ဒီနေ့မနက်ပိုင်း၊ စီးရီးအေပွဲစဉ်အဖြစ် ဘိုလော့ဂ်နာကို ၃-၀ ဂိုးဖြင့် အနိုင်ယူခဲ့ပြီးနောက် နာပိုလီနည်းပြကွန်တီ အားရကျေနပ်နေခဲ့ပါတယ်။
အခုပွဲစဉ်မှာ ဂျီအိုဗန်နီဒီလော်ရန်ဇို၊ ခဗာရက်စ်ခီလီယာ၊ ဂျီယိုဗန်နီဆီမြွန်နီတို့က နာပိုလီအတွက် သွင်းဂိုးတွေ ရယူပေးခဲ့ပါတယ်။
DAZN သတင်းဌာနနဲ့တွေ့ဆုံချိန် ကွန်တီက “ ပြီးခဲ့တဲ့ဘောလုံးရာသီမှာ ချန်ပီယံလိဂ်ဝင်ခွင့်ရရှိထားတဲ့ ဘိုလော့ဂ်နာလို စုစည်းမှုအရမ်းကောင်းတဲ့ ပြိုင်ဘက်နဲ့ရင်ဆိုင်ရချိန် အသင်းရဲ့စိတ်ဓါတ်ပိုင်းကို ကျွန်တော် အရမ်းသဘောကျပါတယ်။ ကျွန်တော်တို့တွေ အရမ်းကောင်းတဲ့အသင်းတစ်ခုကို အနိုင်ရရှိခဲ့တာပါ။ ဒါကြောင့် ကျွန်တော်တို့တွေ မိမိကိုယ်ကို ယုံကြည်မှုရှိပြီး စည်းလုံးမှုရှိရင် အရာအားလုံးကို ကျော်ဖြတ်သွားနိုင်မယ်ဆိုတာ တွေးမြင်သဘောပေါက်ထားသင့်ပါတယ်။
အနိုင်သုံးမှတ်အပြင် အလွန်အရေးပါတဲ့ နိုင်ပွဲတစ်ခု ဖြစ်ပါတယ်။ ဘာကြောင့်လဲဆိုတော့ ကျွန်တော်တို့တွေ အိမ်ကွင်းနိုင်ပွဲမရရှိတာ အတော်လေးကြာမြင့်နေခဲ့ပါပြီ။ အိမ်ကွင်းပရိသတ်ကြီးကိုလည်း အသင်းရဲ့ ၁၂ ယောက်မြောက်ကစားသမားဖြစ်လာဖို့ ကျွန်တော် တိုက်တွန်းခဲ့ပါတယ်။ သူတို့ကပဲ ကျွန်တော်တို့အတွက် အခြေခံအုတ်မြစ်ဖြစ်လာပါတယ်။
ကောင်လေးတွေကလည်း သူတို့ရဲ့အရည်အသွေးတွေကို ကျော်လွန်ကာ ပြိုင်ဘက်ကို သတ္တိရှိရှိရင်ဆိုင်ခဲ့ပါတယ်။ ဒါကပဲ ကျွန်တော်တို့အသင်းပရိသတ်တွေ မြင်တွေ့ချင်တဲ့အရာ ဖြစ်ပါတယ်။
ဗီရိုနာနဲ့ပွဲစဉ်၊ ဒုတိယပိုင်းပွဲချိန်တွေမှာ အလွန်ဆိုးရွားတဲ့စွမ်းဆောင်ရည်ပြသထားခဲ့တာကြောင့် အခုပွဲစဉ်မှာ Clean Sheet ရရှိတာကလည်း အထူးအရေးကြီးပါတယ်။ အထူးသဖြင့် ကျွန်တော်တို့တွေ ဗီရိုနာကွင်းတွင်းမှာ ပိတ်မိနေခဲ့ပြီး နာကျင်စရာပေးဂိုးသုံးဂိုးကို ခွင့်ပြုပေးခဲ့ရပါတယ်။
လက်သီးနဲ့ မျက်နှာကို ခပ်ပြင်းပြင်းထိုးလိုက်သလိုမျိုး ခံစားခဲ့ရပါတယ်။ အခုသီတင်းပတ်အတွင်းမှာလည်း အတိတ်ကိုထားခဲ့ပစ်နိုင်ဖို့ဆိုရင် အတိတ်ထဲကနေ ထွက်လာဖို့ လိုအပ်တယ်လို့ ကျွန်တော် ပြောခဲ့ပါသေးတယ်။ ကြိုးဝိုင်းထဲမှာ ရပ်တည်ပြီး လက်သီးချက်တွေကို ကြံ့ကြံ့ခံရမှာဖြစ်သလို ကိုယ်ကလည်း ပြန်လည်ထိုးနှက်နိုင်ရပါမယ်”လို့ ပြောပါတယ်။
ဆက်လက်ပြီး ကွန်တီက အခုပွဲစဉ်မတိုင်ခင် နေ့ရက်တွေအကြောင်း ပြောပြခဲ့ပါတယ်။
“ကျွန်တော် အမြဲပြောခဲ့သလိုပါပဲ၊ ကျွန်တော်က ဒီကစားသမားတွေအပေါ် ယုံကြည်မှုအပြည့်ရှိပြီး ကစားသမားအများစုကို နာပိုလီအသင်းအတွက် ဆက်ရှိနေပေးဖို့ လိုလားခဲ့ပါတယ်။ သူတို့တွေ အပြင်းအထန် လေ့ကျင့်ကြပါတယ်။ ဗီရိုနာနဲ့ပွဲစဉ်အပြီးမှာ ကစားသမားတွေက သူတို့ကိုယ်သူတို့ တစ္ဆေသရဲတွေလို ပြန်မြင်နေခဲ့တာကြောင့် ပထမဆုံး ကျွန်တော် စိတ်ပျက်လက်ပျက်ဖြစ်ခဲ့ရပါတယ်။
တကယ့်ကို ခက်ခဲလွန်းတဲ့ ရက်သတ္တပတ်တစ်ခုပါ။ ဒါပေမယ့် ကျွန်တော်တို့တွေ ပိုပြီးတော့ စည်းလုံးညီညွှတ်အောင် လုပ်ဆောင်နိုင်ခဲ့ပါတယ်။ တစ်ဦးချင်းအနေနဲ့ ခရီးပေါက်အောင် မသွားနိုင်ပေမယ့် အတူတကွစုစည်းလုပ်ဆောင်မယ်ဆိုရင် ကြီးမြတ်တဲ့အရာတွေကို ဆွတ်ခူးနိုင်ပါတယ်။ ဒါက ကျွန်တော့်ရဲ့နာပိုလီနည်းပြဘဝမှာ ပထမဆုံးသုံးမှတ်ဖြစ်ပါတယ်။ ဒီအတွက် စိတ်လှုပ်ရှားမိပါတယ်။ ဒီလိုခံစားချက်တွေက ကိုယ့်ကို ရှေ့ဆီတွန်းပို့ပေးနေမှာဖြစ်လို့ အခုလိုပျော်ရွှင်မှုမျိုးကို ကျွန်တော်တို့နဲ့အတူ ဆောင်ကြဉ်းထားရပါမယ်”လို့ ကွန်တီက ဆိုပါတယ်။
