မန်ယူအသင်းသည် ဒေါ့မွန်အသင်း၏ အင်္ဂလန်လူငယ်ကြယ်ပွင့် ဂျေဒန်ဆန်ချိုအား ခေါ်ယူရန်ကြိုးပမ်းမှုမှာ ပိုမိုနီးစပ်သည့် အခြေအနေသို့ ရောက်ရှိလာခဲ့ပြီဖြစ်ကြောင်း နာမည်ကျော် Sky Sports သတင်းဋ္ဌာနက ဖော်ပြခဲ့သည်။
မန်ယူအသင်းသည် ဆန်ချိုအား ဒေါ့မွန်အသင်းက ရောင်းထုတ်တော့မည်မဟုတ်ဟု တရားဝင်ကြေညာပြီးသည့်တိုင် လက်မလျှော့သေးဘဲ ကစားသမားနှင့် ဆွေးနွေးမှုအပိုင်းများကို ဆက်လက်ကြိုးပမ်းခဲ့ပြီး ပြီးခဲ့သည့် (၂၄) နာရီအတွင်း တိုးတက်လာသည့် အခြေအနေများက ယင်းအပြောင်းအရွှေ့ကို ပိုမိုနီးစပ်လာစေခဲ့ခြင်းဖြစ်သည်ဟု Sky Sports က ဆိုသည်။
မန်ယူအသင်းသည် နောက်ဆုံး (၂၄)နာရီအတွင်းတွင် ဂျေဒန်ဆန်ချို၏ လစာငွေကိစ္စနှင့် အေးဂျင့်ခတို့အတွက် စိတ်ပူစရာမလိုသည့် အခြေအနေသို့ ရောက်ရှိသွားခဲ့ပြီဟု Sky Sports ၏ သတင်းထောက်တစ်ဦးဖြစ်သူ ဆာ့သ်ကပြောကြားခဲ့ပြီး နောက်ဆုံးအဆင့် အခြေအနေမှာ ဒေါ့မွန်အသင်းနှင့် ဆွေးနွေးမှုကို အပြီးသတ်နိုင်ရန်သာ ဖြစ်သည်ဟု သိရှိရသည်။
ဆာ့သ်က “မန်ချက်စတာယူနိုက်တက်က ကိုရိုနာကပ်ဆိုးကြီးအတွင်းမှာ ကစားသမားတစ်ဦးကို ပေးသင့်တာထက် ပိုမပေးချင်တဲ့ ဆန္ဒရှိတာကို ကျွန်တော်နားလည်ပါတယ်။ ဒါပေမဲ့ ပြီးခဲ့တဲ့ (၂)ပတ်၊ (၃)ပတ်အတွင်းမှာ သူတို့က အလွန် တန်ဖိုးမြင့်တဲ့ ဘာအပြောင်းအရွှေ့မှ မလုပ်ခဲ့ဘူးဆိုတာက ဆန်ချိုကိစ္စကို အရမ်းအာရုံစိုက်နေလို့ပါ။ ဆန်ချိုနဲ့ ပတ်သက်ပြီး ဒေါ့မွန်အသင်းက သူတို့ကိုယ်ပိုင် Deadline သတ်မှတ်ထားပြီး ဒါက ကျော်သွားပါပြီ။ ဒါပေမဲ့ မန်ယူက ဒါကို စိတ်မပူပါဘူး။ သူတို့ တောင်းတဲ့ ပေါင် (၁၀၈)သန်း (ယူရိုသန်း ၁၂၀)ပေးနိုင်ရင် ခေါ်နိုင်မယ်ဆိုတာ သိပါတယ်။ အခုပြဿနာက ဘယ်လောက်အထိ လျှော့ပေးနိုင်မလဲဆိုတာကို ညှိနှိုင်းဖို့ပါ” ဟု ပြောကြားခဲ့သည်။
