မန်ယူနိုက်တက်အသင်းသည် ဒေါ့မွန်အသင်းထံမှ ထိပ်တန်းပြောင်းရွှေ့ကြေးဖြင့် ခေါ်ယူထားသည့် အသင်း၏ အင်္ဂလန်လူငယ်ကြယ်ပွင့် တောင်ပံကစားသမား ဂျေဒင်ဆန်ချိုအား ရောင်းထုတ်ရန် စဉ်းစားနေသော်လည်း လျှော့စျေးဖြင့် ကမ်းလှမ်းမှုများကို လက်ခံမည်မဟုတ်ကြောင်း သိရှိ ရသည်။
ဂျေဒင်ဆန်ချိုသည် မန်ယူနိုက်တက်အသင်းသို့ ရောက်ရှိလာပြီးကတည်းက ခြေစွမ်းပြနိုင်ရန် ရုန်းကန်နေရသလို၊ လက်ရှိအချိန်တွင်လည်း နည်းပြ အဲရစ်တန်ဟက်ဂ်၏ အင်တာဗျူးတစ်ခုနှင့်ပတ်သက်၍ ပြန်လည် တုံ့ပြန်ခဲ့ရာမှ နည်းပြနှင့် ပြဿနာတက်ကာ အသင်း၏ပွဲစဉ်များတွင် ကစားခွင့်မရဖြစ်နေသည်။
မန်ယူနိုက်တက်အသင်းသည် ဆန်ချိုအား ရောင်းထုတ်လိုသော်လည်း အသက် (၂၃) နှစ်သာရှိသေးသည့် လူငယ်ကြယ်ပွင့်ကစားသမားအတွက် ထိပ်တန်းပြောင်းရွှေ့ကြေး အလိုရှိနေပြီး လျှော့စျေးဖြင့်ကမ်းလှမ်းမှုများကို စိတ်မဝင်စားကြောင်း သိရှိရသည်။
သို့ရာတွင် ဆန်ချိုသည် လက်ရှိ မန်ယူနိုက်တက်အသင်းတွင် တစ်ပတ်လုပ်ခ ပေါင် (၃)သိန်းအထိ ရရှိနေသူဖြစ်ပြီး မန်ယူနိုက်တက်အသင်း အနေဖြင့် အငှားချလျှင်ပင် ပမာဏအများအပြား စိုက်ထုတ်ပေးရမည် ဖြစ်သည့်အတွက် အငှားချခြင်းထက် ရောင်းထုတ်ရန်ကိုသာ ပိုမိုစိတ်ဝင်စားနေခြင်းလည်းဖြစ်သည်။
