လက်ရှိ ဝေးလ် လက်ရွေးစင် အသင်းကို ကိုင်တွယ်နေတဲ့ မန်ချက်စတာ ယူနိုက်တက် အသင်း ရဲ့ ဂန္ဓဝင် ကစားသမားဟောင်း ဖြစ်သူ ရိုင်ယန်ဂစ်က သူဟာ လူးဝစ် ဗန်ဟားလ်ရဲ့ နေရာကို အစားထိုးဖို့ အတွက် အဆင်သင့် ရှိနေခဲ့ ပေမယ့် ယူနိုက်တက် အသင်းရဲ့ အကြီးအကဲ တွေက သူ့ကို ထည်တွက် ခဲ့ကြောင်း ထုတ်ဖော် ပြောကြား သွားခဲ့လိုက် ပါတယ် ။
ရိုင်ယန်ဂစ် ဆိုတာ အောင်မြင်မှုတွေ ထူးထူးကဲကဲ ရယူ နိုင်ခဲ့တဲ့ မန်ချက်စတာ ယူနိုက်တက် အသင်းရဲ့ အခမ်းနားဆုံး ကစားသမားတွေ ထဲက တစ်ဦး အဖြစ် သတ်မှတ်ခံထား ရသူ ဖြစ်ပြီး 2014 ခုနှစ် တုန်းက အသင်း ရဲ့ ယာယီ နည်းပြ တာဝန် ကိုပါ ထမ်းဆောင်ခဲ့သူ တစ်ဦးပဲ ဖြစ်ပါတယ် ။
အဆိုပါ အချိန်က ယူနိုက်တက် တို့ဟာ ရလဒ်တွေ ဆိုးရွား နေခဲ့တဲ့ နည်းပြ ဒေးဗစ် မိုယက်စ် ကို ထုတ်ပယ်ခဲ့ပြီး ဂစ်ကို ယာယီ နည်းပြ အဖြစ် ရာသီကုန် အထိ ကိုင်တွယ် ပေးဖို့ ခန့်အပ် ခဲ့တာပဲ ဖြစ်ပါတယ် ။ အဲ့ဒီမှာတော့ ဂစ်က အသင်းကို လေးပွဲ ကိုင်တွယ် ပေးခဲ့ပြီး နှစ်ပွဲ အနိုင် ရရှိအောင် လမ်းညွှန် နိုင်ခဲ့ ပါတယ် ။
အဲ့ဒီနောက် မန်ချက်စတာ ယူနိုက်တက် အသင်းဟာ လူးဝစ် ဗန်ဟားလ်ကို နည်းပြသစ် အဖြစ် ခေါ်ယူ ခဲ့ပြီး ရိုင်ယန်ဂစ် ကိုတော့ လက်ထောက် နည်းပြ တာဝန် ဆက်လက် ပေးဆောင်ခဲ့ ပါတယ် ။ ဂစ်ဟာ ဗန်ဟားလ် လက်အောက် မှာတော့ 2 နှစ်ထိ တာဝန် ထမ်းဆောင်ခဲ့ ပါတယ် ။
ဒါပေမယ့် ယူနိုက်တက် အသင်းမှ လူးဝစ် ဗန်ဟားလ် ထုတ်ပယ် ခံခဲ့ရတဲ့နောက် ပေါ်တူဂီသားကြီး ဟိုဆေး မော်ရင်ဟို ရောက်ရှိ လာချိန်မှာတော့ ဂစ်ဟာ ယူနိုက်တက် အသင်းမှ ထွက်ခွာခဲ့ပြီး နောက်ပိုင်းမှာ ဝေးလ် လက်ရွေးစင် အသင်း ရဲ့ နည်းပြ ဖြစ်လာ နိုင်ခဲ့တာပဲ ဖြစ်ပါတယ် ။
အခုတော့ ဂစ်က မိုယက်စ် ထုတ်ပယ်ခံ ခဲ့ရချိန်မှာ သူဟာ နည်းပြ တာဝန်ကို ထမ်းဆောင် လိုခဲ့ ပေမယ့် အဆင်သင့် မဖြစ်ခဲ့ကြောင်း ၊ ဒါပေမယ့် လူးဝစ် ဗန်ဟားလ် ထုတ်ပယ် ခံခဲ့ရချိန် မှာတော့ ယူနိုက်တက် နည်းပြသစ် ဖြစ်လို ခဲ့ကြောင်း ဝန်ခံ စကားတွေ ပြောကြား သွားခဲ့လိုက် ပါတယ် ။
