ပရီးမီးယားလိဂ်ပြိုင်ပွဲတွင် ကစားသမားများ ဒဏ်ရာရရှိမှုမှာ ပြီးခဲ့သည့်ရာသီနှင့်နှိုင်းယှဉ်လျှင် ၁၅% ပိုမိုတိုးမြင့်လာကြောင်း သိရှိရသည်။
သို့ဖြစ်ရာ ပရီးမီးယားလိဂ်နည်းပြအချို့မှာ ပြီးခဲ့သည့်ရာသီကကဲ့သို့ ကစားသမား (၅)ဦးလူစားလဲသည့်စနစ်ကို ပြန်လည်ကျင့်သုံးစေရန် ဆန္ဒရှိနေကြောင်း သိရှိရသည်။
ပြီးခဲ့သည့် ရက်သတ္တပတ်အတွင်း ပရီးမီးယားလိဂ်မှ နာမည်ကြီးနည်းပြများဖြစ်သော ဂွါဒီယိုလာ၊ ယာဂန်ကလော့ပ်အစရှိသူတို့က ယင်းလူစားလဲစနစ်ကို ပြန်လည်ကျင့်သုံးစေရန်အတွက် ဖိအားပေးတောင်းဆိုခဲ့ကြသည်။
ပရီးမီးယားလိဂ်ပြိုင်ပွဲတွင် ပြီးခဲ့သည့်ရာသီက ကိုရိုနာဗိုင်းရပ်စ်ကြောင့် ပွဲစဉ်များရပ်နားပြီး ဘောလုံးပွဲများ ပြန်လည်ကစားရာတွင် အချိန်တိုအတွင်းပွဲများကို ခပ်စိပ်စိပ်ကစားရသဖြင့် ကစားသမားများဒဏ်ရာရရှိမှု လျော့နည်းစေရန်အတွက် (၅)ဦးလူ စားလဲသည့်စနစ်ကို ကျင့်သုံးခဲ့သည်။
ယခုရာသီတွင်မူ ယင်းစနစ်အား ပြန်လည်ပယ်ဖျက်ခဲ့ပြီး ပရီးမီးယားလိဂ်ပွဲစဉ်များတွင် ပုံမှန်အတိုင်း (၃)ဦးလူစားလဲသည့်စနစ်ကိုသာ ကျင့်သုံးလျက်ရှိသည်။
စစ်တမ်းများအရ ယခုရာသီစတင်သည့် ရက်သတ္တပတ်(၆)ပတ်အတွင်းတွင် ဒဏ်ရာရရှိမှု (သို့မဟုတ်) ဖျားနာမှုခံစားရ၍ ပွဲမကစားနိုင်သော ကစားသမားအရေအတွက်မှာ (၁၀၇)ဦးအထိရှိကြောင်း သိရှိရပြီး ယင်းပွဲတွင် ကိုရိုနာဗိုင်းရပ်စ်ရောဂါပိုးတွေ့ ရှိရသော ကစားသမားများနှင့် Quarantine ဝင်ရသော ကစားသမားများ မပါဝင်ကြောင်းသိရသည်။
ဒဏ်ရာရသူများထဲတွင် ကြွက်သားဒဏ်ရာခံစားရမှုမှာ အများဆုံးဖြစ်ပြီး ပြီးခဲ့သည့်ရာသီကထက် (၄၂%)အထိ တိုးမြင့် လာကြောင်း သိရှိရသည်။
