ဘာစီလိုနာအသင်းနည်းပြ ရော်နယ်လ်ကိုးမန်းက ဂရီးဇ်မန်းမှာ အသင်းအတွက် အရေးပါသည့်ကစားသမားဖြစ်ကြောင်း ပြောကြားခဲ့သည်။
ပြင်သစ်တိုက်စစ်ကစားသမား ဂရီးဇ်မန်းသည် ၂၀၁၉ နွေရာသီအပြောင်းအရွှေ့စျေးကွက်တွင် အက်သလက်တီကိုအသင်းမှ ဘာစီလိုနာအသင်းသို့ ပေါင် (၁၀၈)သန်းဖြင့် ပြောင်းရွှေ့လာခဲ့သူဖြစ်သည်။
သို့သော် ဂရီးဇ်မန်းသည် ဘာစီလိုနာအသင်းတွင် ပုံမှန်ခြေစွမ်းရရန် ရုန်းကန်နေရပြီး ယခုရာသီတွင် ဂိုးသွင်းယူနိုင်ခြင်းမရှိသေးသလို၊ ဖယ်ရန်ဗာရို့စ်အသင်းအား (၅-၁)ဂိုးဖြင့် အနိုင်ရသည့် ချန်ပီယံလိဂ်ပွဲတွင်လည်း ပွဲထွက်ကစားခွင့်မရခဲ့ပေ။
ထို့ကြောင့် ဂရီးဇ်မန်းသည် အသင်းနှင့် ပြဿနာများ ရှိနေသည်ဟု သတင်းများထွက်ပေါ်နေပြီး အဆိုပါသတင်းများကို အသင်းနည်းပြ ရော်နယ်လ်ကိုးမန်းက ငြင်းဆန်ခဲ့သည်။
ရော်နယ်လ်ကိုးမန်းက “ဂရီးဇ်မန်းအနေနဲ့ တခြားကစားသမားတွေလိုပဲ ပွဲထွက်ခွင့်ရတာပါပဲ။ ဒါပေမဲ့ ပွဲတိုင်းတော့ ဘယ်ဟုတ်ပါ့မလဲ။ သူက ကျွန်တော်တို့အတွက် အရေးပါတဲ့ ကစားသမားပါ။ ကျွန်တော်တို့က ကစားသမားတွေ အားလုံးကို အကောင်းဆုံးခြေစွမ်းရစေချင်တာပါ။ အသင်းက အရေးအကြီးဆုံးပါပဲ။ ကျွန်တော့်အနေနဲ့ ရီးယဲလ်နဲ့ ကစားမဲ့ ပွဲမှာလည်း အကောင်းဆုံးကစားသမားတွေကို ရွေးချယ်သွားမှာပါ”ဟု ပြောကြားခဲ့သည်။
အသက် (၂၉) နှစ်အရွယ်ရှိ ဂရီးဇ်မန်းသည် ပြီးခဲ့သည့် ၂၀၁၉-၂၀ ရာသီက ဘာစီလိုနာအသင်းအတွက် ပြိုင်ပွဲစုံ (၄၈)ပွဲတွင် (၁၅)ဂိုး သွင်းယူပေးခဲ့သည်။
