ဘာစီလိုနာအသင်းခေါင်းဆောင် မက်ဆီသည် အသင်းနှင့်အတူ တနင်္လာနေ့(စက်တင်ဘာ ၇ ရက်)တွင်မှ လေ့ကျင့်ခန်းဆင်းဖွယ်ရှိကြောင်း သိရသည်။
အသက် (၃၃)နှစ်အရွယ်ရှိ အာဂျင်တီးနားတိုက်စစ်မှူး မက်ဆီသည် ဘာစီလိုနာအသင်းမှထွက်ခွာရန် ကြိုးစားခဲ့သော်လည်း အသင်းနှင့် ဥပဒေကြောင်းအရ ရင်ဆိုင်လိုခြင်းမရှိသည့်အတွက် တစ်ရာသီဆက်ကစားမည်ဖြစ်ကြောင်း သောကြာနေ့တွင် ကြေညာခဲ့သည်။
မက်ဆီသည် သြဂုတ်လ (၂၅)ရက်တွင် ပြောင်းရွှေ့ကြေးအလွတ်ဖြင့် ထွက်ခွာခွင့်ပေးရန် ဘာစီလိုနာအသင်းထံ Fax ပို့ကာ တောင်းဆိုခဲ့ခြင်းဖြစ်ပြီး ယင်းကတည်းက အသင်းနှင့်အတူ လေ့ကျင့်ခန်းဆင်းခြင်း မရှိသေးကြောင်း သိရသည်။
AFP သတင်းဌာန၏ ဖော်ပြချက်အရ ယနေ့(စနေနေ့)နံနက်ပိုင်းက ပြုလုပ်ခဲ့သည့် ဘာစီလိုနာအသင်း၏ လေ့ကျင့်ရေးအစီအစဉ်ကို မက်ဆီ လာရောက်ခဲ့ခြင်းမရှိကြောင်း သိရသည်။
စပိန်မီဒီယာများ၏ ဖော်ပြမှုအရ မက်ဆီအနေဖြင့် အသင်းနှင့်မပူးပေါင်းမီ မဆင်းမီ COVID-19 စစ်ဆေးမှု ခံယူရဦးမည်ဖြစ်သောကြောင့် တနင်္လာနေ့တွင်မှ လေ့ကျင့်ခန်းဆင်းနိုင်ဖွယ်ရှိကြောင်း သိရသည်။
ယနေ့က ပြုလုပ်ခဲ့သည့် ဘာစီလိုနာအသင်း၏ လေ့ကျင့်ရေးအစီအစဉ်တွင် ဘိုင်ယန်မြူးနစ်အသင်းမှ အငှားစာချုပ်ပြည့်၍ ပြန်လာသည့် ကော်တင်ဟိုသည် အခြားကစားသမားများနှင့် လေ့ကျင့်ခန်းဆင်းနေကြောင်း သိရသည်။
