ယခုရာသီကုန်တွင် ပြန်လည်ထုတ်ပယ်ခံရတော့မည်ဟု သတင်းများထွက်ပေါ်နေသည့် ဘာစီလိုနာနည်းပြ ဆယ်တီယန်က ချန်ပီယံလိဂ်တွင် အသင်းကို ဆက်လက်ကိုင်တွယ်ခွင့်ရ၊ မရ မသေချာကြောင်း ဝန်ခံပြောကြားသည်။
ဘာစီလိုနာအသင်းသည် ယခုရာသီ လာလီဂါပြိုင်ပွဲတွင် အမှတ်ပေးဇယားကို ရာသီအစပိုင်းကတည်းက တောက်လျှောက်ဦးဆောင်နိုင်ခဲ့သော်လည်း COVID-19 ကာလအတွင်း ကစားသည့်ပွဲစဉ်များတွင် ပုံမှန်ခြေစွမ်းရရန် ရုန်းကန်ခဲ့ရပြီး လာလီဂါချန်ပီယံဆုကို မဟာပြိုင်ဘက် ရီးယဲလ်အသင်းထံ လွှဲပြောင်းပေးခဲ့ရသည်။
ဇူလိုင်လ (၁၆)ရက်က ကစားခဲ့သည့် လာလီဂါပွဲစဉ် ဘာစီလိုနာ (၁-၂) အိုဆာဆူနာပွဲအပြီးတွင် မက်ဆီက အသင်း၏ကစားပုံကို ပြင်းပြင်းထန်ထန်ဝေဖန်ခဲ့ပြီး ချန်ပီယံလိဂ်ပြိုင်ပွဲမတိုင်မီ အပြောင်းအလဲကြီးကြီးမားမားလုပ်ရန် လိုအပ်ကြောင်း သတိပေးပြောကြားသည်။
ဘာစီလိုနာအသင်းနည်းပြ ဆယ်တီယန်က မက်ဆီ၏ပြောစကားများမှာ မှန်ကန်ကြောင်းနှင့် လာလီဂါချန်ပီယံဆုကို လက်လွှတ်ခဲ့ရခြင်းအတွက် မိမိတွင် တာဝန်ရှိကြောင်း ပြောကြားခဲ့သည်။
“ကျွန်တော်က အသင်းရဲ့ နည်းပြဖြစ်လို့ ဒီအခြေအနေအတွက် ကျွန်တော့်မှာ တာဝန်ရှိပါတယ်။ ချန်ပီယံလိဂ်ပြိုင်ပွဲမှာ ကွဲပြားတဲ့အသင်းတစ်သင်းအဖြစ်မြင်ရဖို့ မျှော်လင့်ထားပါတယ်။ ဒါပေမဲ့ နောက်ထပ်ဘာဖြစ်လာမလဲဆိုတာ ကျွန်တော်လည်း သေချာမသိပါဘူး။ အိုဆာဆူနာနဲ့ပွဲအပြီးမှာ မက်ဆီ ပြောတဲ့စကားတွေက အမှန်တွေပါပဲ။ ကျွန်တော်တို့အနေနဲ့ ဘာတွေ ဖြစ်နေတယ်ဆိုတာကို ကိုယ်တိုင်အဖြေရှာရမှာပါ” ဟု ဆယ်တီယန်က ပြောကြားခဲ့သည်။
