ကမ္ဘာ့ဘောလုံးအဖွဲ့ချုပ် (ဖီဖာ)၏ ဥက္ကဋ္ဌဖြစ်သူ အင်ဖန်တီနိုက ဥရောပထိပ်တန်း ကလပ်အသင်းကြီးများက အသွင်သစ်ပြောင်းလဲရန် စီစဉ်နေသည့် ဥရောပပရီးမီးယားလိဂ်ကို ထောက်ခံခြင်းမပြုခဲ့ကြောင်း သိရှိရသည်။
ဥရောပ၏ ထိပ်တန်းအသင်းကြီး (၁၈)သင်းက လိဂ်ပြိုင်ပွဲပုံစံကစားမည့် ဥရောပ ပရီးမီးယားလိဂ်သည် UEFA ၏ လက်အောက်က ခွဲထွက်ကာ ကျင်းပမည့်ပြိုင်ပွဲဖြစ်ပြီး ဖီဖာနှင့် ပူးပေါင်းကာ ကျင်းပရန် ဆွေးနွေးမှုများပြုလုပ်နေခြင်းဖြစ်သည်။
ဖီဖာအဖွဲ့ချုပ် အနေဖြင့် ယင်းအကြံအစည်ကို လက်ခံဆွေးနွေးပြီး ထောက်ခံမည့် သဘောထားရှိခဲ့သည်။ သို့သော် ဖီဖာဥက္ကဋ္ဌဖြစ်သူ အင်ဖန်တီနိုကမူ “ဖီဖာဥက္ကဋ္ဌ တစ်ဦးအနေနဲ့ ပြောရရင် ကျွန်တော်က ကလပ်ကမ္ဘာ့ဖလားပြိုင်ပွဲကို စိတ်ဝင်စားပါတယ်။ ဥရောပ ပရီးမီးယားလိဂ်ကို စိတ်မဝင်စားပါဘူး။ ဥရောပ ပရီးမီးယားလိဂ်မှာ ဘိုင်ယန်မြူးနစ်နဲ့ လီဗာပူးလ်ကစားမှာကို ကျွန်တော် စိတ်မဝင်စားပါဘူး။ ဘိုင်ယန်မြူးနစ်နဲ့ ဘိုကာဂျူနီယာကစားမှာကိုပဲ စိတ်ဝင်စားပါတယ်။ ဖီဖာက အကောင်အထည်ဖော်တဲ့လုပ်ငန်းစဉ်ကိုက ဥရောပတစ်ခုတည်းအတွက်မဟုတ်ပါဘူး။ တစ်ကမ္ဘာလုံးမှာ ဘောလုံးအားကစား ဖွံ့ဖြိုးလာဖို့ဖြစ်ပါတယ်” ဟု ဆိုခဲ့သည်။
