လီဗာပူးအသင်းနည်းပြ စလော့က တော့တင်ဟမ်နဲ့ကာရာဘောင်ဖလားပွဲကို အာနိုးလ်လွဲချော်မယ်လို့ အတည်ပြုလိုက်ပါတယ်။ ဘုန်းမောက်အသင်းကို ၄ ဂိုးပြတ်အနိုင်ရခဲ့တဲ့ပွဲမှာ အာနိုးလ်တစ်ယောက် ပေါင်ခြံဒဏ်ရာရရှိခဲ့တာဖြစ်ပြီး ဘရက်ဒ်လေနဲ့ လူစားလဲခဲ့ရတာဖြစ်ပါတယ်။ ဒါပေမယ့် ကနဦးစစ်ဆေးချက်တွေအရ အင်္ဂလန်သားအခြေအနေဟာ အရမ်းမဆိုးဝါးဘူးလို့ သိရပါတယ်။ လီဗာပူးအသင်းဘက်ကတော့ အာနိုးလ်အခြေအနေအရမ်းမဆိုးဝါးဖို့ မျှော်လင့်နေပါတယ်။
တော့တင်ဟမ်နဲ့ကာရာဘောင်ဆီမီးဖိုင်နယ်ဒုတိယအကျော့ပွဲမတိုင်ခင် လီဗာပူးအသင်းနည်းပြ စလော့က အာနိုးလ်အခြေအနေကို အတည်ပြုခဲ့တာဖြစ်ပါတယ်။ “သူ(အာနိုးလ်) မနက်ဖြန်မှာကန်မယ့် တော့တင်ဟမ်နဲ့ပွဲကို လွဲချော်မှာပါ။ တနင်္ဂနွေနေ့မှာ ပြန်ကစားနိုင်မလားဆိုတာ ကြည့်ရပါမယ်။ ဒါပေမယ့် မနက်ဖြန်ပွဲကိုတော့ လွဲချော်မှာပါ။
ဘုန်းမောက်နဲ့ပွဲမှာ သူအနည်းငယ်နာကျင်ခဲ့တာကို မြင်တွေ့ခဲ့ရပါတယ်။ အဲ့တာကြောင့် သူမနက်ဖြန်ပွဲကို လွဲချော်တာပါ။ လက်ရှိမှာ ပြန်လည်ကြံ့ခိုင်မှုအတွက် လုပ်ဆောင်နေပါတယ်။ ဘယ်လောက်ကြာမလဲဆိုတာကတော့ ဆက်လက်စောင့်ကြည့်ရမှာပါ”လို့ စလော့တ်က ပြောကြားခဲ့ပါတယ်။ အာနိုးလ်မပါဝင်နိုင်တာကြောင့် တော့တင်ဟမ်နဲ့ပွဲကို ဘရက်ဒလေက ပွဲထွက်လာဖွယ်ရှိနေပါတယ်။
စလော့တ်က တော့တင်ဟမ်နဲ့ပွဲမှာ ဘရက်ဒလေအနေနဲ့ စိန်ခေါ်မှုတွေကို ကိုင်တွယ်နိုင်မယ်လို့ ထောက်ခံခဲ့ပါတယ်။ “သူ(ဘရက်ဒလေ) တော့တင်ဟမ်နဲ့ပွဲပထမအကျော့မှာ ပါဝင်ခဲ့ပါတယ်။ ပွဲတိုင်း နဲ့ လေ့ကျင့်ခန်းအစီအစဉ်တိုင်းမှာ သူသင်ယူနေပါတယ်။ ပီအက်စ်ဗွီနဲ့ချန်ပီယံလိဂ်ပွဲမှာလည်း သူအကောင်းဆုံးလုပ်ဆောင်နိုင်ခဲ့ပါတယ်””လို့ စလော့က ထပ်လောင်းပြောကြားခဲ့ပါတယ်။
လီဗာပူးအသင်းဟာ တော့တင်ဟမ်ကို အန်ဖီးလ်မှာ ရင်ဆိုင်ရမှာဖြစ်ပြီး ပထမအကျော့ရလဒ်ကို ပြန်လည်ပြောင်းလဲနိုင်ဖို့ လိုအပ်နေပါတယ်။ တနင်္ဂနွေနေ့ အက်ဖ်အေဖလားပွဲအဖြစ် ပလိုင်းမောက်နဲ့ပွဲအပြီး ဖေဖော်ဝါရီ ၁၂ ရက်နေ့မှာ လီဗာပူးအသင်းဟာ မာဆေးလ်ဆိုက်ဒါဘီပွဲအဖြစ် အဲဗာတန်နဲ့ရင်ဆိုင်ရမှာဖြစ်ပါတယ်။
