ချယ်လ်ဆီးနောက်ခံကစားသမား ကော်ဝဲလ်က မိမိတို့အသင်းအနေဖြင့် လန်ဒန်ဒါဘီတွင် စပါးအသင်းကို အနိုင်ယူနိုင်စွမ်းရှိကြောင်း ကြုံးဝါးပြောကြားခဲ့သည်။
ချယ်လ်ဆီးအသင်းသည် ယခုရာသီ ပရီးမီးယားလိဂ်ပွဲစဉ် ၁၀ အပြီးတွင် သုံးပွဲနိုင်၊ သုံးပွဲသရေ၊ လေးပွဲရှုံး ရလဒ်ထွက်ပေါ်ထားကာ ရမှတ် ၁၂ မှတ်သာ ရရှိထားပြီး စပါးအသင်း (၂၆ မှတ်)နှင့် ၁၄ မှတ်အထိ ကွာဟလျက်ရှိသည်။
ချယ်လ်ဆီးအသင်းသည် ပရီးမီးယားလိဂ်ပွဲစဉ် ၁၁ အဖြစ် နိုဝင်ဘာ ၆ ရက်တွင် အမှတ်ပေးဇယားထိပ်ဆုံးမှ စပါးအသင်းကို အဝေးကွင်း၌ သွားရောက်ယှဉ်ပြိုင်ရမည်ဖြစ်သည်။ ချယ်လ်ဆီးနောက်ခံကစားသမား ကော်ဝဲလ်က မိမိတို့အသင်းအနေဖြင့် လန်ဒန်ဒါဘီတွင် စပါးအသင်းကို အနိုင်ယူကာ စိတ်ခွန်အားယူသွားမည်ဖြစ်ကြောင်း ပြောကြားခဲ့ခြင်းဖြစ်သည်။
စပါးအသင်းနှင့် ယှဉ်ပြိုင်ကစားရမည့် ပွဲစဉ်နှင့်ပတ်သက်ပြီး The Standard သတင်းစာ၏ မေးမြန်းမှုကို ကော်ဝဲလ်က “ပွဲကြီးပွဲကောင်းတစ်ပွဲပါပဲ။ ဘာလို့လဲဆိုတော့ ဒါဘီပြိုင်ဘက်တွေ ဖြစ်နေလို့ပါ။ စပါးအသင်းမှာ ကစားသမားကောင်းတွေရှိသလို ကျွန် တော်တို့အသင်းမှာလည်း ရှိပါတယ်။ အာဆင်နယ်၊ လီဗာပူးလ်တို့လို ထိပ်တန်းအသင်းတွေနဲ့ ကစားခဲ့တဲ့ပွဲစဉ်တွေမှာ ကျွန်တော်တို့ ကောင်းကောင်းကစားနိုင်ခဲ့ပါတယ်။ စပါးနဲ့ ပွဲမှာလည်း အဲဒီလိုကစားနိုင်ဖို့ ကျွန်တော်တို့ ကြိုးစားသွားမှာပါ။ ကျွန်တော်တို့အနေနဲ့ စပါးကွင်းကိုသွားပြီး သူတို့ကို အနိုင်ရယူဖို့ ကြိုးစားသွားမှာပါ။ စပါးနဲ့ကစားမယ့်ပွဲဟာ ခက်ခဲတဲ့ပွဲစဉ်တစ်ပွဲဖြစ်ပေမဲ့ ကျွန်တော်တို့ အနေနဲ့ သူတို့ကို အနိုင်ယူနိုင်စွမ်း ရှိနေပါတယ်”ဟု ပြောကြားခဲ့သည်။
