ချဲလ်ဆီး အသင်း ဟာ ၎င်းတို့ရဲ့ ယခုနှစ် နွေရာသီ အပြောင်းအရွှေ့ ဈေးကွက် အတွင်း ဒုတိယမြောက် ကစားသမားသစ် ခေါ်ယူမှု အဖြစ် ပြီးခဲ့တဲ့ ဇွန်လ အတွင်းကပဲ လစ်ပ်ဇစ် အသင်း ရဲ့ ဂျာမနီ လက်ရွေးစင် တိုက်စစ်မှူး တီမို ဗာနာ ကို ယူရိုသန်း ၅၀ ၊ တပတ် လုပ်ခ ပေါင် ၁၇၀၀၀၀ နဲ့ ၅နှစ် စာချုပ်ချုပ်ဆိုကာ ခေါ်နိုင်ခဲ့တာ ဖြစ်ပါတယ် ။
![](https://sportsmyan.com/wp-content/uploads/2020/09/Chelsea-28-1024x536.jpg)
ဗာနာ ဟာ ချဲလ်ဆီး သို့ တရားဝင် ပြောင်းရွှေ့ဖို့ မဖြစ်လာသေးခင် အချိန် အထိ လက်ရှိ ပရီးမီးယားလိဂ် ချန်ပီယံ လီဗာပူး အသင်း သို့ ရောက်ရှိဖို့ အတော်လေး သတင်း ထွက်ပေါ်ခဲ့ပါတယ် ။ ဒါ့အပြင် မန်စီးတီး အသင်း နဲ့လည်း သတင်း အစအန တချို့ ထွက်ပေါ်ခဲ့ပါသေးတယ် ။
လီဗာပူး ဖက်က ဗာနာ ခေါ်ယူဖို့ အရင်ဆုံး ကမ်းလှမ်းခဲ့တာ ဖြစ်ပေမယ့် ၊ ပွဲထွက်ခွင့် အတွက် အာမခံချက် မပေးနိုင်ခြင်း ၊ လစ်ပ်ဇစ် အသင်း ဖက်က တောင်းဆိုတဲ့ စာချုပ် ဖျက်သိမ်းခ ကို အတိအကျ မပေးချေလိုခြင်း အစရှိတဲ့ အချက်တွေကြောင့် အပြောင်းအရွှေ့ ညှိနှိုင်းမှု ပျက်ပြယ်ခဲ့ရပါတယ် ။
![](https://sportsmyan.com/wp-content/uploads/2020/09/Timo-werner-liverpool-1024x536.jpg)
ဒီ အချိန်မှာ ချဲလ်ဆီး အသင်း ဟာ နည်းပြ ဖြစ်သူ ဖရန့် လမ်းပတ် နဲ့ နည်းစနစ် ဒါရိုက်တာ ဖြစ်သူ ပီတာချက် တို့ရဲ့ အလျင်အမြန် စည်းရုံးမှုတွေ အပြင် ၊ ဗာနာ ကိုယ်တိုင် ကလည်း ချဲလ်ဆီး အသင်း ရဲ့ အနာဂတ် အစီအစဉ် ၊ ကစားခွင့် ပုံမှန် ရမယ့် အခြေအနေ တို့ အပေါ် အတော်လေး သဘောကျခဲ့တာကြောင့် လန်ဒန် သို့ ဗာနာ တယောက် ပြောင်းရွှေ့ဖို့ ရွေးချယ်ခဲ့ပါတယ် ။
ဗာနာ ဟာ ပြီးခဲ့တဲ့ ဘောလုံး ရာသီ က ဘွန်ဒက်စ်လီဂါ သွင်းဂိုး ၂၈ ဂိုး အထိ သွင်းယူကာ ၊ Prolific Goalscorer ဖြစ်ကြောင်း နဲ့ ချဲလ်ဆီး အသင်း ရဲ့ လိုအပ်ချက် ကို ဖြည့်ဆည်းပေးနိုင်ကြောင်း သက်သေပြထားပြီး ဖြစ်ပါတယ် ။