” ရိုးရိုးသားသား ပြောရမယ် ဆိုရင် ဒေးဗစ် မိုယက်စ် ထုတ်ပယ် ခံခဲ့ ရချိန်မှာ ကျွန်တော်ဟာ ယူနိုက်တက် နည်းပြ တာဝန်ကို လိုချင်ခဲ့ ပါတယ် ။ ဒါပေမယ့် ကျွန်တော် အဆင်သင့်တော့ မဖြစ်ခဲ့သေး ပါဘူး ။ အဲ့ဒီ အချိန် တုန်းက အသင်း ရဲ့ ကစားသမားဟောင်း တွေက အသင်းကို ပြန်လည် ကိုင်တွယ် ကြတာမျိုး ခေတ်စား ခဲ့ပြီလေ ”
” ဒါပေမယ့် အခြား တစ်ဖက်မှာတော့ နည်းပြဟောင်း တွေလည်း အသင်းပြောင်း ကိုင်တွယ်တာမျိုး များပြားခဲ့ ပါတယ် ။ ဒီလို လုပ်ဆောင်ရတာဟာ လုံခြုံတယ်လို့ ထင်တဲ့သူက ထင်ခဲ့ ကြတယ်လေ ။ ကျွန်တော် ယူနိုက်တက် အသင်းရဲ့ ယာယီ နည်းပြ ဖြစ်ခဲ့ တုန်းက အမြဲတမ်း နည်းပြ ဖြစ်ချင်ခဲ့ ပါတယ် ”
” ဒါပေမယ့် အဲ့ဒီ တုန်းက ပွဲစဉ် လေးပွဲ ကိုင်တွယ် ခဲ့တဲ့နောက် ကျွန်တော်ဟာ အဆင်သင့် မဖြစ်ခဲ့သေး ပါဘူး ။ ဒါပေမယ့် လူးဝစ် ဗန်ဟားလ် ထုတ်ပယ်ခံပြီးချိန် မှာတော့ ကျွန်တော်က သေချာပေါက် အဆင်သင့် ဖြစ်နေခဲ့ ပါပြီ ။ ကျွန်တော် အလုပ် လိုချင်ခဲ့ ပေမယ့် ရမယ့် အနေအထား ဘယ်လိုမှ မပိုင်ဆိုင် ခဲ့ရ ပါဘူး ”
” လူးဝစ် ဗန်ဟားလ် က ခြားနားတဲ့ နည်းပြ တစ်ယောက်ပါ ။ သူဟာ လွှမ်းမိုးနိုင်စွမ်း ကြီးမားခဲ့ ပါတယ် ။ ကျွန်တော် သူနဲ့ ပထမဆုံး အကြိမ် တွေ့ဆုံ ခဲ့စဉ် တုန်းက သူဟာ ကျွန်တော့် ဗိုက်ကို လက်သီး နဲ့ ထိုးခဲ့ ပါတယ် ( သူငယ်ချင်းတွေ နှုတ်ဆက်သလိုမျိုး ) ။ ကျွန်တော် သူနဲ့ တွေ့ဆုံ ဖြစ်ခဲ့ ပါတယ် ”
” ကျွန်တော့် ဆီမှာ ဘယ်သူက ကောင်းတယ် ၊ ဘယ်သူကတော့ မကောင်းဘူး ဆိုတဲ့ ကစားသမား စာရင်း ရှိနေခဲ့တယ်လေ ။ ကျွန်တော် ဟော်တယ်ကို သွားပြီး တံခါး ခေါက်ခဲ့ ပါတယ် ။ သူဟာ ကျွန်တော့်ကို ခြေစုံခေါင်းစုံ ၊ ဝတ်စားပုံ ကြည့်ပြီး ‘ မင်း ပုံစံ ကြည့်ကောင်းတယ် ‘ လို့ ပြောခဲ့ ပါတယ် ”
” အဲ့ဒီနောက် ကျွန်တော့် ဗိုက်ကို ထိုးရင်း နှုတ်ဆက် ခဲ့တာပေါ့ဗျာ ။ သူထိုးတာ နည်းနည်းတော့ နာခဲ့ ပါတယ် ။ ကျွန်တော်လည်း ဘာလုပ်ရမလဲ မသိ ဖြစ်ခဲ့ရတာပေါ့ဗျာ ” လို့ ဂစ်က သူနဲ့ နည်းပြဟောင်း လူးဝစ် ဗန်ဟားလ် ရဲ့ ပထမဆုံး တွေ့ဆုံ ခဲ့ပုံ အကြောင်း ပြန်ပြောင်း ပြောကြား သွားခဲ့လိုက် ပါတယ် ။
