ရီးရဲလ်မက်ဒရစ်အသင်းအတွက် သူ့ရဲ့လာလီဂါအဖွင့်ဂိုးသွင်းယူပေးနိုင်ဖို့ စောင့်ဆိုင်းနေရတဲ့ အမ်ဘာပေကို တိုက်စစ်ပိုင်းမှာ လွတ်လွတ်လပ်လပ်ကစားခွင့်ပေးထားပါတယ်လို့ အန်ဆယ်လော့တီက ပြောဆိုလိုက်ပါတယ်။
တနင်္ဂနွေနေ့ညပိုင်း၊ ဗယ်လာဒိုးလစ်ကို ၃-၀ ဂိုးဖြင့် အနိုင်ရရှိတဲ့ပွဲစဉ်မှာ အမ်ဘာပေက ရီးရဲလ်မက်ဒရစ်အသင်းရဲ့ ဗဟိုတိုက်စစ်မှူးအဖြစ် တာဝန်ယူခဲ့ရပါတယ်။ အခုပွဲစဉ်မှာ ဂိုးပေါက်ကန်သွင်းမှု လေးကြိမ်ပြုလုပ်ခဲ့ပြီး တစ်ကြိမ်သာ ဂိုးပေါက်တည့်ခဲ့တဲ့ ပြင်သစ်ကြယ်ပွင့်အနေဖြင့် ဂိုးသွင်းယူနိုင်ဖို့ အခက်တွေ့နေခဲ့ပါတယ်။ ပွဲချိန် ၈၇ မိနစ်မှာတော့ အသက်-၁၈ နှစ်အရွယ်တိုက်စစ်မှူး အန်းဒရစ်ခ်က သူ့နေရာမှာ လူစားဝင်လာခဲ့ပြီး မကြာခင်မှာပဲ ရီးရဲလ်မက်ဒရစ်အတွက် အပိတ်ဂိုးကို သွင်းယူခဲ့ပါတယ်။
ရီးရဲလ်မက်ဒရစ်ကစားသမားဘ၀ ပထမဆုံးပြိုင်ပွဲအသွင်ပွဲစဉ်အဖြစ် အတ္တလန္တာနဲ့ရင်ဆိုင်ရတဲ့ ဥရောပစူပါဖလားဗိုလ်လုပွဲမှာ အသင်းအတွက် ဂိုးသွင်းယူပေးနိုင်ခဲ့တဲ့ အမ်ဘာပေက အခုအချိန်အထိတော့ လာလီဂါသွင်းဂိုး မရရှိသေးပါဘူး။
သတင်းစာရှင်းလင်းပွဲတစ်ခုအတွင်း အထောင်တိုက်စစ်မှူးအဖြစ် ကစားနေရခြင်းကြောင့် အသက်-၂၅ နှစ်အရွယ်ကစားသမားအတွက် ခြေစွမ်းပြသနိုင်ဖို့ အဟန့်အတားဖြစ်စေသလားဆိုတဲ့ မေးခွန်းတွေ အန်ဆယ်လော့တီဆီ ရောက်ရှိလာခဲ့ပါတယ်။ အီတာလျံနည်းပြကြီးကတော့ ပြင်သစ်သားဟာ သေချာပေါက် ဂိုးပေါက်ရှာတွေ့ပါလိမ့်မယ်လို့ ထောက်ခံအားပေးခဲ့ပါတယ်။
အန်ဆယ်လော့တီက “ No.9 နေရာမှာ ကစားနေရလို့ အမ်ဘာပေ ဒုက္ခများနေစရာအကြောင်း လုံးဝမရှိပါဘူး။ သူက လက်ဖျားခါလောက်စရာကောင်းအောင် လျှင်မြန်တဲ့တိုက်စစ်မှူးဖြစ်ပြီး ဘောလုံးမရှိထားချိန်မှာလည်း အလွန်ကောင်းမွန်တဲ့ရွေ့လျားမှုတွေ လုပ်ဆောင်နိုင်ပါတယ်။ သူက နေရာလွတ်တွေကို တိုက်ခိုက်နိုင်စွမ်းရှိပါတယ်။ ဒီနေ့မှာလည်း အမ်ဘာပေကိုယ်တိုင် အခွင့်အရေးသုံးကြိမ်၊ လေးကြိမ်လောက် ရရှိခဲ့ပါတယ်။ ဘယ်နေရာမှာ ကစားရတာပဲဖြစ်ဖြစ် အရင်တုန်းကလိုပဲ သူ ဂိုးတွေသွင်းယူနိုင်ပါလိမ့်မယ်”လို့ ပြောပါတယ်။
ကမ္ဘာ့ဖလားဆုရှင်အနေဖြင့် လာမယ့်ကြာသပတေးနေ့၊ လက်စ်ပါးမားနဲ့ရင်ဆိုင်ရမယ့် လာလီဂါပွဲစဉ်မှာ ရီးရဲလ်မက်ဒရစ်အတွက် ပါဝင်ကစားပေးသွားလိမ့်မယ်လို့ ယူဆရပါတယ်။ သူတို့တွေက နောက်သုံးရက်အကြာမှာပဲ ဘာနေဗျူးမှာ ဘက်တစ်ကို ဧည့်ခံကစားရပါမယ်။
