ဘာစီလိုနာအသင်း နည်းပြရာထူးမှ ထုတ်ပယ်ခံခဲ့ရသည့် ဆယ်တီယန်က စာချုပ်စည်းကမ်းဖောက်ဖျက်မှုဖြင့် အသင်းဟောင်းအား တရားစွဲဆိုသွားမည်ဖြစ်ကြောင်း ကြာသပတေးနေ့တွင် Twitter မှတစ်ဆင့် ကြေညာ ချက်ထုတ်ပြန်ခဲ့သည်။
စပိန်နိုင်ငံသား နည်းပြဖြစ်သူ ဆယ်တီယန်(၆၁ နှစ်)သည် ပြီးခဲ့သည့် ဇန်နဝါရီလအတွင်း ဘာစီလိုနာအသင်း နည်းပြအဖြစ် (၂)နှစ်ခွဲစာချုပ်ဖြင့် ခန့်အပ်ခံခဲ့ရသည်။
သို့သော် ချန်ပီယံလိဂ်ပြိုင်ပွဲ၌ ဘိုင်ယန်မြူးနစ်အသင်းအား စံချိန်တင်ရလဒ်ဖြင့် အရှက်တကွဲရှုံးနိမ့်ပြီးနောက် ဩဂုတ်(၁၇)ရက်တွင် ဘာစီလိုနာအသင်းက ၎င်းအား ရာထူးမှထုတ်ပယ်ခဲ့သည်။
ဘာစီလိုနာအသင်းနှင့် ဆယ်တီယန်၏စာချုပ်မှာ (၂)နှစ်ကျန်ရှိနေသော်လည်း တစ်နှစ်အလိုတွင် လမ်းခွဲခွင့်ရှိသည့်အချက် ထည့်သွင်းချုပ်ဆိုထားသည်။
သို့ဖြစ်ရာ ဘာစီလိုနာအသင်းအနေဖြင့် ဆယ်တီယန်အား တစ်နှစ်လစာ ယူရို(၄)သန်း ပေးချေရမည်ဖြစ်သော်လည်း တစ်လကြာမြင့်သည်အထိ အကြောင်းကြားခြင်းမရှိသဖြင့် တရားစွဲဆိုမည်ဖြစ်ကြောင်း ၎င်းက ကြေညာချက်ထုတ်ပြန်ခဲ့ခြင်းဖြစ်သည်။
ယင်းကြေညာချက်တွင် ဆယ်တီယန်အပါအဝင် နည်းပြ အဖွဲ့ဝင်(၃)ဦးလည်း ပါဝင်လက်မှတ်ရေးထိုးထားသည်။
ဆယ်တီယန်နှင့် သဘောတူညီမှုမရသေးသဖြင့် ဘာစီလိုနာအသင်းအနေဖြင့် နည်းပြသစ် ရော်နယ်လ်ကိုးမန်းအား ခန့်အပ်မှုမှာ တရားမဝင်သေးဘဲ လာလီဂါပွဲစဉ်များကိုလည်း ကိုင်တွယ်ခွင့်ရမည် မဟုတ်ကြောင်း သိရသည်။
