ယူနိုက်တက်တို့ ဂျက် ဂရီလစ်ရှ် ကို မခေါ်ယူနိုင်ခဲ့ရတဲ့ အဓိက အကြောင်းအရင်း နှစ်ခု

မန်ချက်စတာ ယူနိုက်တက် အသင်းဟာ ပြီးခဲ့တဲ့ နွေအပြောင်းအရွှေ့ တုန်းက ကွင်းလယ် နဲ့ တိုက်စစ်ပိုင်းကို အင်အား ဖြည့်တင်း နိုင်ဖို့ အတွက် ဒေါ့မွန် အသင်းမှ ဂျေဒန် ဆန်ချို နဲ့ အက်စတွန် ဗီလာ အသင်းမှ အသင်းခေါင်းဆောင် ဂျက် ဂရီလစ်ရှ် တို့ကို ဦးစားပေး ပစ်မှတ် အဖြစ် သတ်မှတ် ထားခဲ့တာ အားလုံး အသိပဲ ဖြစ်ပါတယ် ။

ဒါပေမယ့် ဒေါ့မွန် အသင်း ဖက်က ကစားသမား ဖြစ်သူ အတွက် ဈေးအရမ်း ကိုင်နေ ခဲ့တဲ့ အတွက် ယူနိုက်တက် တို့ဟာ မခေါ်ယူ နိုင်ပဲ လက်လျော့ ခဲ့ကြရ ပါတယ် ။ အခြား တစ်ဖက် မှာတော့ အက်စတွန် ဗီလာ အသင်းက သူတို့ရဲ့ အသင်းခေါင်းဆောင်ကို စာချုပ် သက်တမ်း တိုးမြှင့် သွားခဲ့ ပါတယ် ။

အခုတော့ ဂျက် ဂရီလစ်ရှ်ဟာ ရာသီ အသစ်မှာ အက်စတွန် ဗီလာ အသင်း အတွက် အထူး ပုံစံကောင်း တွေကို ဆက်တိုက် ပြသနိုင် ခဲ့ပြီး ပြီးခဲ့တဲ့ ဘောလုံး ရာသီတုန်းက တန်းဆင်းဇုန် အနားမှာ ရုန်းကန် နေခဲ့ရတဲ့ အသင်းကို အမှတ်ပေး ဇယား ထိပ်ပိုင်းမှာ ရပ်တည် နေအောင် ကူညီ ပေးနိုင်ခဲ့ ပါပြီ ။

အက်စတွန် ဗီလာ အသင်းဟာ လက်ရှိ ဘောလုံးရာသီ အတွင်း ပွဲစဉ် 7 ပွဲ ကစားပြီးချိန် 5 ပွဲနိုင် ၊ 2 ပွဲရှုံး ( တစ်ပွဲကျန် ) ရလဒ် နဲ့ အတူ အမှတ်ပေး ဇယား အဆင့် 6 နေရာမှာ ရပ်တည် နိုင်ခဲ့ ပါတယ် ။ အဆိုပါ ပွဲစဉ် 7 ပွဲမှာ ဂရီလစ်ရှ် က ကိုယ်တိုင် 4 ဂိုး သွင်းယူ 5 ဂိုး ဖန်တီး ပေးထား နိုင်ခဲ့ ပါတယ် ။

ယူနိုက်တက် တို့ဟာ နွေတုန်းက ဂရီလစ်ရှ်ကို အရခေါ်ယူမယ့် အစား အေဂျက်ဇ် မှ ဒွန်နီ ဗန်ဒီ ဘိခ် ကိုသာ ခေါ်ယူ နိုင်ခဲ့ကြ ပါတယ် ။ ဒါပေမယ့် ဗန်ဒီ ဘိခ်ဟာ မျှော်လင့် ထားသလောက် ပုံစံကောင်း တွေကို မပြသ နိုင်ခဲ့ပဲ ပွဲထွက် ကစားခွင့် ရရှိ နိုင်ဖို့တောင်မှ ရုန်းကန် နေခဲ့ရ ပါတယ် ။

ဒါ့ကြောင့် မန်ချက်စတာ ယူနိုက်တက် အသင်းဟာ ဂရီလစ်ရှ်ကို မခေါ်ယူနိုင် ခဲ့တာ မှားယွင်း သွားခဲ့ ရပြီ ဖြစ်ကြောင်း သုံးသပ်သူတွေ များပြား လာခဲ့ကြ ပါတယ် ။ အခုတော့ ယူနိုက်တက်တို့ ဂရီလစ်ရှ်ကို မခေါ်ယူနိုင် ဖြစ်ခဲ့ ရတဲ့ အဓိက အကြောင်းအရင်း နှစ်ချက်ကို မန်ချက်စတာ ညနေခင်း သတင်းက ဖော်ပြလိုက် ပါပြီ ။

ဂရီလစ်ရှ်ဟာ ကွင်းလယ် နဲ့ တိုက်စစ်ပိုင်းမှာ နေရာစုံ ကစားပေး နိုင်စွမ်း ရှိတဲ့ ကစားသမား တစ်ဦး ဖြစ်ပေမယ့် တကယ်တမ်း မှာတော့ ဘယ် တောင်ပံ တိုက်စစ်ဖက် အခြမ်းမှာ ကစားတာ ပိုပြီး ထူးကဲ ကောင်းမွန်သူ တစ်ဦးပဲ ဖြစ်ပါတယ် ။ ဒါကို လက်ရှိ ဘောလုံး ရာသီ အတွင်းမှာ ကျွန်တော်တို့ မြင်တွေ့ခဲ့ပြီးကြ ပါပြီ ။

