အာဆင်နယ် အသင်း ရဲ့ နောက်ခံလူ ဆလီဘာ ဟာ ဩစတီးယား အသင်း နဲ့ ကစားရမယ့် ပြင်သစ် အသင်း ရဲ့ ယူရို အဖွင့်ပွဲမှာ အူပါမီကာနို နဲ့ အတူ ပွဲထွက် ကစားမှာ ဖြစ်တယ်လို့ L’Equipe က ရေးသား ဖော်ပြ လာခဲ့ပါတယ် ။
အစောပိုင်းမှာ ပြင်သစ် နည်းပြ ဒေးရွမ့်ဟာ ဆလီဘာ အစား အူပါမီကာနို နှင့် ကိုနာတေး အတွဲအဖက် ကို အသုံးပြုမယ်လို့ သတင်းတွေ ထွက်ခဲ့ပေမယ့် ဆလီဘာ ရဲ့ နောက်ဆုံး ကစားခဲ့တဲ့ ခြေစမ်းပွဲ စွမ်းဆောင်ရည်ကြောင့် ပွဲထွက် ကစားသမား ဖြစ်လာတာလည်း ဖြစ်ပါတယ် ။
ပြင်သစ် နည်းပြ ဒေးရွမ့် ကလည်း The Athletic FC နဲ့ အင်တာဗျုးမှာ ဆလီဘာ နဲ့ ပတ်သက်ပြီး ” သူက ပရီးမီးယားလိဂ် ရဲ့ အကောင်းဆုံးသော နောက်ခံလူတွေထဲက တစ်ဦးပါ ။ အာဆင်နယ် မှာ သူ ကောင်းကောင်း လုပ်ပြ နိုင်ခဲ့သလိုမျိုး ဒီမှာလည်း ထပ်လုပ်ပြစေချင်ပါတယ် ၊ သူက တကယ့်ကိုကောင်းမွန်တဲ့ ဘောလုံး ရာသီတစ်ခုကို ပိုင်ဆိုင် နိုင်ခဲ့သူလည်း ဖြစ်ပါတယ် ။ ”
” သူ့ရဲ့တွဲဖက် ဂါဘရီရယ် နဲ့လည်း ပွဲတွေ အများကြီး အတူ ကစားခဲ့ပါတယ် ။ အာဆင်နယ် အသင်း ဒီရာသီ စွမ်းဆောင်ပြခဲ့တာတွေမှာ သူတို့ နှစ်ဦးက အခရာ ကျခဲ့ပါတယ် ၊ ခံစစ် စွမ်းဆောင်ရည် အပိုင်းမှာပေါ့ ။ ကျနော်တို့ အသင်းမှာတော့ သူ အာဆင်နယ် မှာလို ပွဲများများ ကစားခွင့် မရ ဖြစ်နေတာ မှန်ပါတယ် ။ ”
” ပွဲတွေ အများကြီး ကစားမှပဲ တိုးတက်မှုတွေ ပိုရှိလာပြီးအသင်းဖော်တွေနဲ့လည်း အလိုအလျောက် နားလည်မှုတွေ ပိုရလာမှာပါ ။ နိုင်ငံ အသင်းမှာက အချိန် သိပ်မရပါဘူး ၊ အခုတော့ သူတို့က ရက်သတ္တပတ် အနည်းငယ်လောက် အတူ ယှဉ်တွဲ ကစားထားပြီးပြီဆိုတော့ ကျနော်တို့ အတွက် ပိုတောင် ကောင်းလာပါပြီ ။ ” လို့ ပြောကြား သွားခဲ့ပါတယ် ။
