ယူနိုက်တက်နည်းပြ တန်ဟက်က ဖီနာဘာချီအသင်းနဲ့ယူရိုပါလိဂ်ပွဲမတိုင်ခင် ယူနိုက်တက်နည်းပြဟောင်း မော်ရင်ဟိုကို ချီးကျူးပြောကြားလိုက်ပါတယ်။ မော်ရင်ဟိုဟာ ယူနိုက်တက်အသင်းကို ၂ ရာသီခွဲကျော်ကြာကိုင်တွယ်ခဲ့တာဖြစ်ပြီး အဲ့နောက် အသင်းကနေ ထွက်ခွာခဲ့ပါတယ်။
ပေါ်တူဂီသားထွက်ခွာပြီးနောက် ယူနိုက်တက်ဟာ နည်းပြ ၃ ယောက်အထိ အပြောင်းအလဲဖြစ်ခဲ့ပြီး အဆုံးသတ်မှာမှ တန်ဟက်ရောက်ရှိလာခဲ့တာဖြစ်ပါတယ်။ မော်ရင်ဟိုဟာ ဖီနာဘာချီကိုမပြောင်းခင် တော့တင်ဟမ် နဲ့ ရိုးမားအသင်းတို့ကို ကိုင်တွယ်ခဲ့ပါတယ်။ တူရကီမြေမှာ ရင်ဆိုင်ရမယ့်ပွဲမတိုင်ခင် နယ်သာလန်သားက အသက် ၆၁ နှစ်သားဟာ အောင်မြင်သူလို့ ချီးကျူးခဲ့ပါတယ်။
အင်တာဗျူးတစ်ခုမှာ တန်ဟက်က “ဒီပွဲက ၂ သင်းစလုံးအတွက် ကြီးမားတဲ့ပွဲဖြစ်လာနိုင်ပါတယ်။ မော်ရင်ဟိုလိုနည်းပြမျိုးနဲ့ ပြိုင်ဘက်အဖြစ် ရင်ဆိုင်ရမှာကို ကျွန်တော်တကယ်နှစ်သက်ပါတယ်။
သူက အမြဲတမ်းအသင်းကောင်းတွေမှာ ရှိနေတတ်ပါတယ်။ ပြီးတော့ သူက အောင်မြင်သူတစ်ဦးပါ။ ဆုဖလားအောင်မြင်မှုတွေလည်းအများကြီးရယူထားနိုင်ခဲ့ပါတယ်။ နည်းပြတွေအတွက် သူက ဥပမာကောင်းတစ်ယောက်ပါ။ သူနဲ့ရင်ဆိုင်ရမှာကို ကျွန်တော် စိတ်လှုပ်ရှားမိပါတယ်”လို့ ဖြေကြားခဲ့ပါတယ်။
တန်ဟက်ရဲ့ယူနိုက်တက်ဟာ စနေနေ့တုန်းက ၅ ပွဲဆက်နိုင်ပွဲပျောက်ဆုံးမှုကို အဆုံးသတ်နိုင်ခဲ့ပြီး ဘရန့်ဖို့ဒ်ကို ၂-၁ နဲ့အနိုင်ရခဲ့ပါတယ်။ လာမယ့်ပရီးမီးယားလိဂ်ပွဲမတိုင်ခင် ယူနိုက်တက်ဟာ ကြားရက်မှာ ဖီနာဘာချီနဲ့ယူရိုပါလိဂ်ပွဲကန်ရမှာဖြစ်ပါတယ်။