ချဲလ်ဆီး နည်းပြ ဖရန့် လမ်းပတ် ကတော့ ဗာနာ ကို လီဗာပူး ၊ မန်စီးတီး တို့ထက် လက်ဦးမှု ရယူခဲ့ပုံ နဲ့ ပတ်သက်ပြီး ” ကစားသမားသစ် တယောက် အတွက် လီဗာပူး ၊ မန်စီးတီး တို့လို အသင်းတွေနဲ့ ယှဉ်ပြိုင် ခေါ်ယူရတဲ့ နေရာမှာ ခင်ဗျား ဟာ အဲ့ဒီ ကစားသမား ကို ခင်ဗျား ဖက်က ကမ်းလှမ်းပေးတဲ့ အကောင်းဆုံး ပုံစံ ကို တင်ဆက်ပေးရပါတယ် ။ ”
” ကစားသမားသစ်တွေကို ခေါ်ယူရာမှာ ကျွန်တော် ဟာ ကလပ် အသင်း အတွက် ကိုယ့်ရဲ့ အကောင်းဆုံး စွမ်းဆောင်ရည် တွေကို ကြိုးစား ထုတ်ပြရပါတယ် ။ ပီတာ ဆိုရင်လည်း ကျွန်တော်နဲ့ တူတူပါပဲ ။ တီမို လို ကစားသမားမျိုး ကို ခေါ်ယူဖို့ ကျွန်တော်တို့ သေချာပေါက် စိတ်ဝင်စားခဲ့တာပါ ။ ”
![](https://sportsmyan.com/wp-content/uploads/2020/09/Timo-werner-1024x536.jpg)
” သူ ကိုယ်တိုင်ကလည်း ကျွန်တော်တို့ သူ့ကို ဘယ်လောက် အထိ လိုအပ်သလဲ ဆိုတာ နားလည်ဖို့ လိုပါတယ် ။ ကျွန်တော် နဲ့ စကားပြော ဆွေးနွေးရာမှာ သူ ပြောခဲ့တဲ့ အကြောင်းအရာ မှန်သမျှ ကို အလွန်ပဲ သဘောကျခဲ့ပါတယ် ။ တခြား ခေါ်ယူနိုင်ခဲ့တဲ့ ကစားသမားသစ် တွေလည်း အတူတူပါပဲ ။ ”
” မန်နေဂျာ – ကစားသမား အပြန်အလှန် ဆွေးနွေးမှု ဟာ အသင်း အတွင်း ကောင်းမွန်တဲ့ ဆက်ဆံရေး တခု ကို တည်ဆောက်ဖို့ အတွက် အရမ်းပဲ အရေးပါလှပါတယ် ။ ခင်ဗျား လုပ်ပေးနိုင်တဲ့ တခုတည်းသော အရာ က ကလပ် အတွက် ကိုယ့်ရဲ့ အကောင်းဆုံး ပုံစံနဲ့ ပေးဆပ်ဖို့ပါ ။ ”
” ကျွန်တော် တို့ဟာ ဒီလို ထိပ်တန်း အဆင့် ကစားသမားမျိုးတွေကို ခေါ်ယူနိုင်ခဲ့လို့ ပျော်ရွှင်နိုင်ကြပါပြီ ။ ဒါဟာ ကျွန်တော်တို့ ရှေ့ဆက် ဘယ်လို အလုပ်လုပ်မလဲ ဆိုတာ ပြသနိုင်ခဲ့တာပါ ။ အခုတော့ ကျွန်တော်တို့ဟာ အဆင့် ၂ ကို တက်လှမ်းနေပါတယ် ။ ဒီ ကစားသမားသစ်တွေ အထိုင်ကျဖို့ ၊ သူတို့ရဲ့ အကောင်းဆုံး အရည်အသွေးတွေကို ထုတ်ယူနိုင်ဖို့ ဖြစ်ပါတယ် ။ ” လို့ ပြောကြားခဲ့ပါတယ် ။