဖို့ ကျွန်တော် အသင့်ပါပဲ။ ဒါပေမဲ့ သေချာတာတစ်ခုကတော့ ဒီထက်ပိုပြီး ပွဲကစားခွင့်ရမှ ကျွန်တော် ပျော်ရွှင်မှာပါ။ တကယ်လို့ ကျွန်တော်သာ ရာသီအစကတည်းက ကလပ်အသင်းမှာ ပွဲကစားခွင့်ပိုရခဲ့မယ်ဆိုရင် လာမယ့် ယူရိုပြိုင်ပွဲမှာ ကစားဖို့ ပိုအခွင့်အရေးရမှာပါ။ ပြင်သစ်နည်းပြ ဒေးရွှမ့်နဲ့ ကျွန်တော် စကားပြောပြီးပါပြီ။ သူက ချယ်လ်ဆီးအသင်းမှာ မင်း နေရာမရဘူးဆိုရင် ဇန်နဝါရီမှာ အသင်းပြောင်းဖို့ စဉ်းစားသင့်တယ်လို့ ကျွန်တော့်ကို ပြောပါတယ်။ ကျွန်တော့်အနေနဲ့ ချယ်လ်ဆီးအသင်းမှာ ဆက်နေချင်ပြီး ပွဲကစားခွင့် ပိုရချင်ပါတယ်။ ဒါပေမဲ့ ဘောလုံးမှာ ဘာဖြစ်လာမယ်ဆိုတာကို ဘယ်သူမှ ကြိုမသိနိုင်ပါဘူး။ ဘောလုံးမှာ အရာအားလုံးက အလျင်အမြန်ပဲ ဖြစ်ပျက်နေတာပါ”ဟု ပြောကြားခဲ့သည်။
ဂျရူးသည် ချယ်လ်ဆီးအသင်းနှင့် ယခုရာသီကုန်တွင် စာချုပ်သက်တမ်းကုန်ဆုံးမည်ဖြစ်ပြီး လာမည့်ဇန်နဝါရီအပြောင်းအရွှေ့ကာလတွင် ၎င်းကို ခေါ်ယူရန် ဂျူဗင်တပ်စ်၊ အင်တာမီလန်အပါအဝင် ဥရောပကလပ်အသင်းအချို့က စိတ်ဝင်စားနေကြောင်း သိရသည်။
ဂျရူးသည် ချယ်လ်ဆီးအသင်းအတွက် ယခုရာသီပြိုင်ပွဲစုံ (၁၀) ပွဲတွင် (၆)ဂိုး သွင်းယူပေးထားသည်။
