အင်္ဂလန်အမှတ်ပေးပြိုင်ပွဲသမိုင်းတစ်လျှောက် ပျမ်းမျှလိဂ်ရပ်တည်မှုများကို တွက်ချက်ရာတွင် လီဗာပူးလ်အသင်းက အမှတ်ပေးဇယားထိပ်ဆုံးတွင် ရပ်တည်နိုင်ခဲ့ပြီး ပရီးမီး ယားလိဂ်ခေတ်တွင် အအောင်မြင်ဆုံးအသင်းဖြစ်သည့် မန်ယူအသင်းမှာမူ အဆင့် (၄)နေရာတွင်သာ ရပ်တည်နိုင်ခဲ့ကြောင်း သိရှိရသည်။
လီဗာပူးလ်အသင်းသည် အင်္ဂလန်အမှတ်ပေးပြိုင်ပွဲသမိုင်းတွင် စုစုပေါင်း (၁၁၆)ရာသီယှဉ်ပြိုင်နိုင်ခဲ့ရာတွင် ယင်းရာသီများ၏ အဆင့်စုစုပေါင်းမှာ (၉၀၅)ရှိခဲ့ပြီး ပျမ်းမျှအားဖြင့် ရာသီတစ်ခု၏ရပ်တည်မှုမှာ အဆင့် (၇.၈)ရှိခဲ့သည်။
ပျမ်းမျှရပ်တည်မှုအဆင့်မှာ ရရှိသည့်ဆုဖလားအရေအတွက်အပေါ် မူတည်ကာ အစဉ်လိုက်စီသည့် စနစ်မျိုးမဟုတ်ဘဲ သမိုင်းတစ်လျှောက် ရပ်တည်မှုအားလုံးပေါင်းကို၊ သမိုင်းတစ်လျှောက် ယှဉ်ပြိုင်ခဲ့သည့် ရာသီအရေအတွက်နှင့် အချိုးပြန်ချကာ တွက်ချက်ထားခြင်းဖြစ်သည်။
လီဗာပူးလ်အသင်းသည် အမှတ်ပေးချန်ပီယံဆု (၁၉)ကြိမ်အထိ ရရှိခဲ့ခြင်းကြောင့် အဆင့် (၁)နေရာတွင် (၁၉)ကြိမ် ရှိနေပြီး၊ ယင်းရာသီများသည် အခြားရာသီများစွာတွင် ရပ်တည်မှုနိမ့်ကျခြင်းများအတွက် ပြန်လည်အဖတ်ဆယ်နိုင်စေခဲ့သည်။
ဘီလ်ရှန်ကလေ၊ ဘော့ပ်ပီယာစလေတို့လက်ထက် အောင်မြင်မှုများက အသင်းကို ကူညီခဲ့ခြင်းလည်းဖြစ်သည်။
မန်ယူအသင်းမှာမူ ပရီးမီးယားလိဂ်ခေတ် အောင်မြင်မှုများနှင့်အတူ အမှတ်ပေးချန်ပီယံအကြိမ် (၂၀)ရယူခဲ့သော်လည်း သမိုင်းတစ်လျှောက်လုံးအနေဖြင့် ကျရှုံးခဲ့သည့် ရာသီများလည်းရှိသဖြင့် ပျမ်းမျှအဆင့် (၉.၈)သာ ရှိခဲ့သည်။
အဆင့်(၂) နေရာတွင် အာဆင်နယ်အသင်းက ပျမ်းမျှအဆင့် (၈.၄)၊ အဆင့် (၃)နေရာတွင် အဲဗာတန်အသင်းက ပျမ်းမျှအဆင့် (၉.၁) တို့ဖြင့် ရပ်တည်ခဲ့ပြီး၊ အဆင့် (၅၊ ၆၊ ၇၊ ၈) နေရာများတွင် စပါး၊ ဗီလာ၊ ချယ်လ်ဆီး၊ မန်စီးတီးတို့က အစဉ်လိုက်ရပ်တည်ခဲ့ကြသည်။
