ဘိုင်ယန်မြူးနစ်အသင်း၏ အင်္ဂလန်တိုက်စစ်မှူး ဟာရီကိန်းသည် ဒေါ့မွန်အသင်းကို (၄-၀)ဂိုးဖြင့် အနိုင်ရခဲ့သည့် ဘွန်ဒစ်လီဂါပွဲစဉ်၌ ဟက်ထရစ် သွင်းယူနိုင်ခဲ့ပြီး ပထမဆုံးယှဉ်ပြိုင်ကစားသည့် Der Klassiker ပွဲတွင် ဟက်ထရစ်သွင်းယူနိုင်သည့် ပထမဆုံးကစားသမားအဖြစ် မှတ်တမ်းဝင်ခဲ့ကြောင်း သိရသည်။
ဂျာမန်ဘောလုံးလောက၏ အအောင်မြင်ဆုံးကလပ်အသင်းနှစ်သင်းဖြစ်သော ဒေါ့မွန်နှင့် ဘိုင်ယန်မြူးနစ်တို့ ဆုံတွေ့သည့်ပွဲစဉ်များကို ဂျာမန်ဂန္ထဝင်ပွဲဟု အဓိပ္ပာယ်ရသည့် Der Klassiker(German Clasico) ဟု တင်စားခေါ်ဝေါ်ကြသည်။
ပြီးခဲ့သည့် နွေရာသီကမှ ဘိုင်ယန်မြူးနစ်အသင်းထံ ရောက်ရှိလာခဲ့သည့် ဟာရီကိန်းသည် ပထမဆုံးယှဉ်ပြိုင်ကစားခွင့်ရသည့် Der Klassiker ပွဲတွင်ပင် ခြေစွမ်းပြကာ ဟက်ထရစ်သွင်းယူခဲ့ခြင်းဖြစ်သည်။
ထို့ကြောင့် ထူးခြားသည့်စံချိန်ကို ရရှိသွားခဲ့သည့်အပြင် ဘွန်ဒစ်လီဂါပြိုင်ပွဲသမိုင်းတွင်လည်း တိုက်စစ်စံချိန်သစ်တစ်ခု ထပ်မံပိုင်ဆိုင်ခဲ့သည်။
ဟာရီကိန်းသည် ရာသီအဖွင့် ဘွန်ဒစ်လီဂါပွဲစဉ်(၁၀)ပွဲတွင် (၁၅)ဂိုး သွင်းယူနိုင်ခဲ့ပြီဖြစ်ပြီး ဘွန်ဒစ်လီဂါပြိုင်ပွဲသမိုင်းတွင် ပထမဆုံးစွမ်းဆောင်နိုင်ခြင်းဖြစ်ခဲ့သည်။
ဟာရီကိန်းသည် ဘွန်ဒစ်လီဂါပွဲစဉ်(၁၀)ပွဲ ယှဉ်ပြိုင်ခဲ့ရာတွင် ဟက်ထရစ်(၃)ကြိမ် သွင်းယူနိုင်ခဲ့ပြီး ဘွန်ဒစ်လီဂါဂိုးသွင်းအများဆုံးစာရင်းကိုလည်း ဦးဆောင်နိုင်ခဲ့ပြီဖြစ်သည်။
ထို့ပြင် ၎င်း၏ လက်ရှိသွင်းဂိုးအရေအတွက်မှာ ဥရောပထိပ်တန်းလိဂ်များတွင်လည်း အများဆုံးဖြစ်နေသည်။
ဟာရီကိန်းသည် ဘွန်ဒစ်လီဂါပြိုင်ပွဲ၌ (၅၈)မိနစ်လျှင် တစ်ဂိုးနှုန်း သွင်းယူထားနိုင်ခြင်းဖြစ်ပြီး ရပ်တန့်၍ မရနိုင်သည့်တိုက်စစ်မှူးဖြစ်ကြောင်း ဂျာမန်မီဒီယာများက တင်စားချီးကျူးနေကြသည်။
