လီယွန်နယ်မက်ဆီက ၂၀၂၆ကမ္ဘာ့ဖလားမှာ ပါဝင်ကစားဖြစ်မလားဆိုတဲ့ မေးခွန်းအပေါ် အံ့အားသင့်စရာမှတ်ချက်မျိုးပေးသွားခဲ့ပါတယ်။
ဘိုလီဗီးယားနဲ့ပွဲစဉ်မှာ ဟက်ထရစ်သွင်းယူခဲ့တဲ့ မက်ဆီက ဒီပွဲစဉ်တွေဟာ လက်ရွေးစင်ကစားသမားဘ၀ နောက်ဆုံးပွဲတွေဖြစ်နိုင်ကြောင်း ဝန်ခံခဲ့ပါတယ်။
မနေ့ညက Marcaက ပြုလုပ်ခဲ့တဲ့ အမေရိကန် ဂန္တဝင်ဆုပေးပွဲမှာလည်း မက်ဆီက လာမယ့်ကမ္ဘာ့ဖလားမှာ ပါဝင်ကစားဖြစ်မလားဆိုတာ သူ့ရဲ့ပျော်ရွှင်မှုအပေါ်မှာပဲ မူတည်ပါတယ်လို့ ပြောခဲ့ပါတယ်။
မက်ဆီက “ကျွန်တော် ပျော်ရွှင်မယ့်အရာမျိုးကိုပဲ လုပ်လေ့ရှိပါတယ်။ ကျွန်တော်က ၂၀၂၆ကမ္ဘာ့ဖလားထက် ပျော်ရွှင်မှုကိုပဲ ပိုအလေးထားပါတယ်။ ကျွန်တော် ကမ္ဘာ့ဖလားမှာ ကစားဖို့ ရည်မှန်းချက်ထားထားတာမျိုး မရှိပေမယ့် နေ့စဉ် အကောင်းဆုံးနေနိုင်ဖို့ပဲ အာရုံစိုက်ထားပါတယ်။
ကမ္ဘာ့ဖလားနဲ့ပတ်သက်လို့ကတော့ စောင့်ကြည့်ရပါဦးမယ်။ ကျွန်တော် အချိန်ကိုကျော်ကြည့်တာမျိုးလုပ်လေ့မရှိပါဘူး။ ကျွန်တော်နေ့စဉ် ပျော်ပျော်နေဖို့ပဲ ကြိုးစားပါတယ်။ ကျွန်တော် ကောင်းကောင်းမွန်မွန်၊ ပျော်ပျော်ရွှင်ရွှင်နေရရင် ဒီခြေစွမ်းကို ဆက်ထိန်းထားနိုင်မယ်လို့ မျှော်လင့်ပါတယ်။”လို့ ပြောခဲ့ပါတယ်။
မနေ့က မက်ဆီဟာ Marcaက ပေးအပ်တဲ့ဆုကို ဇနီးသည် အန်တိုနယ်လာနဲ့အတူ တက်ရောက်ရယူသွားခဲ့ပါတယ်။
