မန်ချက်စတာစီးတီးကွင်းလယ်ကြယ်ပွင့် ကယ်ဗင်ဒီဘရိုင်းဟာ ယနေ့နံနက်က အင်တာမီလန်နဲ့ယှဉ်ပြိုင်ခဲ့တဲ့ ချန်ပီယံလိဂ်အဖွင့်ပွဲစဉ်မှာ ဒဏ်ရာပြဿနာကြုံတွေ့ခဲ့တာကြောင့် လာမယ့်တနင်္ဂနွေနေ့ အာဆင်နယ်နဲ့ရင်ဆိုင်သွားရမယ့် ပရီးမီးယားလိဂ်ပွဲစဉ်ကို လွဲချော်သွားနိုင်ချေရှိတယ်လို့ သိရပါတယ်။
ယခုပွဲစဉ်မှာ မန်စီးတီးနဲ့ အင်တာမီလန်တို့ ပွဲချိန်တစ်လျှောက် အကြိတ်အနယ်ယှဉ်ပြိုင်ကစားခဲ့ကြပေမယ့် နှစ်သင်းစလုံး ဂိုးသွင်းယူနိုင်ခဲ့ခြင်းမရှိဘဲ ၀-၀ ဆိုတဲ့ သရေရလဒ်သာထွက်ပေါ်ခဲ့ပြီး ဒီဘရိုင်းကလည်း ဒဏ်ရာပြဿနာကြောင့် ပထမပိုင်းအပြီးမှာကတည်းက လူစားလဲခံခဲ့ရတာဖြစ်ပါတယ်။
ဘယ်လ်ဂျီယံလက်ရွေးစင်ကစားသမးရဲ့ ဒဏ်ရာနဲ့ပတ်သက်ပြီး ပွဲအပြီးမှာ နည်းပြကြီး ပက်ဂွါဒီယိုလာက “သူ ဘယ်နေရာဒဏ်ရာရသွားလဲ ကျွန်တော်မသိပါဘူး။ အခုထိ ဆေးအဖွဲ့နဲ့စကားမပြောရသေးလို့ပါ။ ဒီည ဒါမှမဟုတ် မနက်ဖြန်မှာ အကဲဖြတ်သွားမှာပါ။ မနက်ဖြန်ကျရင်တော့ သေသေချာချာသိရပါမယ်” လို့ပြောကြားခဲ့ပါတယ်။
ယခုပွဲစဉ်မှာ မန်စီးတီးက အိမ်ကွင်းအားသာချက်နဲ့ အင်တာမီလန်ကို ဖိဖိစီးစီးကစားနိုင်ခဲ့ပြီး အခွင့်အရေးကောင်းတွေအများအပြားဖန်တီးနိုင်ခဲ့ပေမယ့် စိတ်ပျက်စရာကောင်းစွာပဲ တစ်ဂိုးမှမသွင်းနိုင်ခဲ့ဘဲ အဖွင့်ပွဲမှာ သရေရလဒ်သာ ရယူနိုင်ခဲ့တာဖြစ်ပါတယ်။ သို့သော်လည်း ဂွါဒီယိုလာကတော့ ခက်ခဲတဲ့ပြိုင်ဘက်တွေနဲ့ သရေကျခဲ့တဲ့အပေါ် ကျေနပ်မိတယ်လို့ ဆိုပါတယ်။
စပိန်သားက “ကျွန်တော်တို့က အလွန့်အလွန်ခက်ခဲတဲ့အသင်းတစ်သင်းနဲ့ ရင်ဆိုင်ခဲ့ရတာပါ။ သူတို့က အီတလီချန်ပီယံတွေဖြစ်ပြီး အစိတ်အပိုင်းတိုင်းကလည်း အဆင့်အတန်းမြင့်ပါတယ်။ အသင်းရဲ့ကစားပုံကို ကျွန်တော်ကျေနပ်ပါတယ်။ ဒီနေ့ကစားခဲ့တဲ့ မိနစ်တိုင်းကို ကျေနပ်ပါတယ်။ နောက်ထပ် ၇ ပွဲကျန်ပါသေးတယ်။ ဘာတွေဖြစ်လာမလဲ စောင့်ကြည့်ကြတာပေါ့” လို့ပြောကြားခဲ့ပါတယ်။
