ဘာစီလိုနာအသင်းသည် လာလီဂါနောက်ဆုံးလေးပွဲတွင် နှစ်မှတ်သာရရှိခြင်းမှာ ပုံမှန်မဟုတ်သဖြင့် စိုးရိမ်ကြောင်း အသင်းနည်းပြ ရော်နယ်လ်ကိုးမန်းက ဝန်ခံခဲ့သည်။
ဘာစီလိုနာအသင်းအနေဖြင့် လာလီဂါပွဲစဉ် ခြောက်ပွဲကစားအပြီးတွင် ရှစ်မှတ်သာရရှိထားခြင်းမှာ ၂၀၀၂-၂၀၀၃ ရာသီနောက်ပိုင်း ၁၈ နှစ်အတွင်း အဆိုးရွားဆုံး ရာသီအစရလဒ်အဖြစ် မှတ်တမ်းဝင်သွားပြီဖြစ်ကြောင်း သိရသည်။
သို့ဖြစ်ရာ ဘာစီလိုနာအသင်းနည်းပြ ရော်နယ်လ်ကိုးမန်းက ” နိုင်ပွဲတွေဆက်တိုက်ပျောက်နေတဲ့အတွက် ကျွန်တော် စိုးရိမ်ပါတယ်။ နောက်ဆုံးကစားတဲ့ ၁၂ မှတ် (လေးပွဲ)မှာ နှစ်မှတ်ပဲရထားတာက ဘာစီလိုနာလိုအသင်းအတွက် ပုံမှန်မဟုတ်ပါဘူး။ ဒါပေမဲ့ ကျွန်တော်ပြောထားသလိုပဲ ကျွန်တော်တို့က အပြောင်းအလဲတွေ အများကြီးဖြစ်ထားတာပါ။ အသင်းရဲ့ ကြိုးစားအားထုတ်မှုကို စောဒကမတက်ချင်ပါဘူး”ဟု ပြောကြားသည်။
ဘာစီလိုနာအသင်းသည် ရာသီအစ နှစ်ပွဲသာ အနိုင်ရထားပြီး ခြောက်ပွဲအပြီးတွင် နှစ်ပွဲနိုင်၊ နှစ်ပွဲသရေ၊ နှစ်ပွဲရှုံးဖြင့် ရှစ်မှတ်သာရရှိထားရာ ၁၈ နှစ်အတွင်း အဆိုးရွားဆုံး ရာသီအစရလဒ်အဖြစ် မှတ်တမ်းဝင်သွားခြင်းဖြစ်သည်။
ဘာစီလိုနာအသင်းသည် အမှတ်ပေးဇယားတွင် အဆင့် ၁၂ နေရာ ရောက်ရှိနေသလို အဓိကပြိုင်ဘက် ရီးယဲလ်အသင်းနှင့်လည်း ရှစ်မှတ်ကွာဟသွားပြီဖြစ်သည်။
