ဘာစီလိုနာအသင်း၏ ဥက္ကဋ္ဌ ဘာတိုမူက အာဂျင်တီးနားတိုက်စစ်မှူး လော်တာရိုမာတီနက်ဇ်၏ အပြောင်းအရွှေ့အတွက် အင်တာမီလန်အသင်းနှင့် ဆွေးနွေးမှုကို ရပ်တန့်လိုက်ပြီဖြစ်ကြောင်း ပြောကြားခဲ့သည်။
ဘာစီလိုနာအသင်းသည် အသက်အရွယ်ရလာသည့် အသင်းတိုက်စစ်မှူး ဆွာရက်ဇ် (၃၃ နှစ်)နေရာတွင် အစားထိုးရန်အတွက် အင်တာမီလန်တိုက်စစ်မှူး လော်တာရိုမာတီနက်ဇ်ကို ကာလရှည်ပစ်မှတ်ထားနေခဲ့သည့်အသင်း ဖြစ်သည်။
သို့သော် ဘာစီလိုနာအသင်းဥက္ကဋ္ဌ ဘာတိုမူက မိမိတို့အနေဖြင့် လော်တာရိုမာတီနက်ဇ်အတွက် ဆွေးနွေးမှုများ ရပ်တန့်ထားပြီး ရာသီကုန်မှသာ ပြုလုပ်လိုသည်များကို ဆုံးဖြတ်မည်ဖြစ်ကြောင်း ပြောကြားခဲ့ခြင်းဖြစ်သည်။
ဘာတိုမူက “ကျွန်တော်တို့ ပြီးခဲ့တဲ့ရက်သတ္တပတ်အနည်းငယ်ကတည်းက အင်တာမီလန်အသင်းနဲ့ ဆွေးနွေးခဲ့ပါတယ်။ အခုတော့ ရပ်တန့်လိုက်ပါပြီ။ လာလီဂါနဲ့ ချန်ပီယံလိဂ်ပြိုင်ပွဲပြီးမှ ကျွန်တော်တို့ ဘာတွေဆက်လုပ်သွားမလဲဆိုတာ မြင်တွေ့ရမှာပါ”ဟု ပြောကြားခဲ့သည်။
ဘာတိုမူက နေမာကိုလည်း PSG အသင်းက ရောင်းထုတ်မည်မဟုတ်၍ ပြန်လည်ခေါ်ယူရန် အစီအစဉ်မရှိကြောင်း၊ အသင်းခေါင်းဆောင် မက်ဆီကို သက်တမ်းတိုးရန် ဆွေးနွေးနေကြောင်းလည်း ပြောကြားခဲ့သည်။
