ချဲလ်ဆီး အသင်း ဟာ ယခုနှစ် နွေရာသီ အပြောင်းအရွှေ့ ဈေးကွက် အတွင်းမှာ ခြေလှမ်းသွက်သွက် နဲ့ အားဖြည့်မှုတွေ ပြုလုပ်နေပြီး ၊ စုစုပေါင်း ကစားသမားသစ် ၆ဦး အထိ တရားဝင် ခေါ်ယူထားပြီး ဖြစ်ပါတယ် ။ ဒီအထဲမှာ ခံစစ် အင်အား ဖြည့်တင်းဖို့ အတွက် ကစားသမားသစ် ၃ဦး အထိ ပါဝင်ခဲ့ပါတယ် ။
နိုက်စ် အသင်း နဲ့ ပီအက်စ်ဂျီ အသင်းတွေက ထွက်ခွာလာခဲ့တဲ့ ဗဟို ခံစစ်မှူး ၂ယောက် ဖြစ်တဲ့ မာလန်းဆား နဲ့ သီယာဂို ဆေးလ်ဗား တို့ဟာ ချဲလ်ဆီး ကို အလွတ် ပြောင်းရွှေ့ကြေး နဲ့ အသီးသီး ရောက်ရှိလာခဲ့ကြပေမယ့် ၊ ဆား ကတော့ ဒီ တရာသီ ကို အငှားထွက်ဦးမှာ ဖြစ်ပါတယ် ။
အသက် ၃၅ နှစ် အရွယ် သီယာဂို ဆေးလ်ဗား ကတော့ ချဲလ်ဆီး အသင်း နဲ့ စာချုပ် တနှစ် ချုပ်ဆိုနိုင်ခဲ့ပြီး ၊ ချဲလ်ဆီး အသင်း ရဲ့ ခံစစ် ကို ဦးစီးဦးဆောင် လုပ်ပေးဖို့ ရှိနေပါတယ် ။ ဒီနေရာမှာ ၎င်းဆီကနေ ချဲလ်ဆီး လူငယ် ကြယ်ပွင့် နောက်ခံလူတွေဟာ ပညာ နဲ့ အတွေ့အကြုံ များစွာ ရယူဖို့ အခွင့်အရေး တွေ ရှိနေကြပါတယ် ။
အထူးသဖြင့် ဥရောပ အတွေ့အကြုံ အလွန် နည်းပါးတဲ့ ခံစစ်မှူးတွေ ဖြစ်ကြတဲ့ ကတ်ဇူးမား ၊ အန်ဒရီယာစ် ခရစ်တန်ဆန် ၊ ဖီကာယို တိုမိုရီ ၊ အီသန် အမ်ပါဒူ တို့ဟာ သီယာဂို ဆေးလ်ဗား ဆီကနေ သင်ယူ လေ့လာဖို့ လိုအပ်နေပါတယ် ။
ဒီ အထဲမှာ အနာဂတ် မသေချာဆုံး ဖြစ်နေတဲ့ ခံစစ်မှူး က ဝေးလ်စ် လူငယ် ကြယ်ပွင့် အီသန် အမ်ပါဒူ လို့ ဆိုရပါမယ် ။ နဂို အရည်အသွေး နဲ့ အလားအလာကောင်းတွေကို ပိုင်ဆိုင်ထားတဲ့ အမ်ပါဒူ ဟာ ပြီးခဲ့တဲ့ ဘောလုံး ရာသီ တခုလုံးမှာ လစ်ပ်ဇစ် အသင်း သို့ အငှားနဲ့ သွားရောက် ကစားခဲ့ပေမယ့် ၊ တရာသီလုံးမှာ ဘယ်နှပွဲမှ သေသေချာချာ မကစားခဲ့ရပဲ ပြန်လာရပါတယ် ။
ဗဟို ခံစစ်မှူးတွေ အရမ်း များနေတဲ့ ချဲလ်ဆီး အသင်း မှာလည်း ဆယ်ကျော်သက် အရွယ်သာ ရှိသေးတဲ့ အမ်ပါဒူ ကို နည်းပြ ဖြစ်သူ ဖရန့် လမ်းပတ် က အရဲစွန့် အသုံးပြုဖို့ အလားအလာ အရမ်း နည်းနေပါတယ် ။ ဒီတော့ ၎င်းအနေနဲ့ အငှားပဲ ဆက်ထွက်မလား ၊ တခါတည်း အသင်း ပြောင်းမလား ဆိုတာ ဆုံးဖြတ်ဖို့ အချိန်တန်လာပြီပဲ ဆိုရပါမယ် ။
