၂၀၂၄ ခုနှစ်တွင် လီဗာပူးလ်နှင့် လမ်းခွဲမည်ဟု ယာဂန်ကလော့ပ် အတည်ပြု

လီဗာပူးလ်အသင်းကို ပရီးမီးယားလိဂ်ချန်ပီယံဆု ရရှိအောင် စွမ်းဆောင်ပေးနိုင်ခဲ့သည့် နည်းပြ ယာဂန်ကလော့ပ်က လက်ရှိစာချုပ်သက်တမ်းကုန်ဆုံးမည့် ၂၀၂၄ ခုနှစ်တွင် လီဗာပူးလ်အသင်းနှင့် လမ်းခွဲမည်ဖြစ်ကြောင်း အတည်ပြုပြောကြားခဲ့သည်။

လီဗာပူးလ်အသင်းသည် ဂျာမန်နည်းပြ ယာဂန်ကလော့ပ်ကို ၂၀၁၅ အောက်တိုဘာလ၌ ဘရန်ဒန်ရော်ဂျာ၏နေရာတွင် အစားထိုးခန့်အပ်ခဲ့ခြင်းဖြစ်ပြီး (၃)နှစ်စာချုပ်ချုပ်ဆိုခဲ့သည်။

ထို့နောက် ၂၀၁၆ ခုနှစ်တွင် ၂၀၂၂ ခုနှစ်အထိ သက်တမ်းတိုးခဲ့ပြီး ၂၀၁၉ ခုနှစ်တွင်မူ ၂၀၂၄ ခုနှစ်အထိ ထပ်မံသက်တမ်းတိုးခဲ့သည်။

လီဗာပူးလ်အသင်းအတွက် ချန်ပီယံလိဂ်ဖလားကိုလည်း ရယူပေးနိုင်ခဲ့သည့် ယာဂန်ကလော့ပ်က မိမိတို့၏ ပူးပေါင်းဆောင်ရွက်မှုမှာ လုံလောက်မှုရှိပြီဟု ယူဆခြင်းကြောင့် စာချုပ်သက်တမ်းကုန်ဆုံးချိန်တွင် လမ်းခွဲရန် စီ စဉ်ခြင်းဖြစ်ကြောင်း ပြောကြားခဲ့သည်။

ထို့ပြင် ယာဂန်ကလော့ပ်က မိမိကို ဘောလုံးလောကတွင် ဆက်လက်မြင်တွေ့ရမည်ဟုလည်း ဆိုခဲ့သည်။

ဂျာမနီသို့ ပြန်ရန် အစီအစဉ်ရှိ၊ မရှိ မေးမြန်းခဲ့ရာတွင် ယာဂန်ကလော့ပ်က နည်းပြဘဝအစပြုခဲ့သည့် မိန့်ဇ်အသင်းကို ပြန်လည်ကိုင်တွယ်သွားရန် ရည်ရွယ်ထားကြောင်း ဖြေကြားခဲ့သည်။

အန်ဖီးလ်တွင် မည်မျှဆက်ရှိမည်နည်းဟု မေးမြန်းမှုကိုမူ လီဗာပူးလ်အသင်းတွင် (၄)နှစ်ဆက်ရှိသွားမည်ဟု ဖြေကြားခဲ့ခြင်းဖြစ်သည်။

ယင်းသတင်းထွက်ပေါ်လာခဲ့ပြီးနောက် ဂျာမန်သတင်းစာ Bild က ယာဂန်ကလော့ပ်သည် ဂျာမနီလက်ရွေးစင်အ သင်းကို ကိုင်တွယ်ရန် စိတ်ဝင်စားနေခြင်းဖြစ်ပြီး လီဗာပူးလ်အသင်းနှင့် လမ်းခွဲပြီးပါက ၎င်းရွေးချယ်မည့်အသင်းမှာ ဂျာမနီလက်ရွေးစင်အသင်းသာ ဖြစ်လိမ့်မည်ဟု သုံးသပ်ဖော်ပြခဲ့ သည်။

ဗြိတိန်မီဒီယာအချို့ကမူ ယာဂန်ကလော့ပ်ကို စွန့်လွှတ်ရမည့်အခြေအနေမှာ လီဗာပူးလ်အသင်းအတွက် ဆုံးရှုံးမှုဟု သတ်မှတ်ရမည်ဖြစ်သော်လည်း ယနေ့ခေတ်ဘောလုံးလောကတွင် (၉)နှစ်ကြာလက်တွဲခွင့်ရခြင်းကိုပင် ကျေနပ်ရ မည်ဖြစ်ကြောင်းနှင့် ယာဂန်ကလော့ပ်နေရာအစားထိုးရန် နည်းပြကို ကြိုတင်ရှာဖွေလျာထားသင့်ပြီဖြစ်ကြောင်း အကြံပြုဖော်ပြခဲ့ကြသည်။