ဘောလုံးဝေဖန်သုံးသပ်သူအဖြစ် ဆောင်ရွက်နေသည့် ပရီးမီးယား လိဂ်ဂန္ထဝင်အလန်ရှီးယားက မန်ယူ အသင်းအနေဖြင့် အသင်းတိုက်စစ်မှူး ဟွိုင်လန်းထံမှ တောင်းဆိုမှု များပြားလွန်းနေကြောင်း သုံးသပ်ပြောကြားခဲ့သည်။
ပြီးခဲ့သည့်နွေက အတ္တလန်တာအသင်းမှ မန်ယူအသင်းထံသို့ Add-ons ကြေးများအပါအဝင် ပေါင် (၇၂) သန်းဖြင့် ပြောင်းရွှေ့လာခဲ့သူ ဟွိုင်လန်းသည် ပရီးမီးယားလိဂ်တွင် ခြေစွမ်းပြနိုင်ရန် ရုန်းကန်နေရသည်။
၎င်းသည် မန်ယူအသင်းအတွက် ယခုရာသီ ချန်ပီယံလိဂ် (၄)ပွဲတွင် (၅)ဂိုးအထိ သွင်းယူထားသော်လည်း ပရီးမီးယားလိဂ် (၈)ပွဲကစားရာတွင် ဂိုးသွင်းယူနိုင်ခြင်းမရှိပေ။
ဟွိုင်လန်းအနေဖြင့် ပရီးမီးယားလိဂ်တွင် ဂိုးမသွင်းနိုင်သေးခြင်းမှာ မန်ယူအသင်းအနေဖြင့် ၎င်းထံမှ တောင်းဆိုမှုများပြားခြင်းကြောင့်ဖြစ်သည်ဟု အလန်ရှီးယားက သုံးသပ်ခဲ့ ခြင်းဖြစ်သည်။
“ဟွိုင်လန်းအတွက် ကျွန်တော် စိတ်မကောင်းပါဘူး။ သူဟာ သူကစားရမယ့်နေရာမှာ မကစားရဘူးဖြစ်နေတယ်။ ပြီးတော့ ပြောင်းရွှေ့ကြေးက သူ့ကို ဖိအားဖြစ်စေပါ တယ်။ ဟွိုင်လန်းက အဆုံးသတ်သူ ဖြစ်ပေမဲ့ တစ်ကွင်းလုံး ကစားနေရပါတယ်”ဟု ရှီးယားက ဆိုခဲ့သည်။
ဟွိုင်လန်းသည် တံကောက်ကြောဒဏ်ရာကြောင့် နိုဝင်ဘာလကုန်တွင်မှ ပြန်ကစားနိုင်ဖွယ်ရှိကြောင်း သိရသည်။
