အီဒါဆန်က မန်စီးတီးအသင်းအနေဖြင့် ပက်ဂွါဒီယိုလာနေရာဆက်ခံမယ့်သူကို ရှာဖွေနိုင်မယ်လို့ ယုံကြည်နေပြီး စပိန်သားဦးဆောင်မှုကာလလွန်မြောက်ချိန်တွေမှာလည်း အောင်မြင်မှုတွေ ရှာဖွေနိုင်ဦးမယ်လို့ အသင်းအပေါ် ထောက်ခံအားပေးလိုက်ပါတယ်။
မန်စီးတီးအတွက် မကြုံစဖူးအောင်မြင်မှုတွေ ရယူပေးနိုင်ခဲ့တဲ့ စပိန်သားက လာမယ့်နွေရာသီမှာ အသင်းနဲ့ စာချုပ်သက်တမ်းပြည့်မြောက်ဖို့ရှိနေပြီး အခုအချိန်အထိ စာချုပ်သစ်မှာ လက်မှတ်ရေးထိုးထားခြင်း မရှိသေးပါဘူး။ လတ်တလောမှာတော့ ဂိုးသမားအီဒါဆန်က ဘာစီလိုနာနည်းပြဟောင်း ထွက်ခွာသွားချိန် အောင်မြင်မှုတွေ ဆက်လက်ရယူနိုင်ဖို့ လက်ရှိလမ်းကြောင်းအတိုင်း ဆက်လက်လျှောက်လှမ်းသွားရန် အသင်းကို ထောက်ခံအားပေးလိုက်ပါတယ်။
TNT Sports Brazil နဲ့တွေ့ဆုံချိန် အီဒါဆန်က “မန်စီးတီးအသင်းဖွဲ့စည်းတည်ဆောက်ထားပုံက အလွန်ကောင်းမွန်ပြီး စီမံခန့်ခွဲမှုစနစ်ကောင်းတွေ၊ ဒါရိုက်တာကောင်းတွေ၊ စီအီးအိုကောင်းတွေ ပိုင်ဆိုင်ထားပါတယ်။ ကလပ်အသင်းဘက်က နောက်လာမယ့်နည်းပြသစ် ဘယ်သူဖြစ်မလဲဆိုတာ စိတ်ထဲမှာ ဆုံးဖြတ်ပြီးနေပြီလို့ ကျွန်တော်ယုံကြည်ထားပါတယ်။ ပက်ဂွါဒီယိုလာထွက်ခွာမယ့်အချိန်မှာလည်း အသင်းဘက်က လက်ရှိလမ်းကြောင်းအတိုင်း ဆက်လက်လျှောက်လှမ်းသွားမယ်လို့ ယုံကြည်ထားပါတယ်။
ပက်ဂွါဒီယိုလာထွက်ခွာမယ်ဆိုရင် ကြီးမားတဲ့ဆုံးရှုံးမှုတစ်ခုဖြစ်လာလိမ့်မယ်ဆိုတာ အမှန်တရားပါပဲ။ ကျွန်တော်တို့တွေက ကမ္ဘာ့အကောင်းဆုံးနည်းပြတစ်ဦးအကြောင်း ဆွေးနွေးနေတာပါ။ ဒါပေမယ့် ပက်ဂွါဒီယိုလာခေတ်လွန်ကာလအတွက်လည်း အမှန်တကယ်ကောင်းကောင်းပြင်ဆင်ထားတဲ့ ကလပ်အသင်းတစ်ခုကို မြင်တွေ့နေရပါတယ်”လို့ ပြောပါတယ်။
မန်စီးတီးက ၂၀၁၆ ခုနှစ်၊ ပက်ဂွါဒီယိုလာရောက်ရှိလာပြီးနောက်ပိုင်း ဆုဖလားအောင်မြင်မှုများစွာ ဆွတ်ခူးနိုင်ခဲ့ပါတယ်။ စာချုပ်သက်တမ်းတိုးဖို့ကိစ္စ ရပ်တန့်နေပေမယ့် မကြာမီကာလအတွင်း စာချုပ်သစ်တစ်ရပ်ကို ဘိုင်ယန်မြူးနစ်ဟောင်း လက်မှတ်ရေးထိုးသွားလိမ့်မယ်လို့လည်း သတင်းတွေမှာ ဖော်ပြနေပါတယ်။ ဒါက ပြိုင်ဘက်ပရီးမီးယားလိဂ်ကလပ်အသင်းတွေအတွက် သတင်းဆိုးတစ်ခု ဖြစ်ကောင်းဖြစ်နိုင်ပါတယ်။
မန်စီးတီးနည်းပြဘဝအနာဂတ်နဲ့ပတ်သက်ပြီး ကောလာဟလပေါင်းစုံထွက်ပေါ်နေပေမယ့် ပက်ဂွါဒီယိုလာနဲ့ အီဒါဆန်တို့ကတော့ လာမယ့်တနင်္ဂနွေနေ့၊ ဝုဗ်နဲ့ရင်ဆိုင်ရမယ့် ပရီးမီးယားလိဂ်အဝေးကွင်းပွဲစဉ်အတွက် ပြင်ဆင်မှုတွေ လုပ်ဆောင်နေပါလိမ့်မယ်။ လတ်တလောမှာ မန်စီးတီးက အမှတ်ပေးဇယားဦးဆောင်သူ လီဗာပူးရဲ့နောက်၊ ဒုတိယနေရာမှာ ရပ်တည်နေပါတယ်။