အခြား တစ်ဖက် မှာတော့ မန်ချက်စတာ ယူနိုက်တက် အသင်းရဲ့ ဘယ်တောင်ပံ တိုက်စစ် နေရာမှာ ရပ်ရှ်ဖို့ ၊ မာရှယ် နဲ့ ဒန်နီယယ် ဂျိမ်းစ်တို့ ကစားပေး နိုင်စွမ်း ရှိကြ ပါတယ် ။ ဒါ့ကြောင့် ယူနိုက်တက် တို့ဟာ သူ့ကို ခေါ်ယူ ဖြစ်ခဲ့မယ် ဆိုရင် စိတ်ကြိုက် နေရာမှာ ပွဲထွက် ကစားခွင့် တွေကို ပေးဆောင် နိုင်မှာ မဟုတ် ပါဘူး ။

ယူနိုက်တက်တို့ ဂရီလစ်ရှ်ကို မခေါ်ယူ နိုင်ခဲ့ ကြတဲ့ နောက်ထပ် အချက် တစ်ချက် ကတော့ ဘဏ္ဍာရေး အခြေအနေကြောင့်ပဲ ဖြစ်ပါတယ် ။ ပြီးခဲ့တဲ့ ဘောလုံး ရာသီ တုန်းက ကိုရိုနာ ဗိုင်းရပ်စ်ကြောင့် ပရိသတ်တွေ ပွဲကြည့်ခွင့် မရရှိတော့တဲ့နောက် ယူနိုက်တက် တို့ရဲ့ ဝင်ငွေ တွေဟာ သိသိသာသာ ထိုးကျ သွားခဲ့ရ ပါတယ် ။

ဒီလို အနေအထား တစ်ရပ်မှာ အက်စတွန် ဗီလာ အသင်းက သူတို့ ရဲ့ အသင်း ခေါင်းဆောင် ဖြစ်သူ အတွက် အနည်းဆုံး ပေါင် သန်း 80 အလိုရှိနေခဲ့ကြပြီး ဈေးလျော့ပေးဖို့ ဆန္ဒ မရှိခဲ့ကြ ပါဘူး ။ ဒါ့ကြောင့် ပုံစံကောင်း ပြနိုင်မလား ဆိုတာ မသေချာတဲ့ ကစားသမား တစ်ဦး အတွက် ယူနိုက်တက် တို့ဟာ ဒီလောက် ငွေတွေ သုံးစွဲဖို့ လက်တွန့် ခဲ့ကြ ပါတယ် ။

အခြား တစ်ဖက် မှာတော့ ယူနိုက်တက် တို့ဟာ ဂျေဒန် ဆန်ချို ကို ဦးစားပေး ခေါ်ယူဖို့ ပစ်မှတ် ထားနေ ခဲ့တာကြောင့် အဲ့ဖက်မှာ ငွေကြေး များစွာ သုံးဖြစ်ပါက ဂရီလစ်ရှ် အတွက် ဒီလောက် ပမာဏ ထပ်သုံး နိုင်ဖို့ မလွယ်ကူတော့တဲ့ အနေအထား တစ်ရပ်ကို ပိုင်ဆိုင် သွားမှာပဲ ဖြစ်ပါတယ် ။

ဒါ့ကြောင့် ယူနိုက်တက် တို့ဟာ ဂရီလစ်ရှ် အတွက် အများဆုံး ပေါင် သန်း 60 ခန့်သာ သုံးစွဲ သွားဖို့ ဆန္ဒ ရှိခဲ့ ကြတာပဲ ဖြစ်ပါတယ် ။ ဒါပေမယ့် ကစားသမား ဖြစ်သူက အသင်းနဲ့ စာချုပ် သက်တမ်း တိုးတာ စောသွားခဲ့တဲ့ အတွက် ယူနိုက်တက် တို့ဟာ ခေါ်ယူခွင့် ရဖို့ နောက်ထပ် အခွင့်အလမ်း မပိုင်ဆိုင် နိုင်ခဲ့ကြပါဘူး ။

ဒါ့ကြောင့် အနေအထားအရပ်ရပ်ကို ခြုံကြည့်လိုက်တဲ့ အခါမှာ ယူနိုက်တက် တို့ဟာ ပွဲ ကစား စေမယ့် နေရာ အဆင် မပြေမှု ၊ ဘဏ္ဍာရေး အင်အား လျော့နည်း နေခဲ့တဲ့ အခိုက်အတန့်နဲ့ ကြုံတွေ့ နေခဲ့ရမှု တွေကြောင့် အင်္ဂလန် လက်ရွေးစင်ကို မခေါ်ယူ နိုင်ခဲ့ရတာ ဖြစ်တယ်လို့ မန်ချက်စတာ ညနေခင်း သတင်းက သုံးသပ် ဖော်ပြ သွားခဲ့လိုက် ပါတယ် ။