ဘာစီလိုနာအသင်းခေါင်းဆောင် မက်ဆီက မိမိပြုလုပ်ခဲ့သမျှ အရာအားလုံးမှာ အသင်း၏အကျိုးအတွက်သာဖြစ်ပြီး အောင်မြင်မှုများ ပြန်လည်ရယူနိုင်ရန်အတွက် အားလုံးစည်းလုံးညီညွတ်ကြရန် တိုက်တွန်းခဲ့သည်။
အသက် (၃၃)နှစ်အရွယ်ရှိ အာဂျင်တီးနားတိုက်စစ်မှူး မက်ဆီသည် ယခုနွေရာသီအပြောင်းအရွှေ့ကာလတွင် အသင်းမှ ပြောင်းရွှေ့ကြေးအလွတ်ဖြင့် ထွက်ခွာခွင့်ပေးရန် တောင်းဆိုခဲ့သူဖြစ်သည်။
သို့သော် ဘာစီလိုနာအသင်း ဘုတ်အဖွဲ့က လျော်ကြေး ယူရိုသန်း(ရဝဝ) ရရှိမှသာ ထွက်ခွာခွင့်ပေးမည်ဟု အကြောင်းပြန်ခဲ့သဖြင့် ဆုံးဖြတ်ချက် ကိုပြန်ပြင်ကာ အသင်းတွင်ဆက်နေရန် ဆုံးဖြတ်ခဲ့သည်။
ယင်းအတွက် မက်ဆီသည် ၎င်းကို ထွက်ခွာခွင့်မပေးခဲ့သည့် ဘာစီလိုနာအသင်းဥက္ကဋ္ဌ ဘာတိုမူနှင့် အသင်းဘုတ်အဖွဲ့ကို ဝေဖန်ခဲ့သလို၊ ဆွာရက်ဇ် အား အက်သလက်တီကိုထံသို့ ရောင်းချခဲ့ခြင်းနှင့် ပတ်သက်၍လည်း အသင်းကို ဝေဖန်ခဲ့သည်။
သို့သော် မက်ဆီက မိမိအနေဖြင့် ယင်းကဲ့သို့ပြုလုပ်ခဲ့ခြင်းမှာ အသင်းအတွက်သာဖြစ်ပြီး နည်းပြသစ် ရော်နယ်လ်ကိုးမန်းလက်ထက်တွင် အောင်မြင်မှုများရယူနိုင်ရန်အတွက် ပရိသတ်များ အပါအဝင် အားလုံးညီညွတ်ရန်လိုအပ်ကြောင်း စပိန်အားကစားသတင်းစာ Sport နှင့်တွေ့ဆုံရာတွင် ပြောကြားခဲ့သည်။
မက်ဆီက “ကျွန်တော် ဘာပဲလုပ်လုပ် အသင်းရဲ့အကျိုးအတွက်ပဲ အမြဲစိတ်ထဲမှာရှိပါတယ်။ ကျွန်တော်တို့အကြားမှာ သဘောထားကွဲလွဲမှုတွေ၊ အမြင်မတူတာတွေ အများကြီး ရှိပေမယ့် အဲဒီအရာအားလုံးကို ကျွန်တော် အဆုံးသတ်လိုက်ချင်ပါပြီ။ ကျွန်တော်တို့အနေနဲ့ အ ကောင်းဆုံးဖြစ်ချင်တယ်ဆိုရင် အားလုံးစည်းလုံး ညီညွတ်နေဖို့ လိုပါတယ်။ တကယ်လို့ ကျွန်တော့်ဘက်က အမှားတွေရှိခဲ့ရင် ကျွန်တော် တာဝန်ယူပါတယ်။ ဒါတွေက အသင်းကောင်းဖို့ ကျွန်တော် လုပ်ခဲ့တာပါ”ဟု ပြောကြားခဲ့သည်။