ဂွါဒီယိုလာဟာ လာမယ့်နှစ်နွေရာသီမှာ မန်စီးတီးနဲ့ စာချုပ်သက်တမ်းကုန်ဆုံးမှာဖြစ်ပေမယ့် အခုထိ စာချုပ်သက်တမ်းတိုးမြှင့်ဖို့ သတင်းမထွက်သေးတာကြောင့် အီတီဟတ်မှာ ကာလရှည်ဆက်ရှိနေဖို့ မသေချာတဲ့အခြေအနေမှာရှိနေပါတယ်။ အင်တာမီလန်နဲ့ပွဲစဉ်မတိုင်မီမှာ အီတလီသတင်းထောက်တစ်ဦးက ဂွါဒီယိုလာကို အီတလီကလပ်တစ်ခုခုကိုကိုင်တွယ်ဖို့ရှိမရှိမေးမြန်းခဲ့ရာ “ကျွန်တော်အီတလီကိုကြိုက်ပါတယ်။ ဒါပေမယ့် မန်စီးတီးမှာနေရတာလည်းကြိုက်ပါတယ်။ အင်္ဂလိပ်ဘောလုံးက စိတ်ဝင်စားစရာကောင်းလို့ပါ။ မန်စီးတီးက အသင်းကြီးတစ်သင်းပါ။ ဒီမှာနေရတာပျော်တယ်။ ဒီအသင်းကိုချစ်တယ်” လို့ပြန်လည်ဖြေကြားခဲ့ပါတယ်။
ယခုပွဲစဉ်မှာ အင်တာမီလန်ကစားသမားတွေဖြစ်တဲ့ ဒါမီယန်နဲ့ မစ်ခီတာရန်တို့က အပိုင်အခွင့်အရေးကိုယ်စီရခဲ့ကြပေမယ့် အံ့အားသင့်စရာကောင်းလောက်အောင် လွဲချော်ခဲ့တာကြောင့် နည်းပြကြီး အင်ဇာဂီက “ကျွန်တော် ဒါမီယန်ကို မင်းအခု ကစားနေတာ ဘယ်အသင်းမှာလဲ လို့မေးခဲ့ပါတယ်။ သူကလည်း ဆင်ခြေတွေပြန်ပေးခဲ့တာပေါ့။ မစ်ခီတာရန်ရဲ့လွဲချော်မှုက ပိုစိတ်ပျက်စရာကောင်းပါတယ်။ ကျွန်တော်က ဂိုးပြီလို့ သေချာပေါက်ထင်ခဲ့ပေမယ့် မဂိုးခဲ့လို့ စိတ်ပျက်လက်ပျက်ဖြစ်ခဲ့ရပါတယ်။ ဒါပေမယ့် ပွဲအပြီးမှာတော့ သူတို့ရဲ့စွမ်းဆောင်ရည်ကို ချီးကျူးခဲ့ပါတယ်။ တစ်သင်းလုံး ကောင်းခဲ့ပါတယ်။ ဒါကြောင့် အားလုံးကို ဒီပုံစံအတိုင်းပဲ ဆက်ကစားဖို့တောင်းဆိုထားပါတယ်။ မန်စီးတီးက ဘယ်လိုအသင်းလဲဆိုတာ ကျွန်တော်လည်း ကောင်းကောင်းသိပါတယ်” လို့ပြောကြားခဲ့ပါတယ်။
ယခုသီတင်းပတ်အကုန်မှာ အင်တာမီလန်ကလည်း ခက်ခဲတဲ့ ပွဲစဉ်အဖြစ် ဒါဘီပြိုင်ဘက် အေစီမီလန်ကို အိမ်ကွင်းမှာ လက်ခံယှဉ်ပြိုင်သွားရမှာဖြစ်ပါတယ်။
