လီဗာပူးရဲ့နွေရာသီတွင် ကစားသမားမခေါ်ယူခဲ့ခြင်းအပေါ် နည်းပြ စလော့က ကာကွယ်ပြောကြားလိုက်ပါတယ်။ ကာရာဘောင်ဖလားပြိုင်ပွဲတွင် ဝက်စ်ဟမ်းအား ၅-၁ ဂိုးဖြင့်အနိုင်ရရှိခဲ့တဲ့အကြောင်း နယ်သာလန်နိုင်ငံသားက ချီးကျူးပြောကြားထားပြီး ဒီလိုမျိုး ဂိုးပြတ်အနိုင်ရရှိမှုဟာ အပြောင်းအရွှေ့ဈေးကွက်တွင် ငြိမ်သက်စွာနေခဲ့မှုကြောင့် ဖြစ်ပါတယ်လို့ အရိပ်အမြွက်ပြောကြားလိုက်ပါတယ်။
အန်ဖီးလ်မှာ ကစားခဲ့တဲ့ပွဲမှာ ပွဲထွက်ကစားသမား ၉ ဦးအထိ အပြောင်းအလဲလုပ်ခဲသော်လည်း လီဗာပူးက အနိုင်ရရှိခဲ့တာဖြစ်ပါတယ်။ ကွန်ဆက်ရဲ့ ကိုယ့်ဂိုးကိုယ်သွင်းမှုကြောင့် ဝက်စ်ဟမ်းက ဦးဆောင်ဂိုးရရှိခဲ့သော်လည်း ချီယေဆာရဲ့ ဖန်တီးမှုကနေ ဂျိုတာက ချေပဂိုး ပြန်သွင်းနိုင်ခဲ့ပါတယ်။
ဂျိုတာကပဲ ကာတစ်ဂျုံးစ်ရဲ့ ဖန်တီးပေးပို့မှုကနေ ဒုတိယဂိုးကို သွင်းခဲ့သလို လူစားဝင်ကစားသမား ဆာလတ်ရဲ့သွင်းဂိုးကိုလည်း ဂျုံးစ်ကပဲ ဖန်တီးပေးခဲ့တာဖြစ်ပါတယ်။ ပွဲကစားချိန် ၇၆ မိနစ်မှာတော့ ဆာလတ်ကို ကစားပုံကြမ်းတမ်းခဲ့တဲ့ အက်ဒီဆင်အဲလ်ဗက်ဇ်က အနီကဒ်ပြထုတ်ပယ်ခြင်းခဲ့ရပါတယ်။ ပွဲပြီးခါနီးအချိန်မှာ ဂတ်ပိုက ခြေစွမ်းပြသပြီး လီဗာပူးအတွက် ၂ ဂိုးသွင်းယူပေးခဲ့ပါတယ်။
ကစားသမားများအပြားကို အပြောင်းအလဲလုပ်ခဲ့သော်လည်း အနိုင်ရရှိခဲ့ကြောင်း စလော့က ထောက်ပြခဲ့ကြောင်း the Mirror က ဖော်ပြထားပါတယ်။
“နွေရာသီတစ်ခုလုံးမှာ ကစားသမားသစ်တွေအကြောင်း ကျွန်တော့်ကိုမေးကြပါတယ်။ အဲ့ဒီလိုမေးတိုင်း အသင်းမှာ အရည်အသွေးရှိ ကစားသမားဘယ်လောက်များများရှိသလဲလို့ ပြန်ဖြေခဲ့ပါတယ်။ အခုဆိုအားလုံးသိမယ်ထင်ပါတယ်။ ကစားသမားသစ်တွေရောက်ခဲ့ရင်တောင် တစ်ဦးချင်းစွမ်းဆောင်ရည်ကောင်းမပြသနိုင်ဘူးဆိုရင် အသင်းအတွက်က ခက်ခဲနေအုံးမှာဖြစ်ပါတယ်” လို့ ပြောထားပါတယ်။
ပေါင် ၁၂.၅ သန်းဖြင့်ခေါ်ယူခဲ့တဲ့ ချီယေဆာတစ်ဦးတည်းသာ လီဗာပူးရဲ့ နွေရာသီခေါ်ယူခဲ့သူဖြစ်ခဲ့ပါတယ်။ အီတလီနိုင်ငံသားဟာ လက်ရှိရာသီအတွက် ပထမဆုံးပွဲထွက်မှုကို ဝက်စ်ဟမ်းနှင့်ပွဲမှာ ရရှိခဲ့ပြီး ဆာလတ်နှင့်လူစားမလဲမီ မိနစ် ၆၀ လောက် ကစားခဲ့ရတာဖြစ်ပါတယ်။
“သူ့အနေနဲ့ မိနစ် ၆၀ လောက်ကစားနိုင်ခဲ့တာကို သဘောကျမိပါတယ်။ ဘာကြောင့်လဲဆိုတော့ သူဟာမကစားရတာ ကြာပြီမို့ပါ”
“ပြီးခဲ့တဲ့ ၃ လ ၄ လအတွင်း သူဟာ အချိန်အကြာကြီး မကစားခဲ့ရသူဖြစ်ပါတယ်။ ဒါကြောင့် သူ့အတွက် ပွဲကစားချိန်တွေ ပိုမိုရရှိဖို့ကလည်း အရေးကြီးပါတယ်” လို့ နည်းပြက ပြောပါတယ်။