ဝေးလ်စ် လက်ရွေးစင် အသင်းမှာတော့ အမ်ပါဒူ ဟာ နေရာ တနေရာ ရနေဆဲ ဖြစ်ပေမယ့် ၊ ကလပ် အသင်း အဆင့်မှာ ရှိသင့်တဲ့ ကစားခွင့် အရေအတွက် မရရင် ၎င်းရဲ့ အနာဂတ် ကိုပါ ထိခိုက်နိုင်တာကြောင့် ၊ ချဲလ်ဆီး မှာ ဆက်ကစားဖို့ သင့်မသင့် ကို ဆုံးဖြတ်ဖို့ လိုတဲ့ အကြောင်း ဝေးလ်စ် လက်ရွေးစင် နည်းပြ ရိုင်ယန်ဂစ် က သတိပေး ပြောဆိုလာခဲ့ပါတယ် ။
ယနေ့ညမှာ ကစားမယ့် ဘူလ်ဂေးရီးယား အသင်း နဲ့ ဥရောပ နေရှင်လိဂ် အုပ်စု ဒုတိယပွဲ မတိုင်မီ သတင်းစာ ရှင်းလင်းပွဲမှာ ရိုင်ယန်ဂစ် က ” သီယာဂို ဟာ အရည်အသွေးမြင့် ဗဟို ခံစစ်မှူး တယောက် ဖြစ်ပြီး ၊ ခင်ဗျားတို့ဟာ သူ့လို ကစားသမား ဆီကနေ အများကြီး သင်ယူလို့ ရပါတယ် ။ ”
” ကျွန်တော် ဟာ အခု လက်ရွေးစင် အသင်း မှာ ကစားခွင့် ရနေတဲ့ အသင်းသားတိုင်း ကို သက်ဆိုင်ရာ ကလပ်တွေမှာ ပုံမှန် ကစားခွင့် ရစေချင်ပါတယ် ။ ဒါပေမယ့် တခါတလေကျရင် ဒါက အဓိက အကြောင်းအရာ မဟုတ်ပြန်ပါဘူး ။ ”
” သူတို့တွေဟာ ထိပ်တန်း ကလပ်တွေမှာ ရှိနေတဲ့ အခါ ထိပ်တန်း ကစားသမားတွေရဲ့ ဝန်းရံခြင်း ကို ခံရပြီး ၊ ဒီအတောအတွင်း ကိုယ့်ကိုယ်ကို တိုးတက်အောင် ကြိုးစားနေဖို့ ဖြစ်ပါတယ် ။ ဒါဟာ အဓိက ဟန်ချက် တခုပါ ။ ဒါပေမယ့် ခင်ဗျား ကိုယ်တိုင် ကလည်း ဒီလို အရည်အသွေးမြင့် ကစားသမားတွေနဲ့ တသင်းတည်း ရှိနေလို့ မပြီးပါဘူး ။ ”
” တကယ့် ပွဲတွေမှာ ကိုယ်တိုင် ကစားရမယ့် မိနစ်တွေ လိုအပ်ပါတယ် ။ ဒါဟာ အီသန် အတွက် ဆုံးဖြတ်ချက် ချဖို့ ဖြစ်ပါတယ် ။ ဒါနဲ့ ပတ်သက်ပြီး ကျွန်တော် သူနဲ့လည်း အများကြီး ဆွေးနွေး ပြောပြထားပြီးပါပြီ ။ မနှစ်ကတော့ သူဟာ ဒဏ်ရာ ပြဿနာ တချို့ နဲ့ ရင်ဆိုင်ခဲ့ရလို့ ပွဲကစားခွင့် ရမယ့် အခြေအနေ တွေက အနည်းငယ် ကွဲပြားကောင်း ကွဲပြားခဲ့မှာပါ ။ ”
” ဒါပေမယ့် ခင်ဗျား ဟာ အီသန် ရဲ့ ခြေစွမ်း ဘယ်လောက်အထိ ထက်မြက်မှု ရှိသလဲ ဆိုတာ လန်ဒန်မှာ ကစားခဲ့တဲ့ တော့တင်ဟမ် နဲ့ ချန်ပီယံလိဂ် ၁၆ သင်း အဆင့် ပထမ အကျော့ ပွဲမှာ တွေ့မြင်ရမှာပါ ။ ဘယ်အရာမှ သူ့ကို တားဆီးလို့ မရပါဘူး ။ သူ့အဖို့ ကြံ့ခိုင်မှု ပြည့်နေဖို့ပဲ လိုပါတယ် ။ ” လို့ ပြောကြားခဲ့ပါတယ် ။
