ပရီးမီးယားလိဂ်အဖွဲ့ချုပ်သည် အောက်တန်းလိဂ်ပြိုင်ပွဲများကို ကူညီထောက်ပံ့ပေးရန်အတွက် EFL ၏ တောင်းဆိုမှုကို လိုက်လျောရန် နီးစပ်နေပြီဖြစ်သော်လည်း ၎င်းင်းတို့တောင်းဆိုထားသည့် ပေါင် သန်း (၂၅၀)အထိမှာမူ ဖြစ်နိုင်ဖွယ်မရှိကြောင်း သိရသည်။
ပရီးမီးယားလိဂ်အဖွဲ့ချုပ်၏ အမှုဆောင်ချုပ် ရစ်ချတ်မာစတာစ်နှင့် EFL ၏ ဥက္ကဋ္ဌဖြစ်သူ ရစ်ခ်ပယ်ရီတို့သည် ယင်းကိစ္စနှင့်ပတ်သက်ပြီး ပထမတစ်ကြိမ် ဆွေးနွေးမှုတွင် အပြီးသတ်သဘောတူညီမှုမရခဲ့ချေ။ သို့ရာတွင် ပရီးမီးယားလိဂ်အဖွဲ့ချုပ်က EFL ကို ကူညီပေးရန်လိုသည်ဆိုသည့်အချက်ကိုမူ သဘောတူညီမှုရရှိခဲ့ပြီး ကူညီပေးမည့် ငွေကြေးအတွက် ထပ်မံဆွေးနွေးမှုများ ပြုလုပ်ရဦးမည်ဖြစ်သည်။
ရစ်ခ်ပယ်ရီက EFL အတွက် ပေါင်သန်း (၂၅၀)အကူအညီပေးရန် တောင်းဆိုခဲ့ခြင်းမှာ အောက်တန်းလိဂ်ပြိုင်ပွဲများသည် ကွင်းဝင်ကြေးတစ်ခုသာ အားထားနေရချိန်တွင် ကွင်းပိတ်ပွဲစဉ်များကြောင့် အသင်းကို ဆက်လက်လည်ပတ်ရန် အခက်အခဲများ ကြုံတွေ့နေခြင်းကြောင့်ဖြစ်သည်။
ဗြိတိန်အစိုးရက အကူအညီပေးမည့် ကဏ္ဍများထဲတွင်လည်း အားကစားနည်း အနည်းငယ်သာပါဝင်ပြီး ဘောလုံးအသင်းများ မပါဝင်ခဲ့ချေ။
ဗြိတိန် အစိုးရက EFL လက်အောက်ရှိ ကလပ်အသင်းများ၏ ဘဏ္ဍာရေးဆိုင်ရာအခက်အခဲများကို ပရီးမီးယားလိဂ်က ကူညီပေးရန် တိုက်တွန်းခဲ့သည်။
