ဘောလုံးဝေဖန်သူအဖြစ် ဆောင်ရွက်နေသည့် မန်ချက်စတာယူနိုက်တက်အသင်း ဂန္ထဝင်ဂိုးသမား ပီတာရှမိုက်ကယ်က အသင်းအားပေးသူပရိသတ်များအနေဖြင့် မန်ချက်စတာယူနိုက်တက်အသင်းကို ချစ်မြတ်နိုးပါက အသင်းနည်းပြ တန်ဟက်ဂ်ကိုလည်း ထောက်ခံအားပေးရမည်ဖြစ်ကြောင်း ပြောကြားခဲ့သည်။
နယူးကာဆယ်အသင်းအား လိဂ်ဖလားပြိုင်ပွဲ စတုတ္ထအဆင့်တွင် အိမ်ကွင်း၌ (၀-၃) ဂိုးဖြင့် ရှုံးနိမ့်ပြီးနောက် မန်ချက်စတာယူနိုက်တက်နည်းပြ တန်ဟက်ဂ်မှာ ဝေဖန်မှုများနှင့် ရင်ဆိုင်နေရပြီး ရာထူးမှထုတ်ပယ်ခံရရန် ရေပန်းစားလျက်ရှိသည်။
နယူးကာဆယ်အသင်းအား ဂိုးပြတ်ရှုံးနိမ့်သည့်ပွဲအပြီးတွင် မန်ချက်စတာယူနိုက်တက်အသင်းအားပေးသူပရိသတ်အချို့သည် အသင်းနည်းပြတန်ဟက်ဂ်အား ရာထူးမှ ထုတ်ပယ်ခံရတော့မည်ဟု အော်ဟစ်လှောင်ပြောင်ခဲ့ကြသည်။ မန်ချက်စတာယူနိုက်တက်အသင်းအနေဖြင့် ယခုကဲ့သို့ အခက်အခဲများနှင့် ရင်ဆိုင်နေရချိန်တွင် အသင်းအားပေးသူပရိသတ်များအနေဖြင့် ယင်းအခြေအနေဆိုးများမှ ရုန်းထွက်နိုင်ရန် အသင်းနည်းပြ တန်ဟက်ဂ်ကိုထောက်ခံအားပေးသင့်ကြောင်း အသင်းဂိုးသမား ဟောင်း ပီတာရှမိုက်ကယ်က ပြောကြားခဲ့ခြင်းဖြစ်သည်။
ပီတာရှမိုက်ကယ်က “အခုအချိန်မှာ မန်ချက်စတာယူနိုက်တက်အသင်း အားပေးသူပရိသတ်တွေအနေနဲ့ စုစုစည်းစည်း ရှိနေဖို့လိုပြီး အခြေအနေဆိုးတွေကနေ ရုန်းထွက်နိုင်ဖို့အတွက် နည်းပြကို ထောက်ခံအားပေးဖို့လိုပါတယ်။ မန်ချက်စတာယူနိုက်တက် အသင်းနည်းပြရာထူးကနေ ဆာအဲလက်စ်ဖာဂူဆန် ထွက်ခွာသွားပြီးနောက်မှာ ကျွန်တော် တို့ဟာ ပရီးမီးယားလိဂ်ချန်ပီယံဆုကို ရယူနိုင်ခြင်းမရှိတော့ပါဘူး။ ဖာဂူဆန်နောက်ပိုင်းမှာ အသင်းကို ကိုင်တွယ်ခဲ့တဲ့ နည်းပြအချို့ကတော့ သူတို့လက်ထက်မှာ ရလဒ်ကောင်းတယ်လို့ ပြောကောင်းပြောကြပါလိမ့်မယ်။ ဒါပေမဲ့ မန်ချက်စတာယူနိုက်တက်အသင်းဟာ ဘယ်တုန်းကမှ တိုးတက်လာခြင်း မရှိခဲ့ပါဘူး။ အခု ကျွန်တော်တို့ မြင်နေရတာ အဲဒီ အကျိုးဆက်တွေပါပဲ။ တကယ်လို့ ကျွန်တော်တို့အနေနဲ့ မန်ချက်စတာယူနိုက်တက်ကို ချစ်တယ်ဆိုရင် တန်ဟက်ဂ်ကို ကျွန်တော်တို့ ထောက်ခံအားပေးရမှာပါ။ နယူးကာဆယ်နဲ့ပွဲမှာ ကျွန်တော်တို့အသင်းရဲ့ ပရိသတ်အချို့က တန်ဟက်ဂ်ကို မနက်ကျရင် ခင်ဗျား ရာထူးက အထုတ်ခံရတော့မယ်လို့ အော်ဟစ်ခဲ့ကြတာကို ကြားရပါတယ်။ ဒါဟာ မန်ချက်စတာယူနိုက်တက်ကို အားပေးရာ မရောက်ပါဘူး”ဟု ပြောကြားခဲ့သည်။
ထို့ပြင် ပီတာရှမိုက်ကယ်က မန်ချက်စတာယူနိုက်တက်အသင်းမှာ ကမ္ဘာပေါ်တွင် အကျော်ကြားဆုံးအသင်း ဖြစ်သည့်အတွက် ရလဒ်ဆိုးချိန်တွင် အခြားအသင်းများထက် ပိုမိုဝေဖန်ခံရကြောင်းလည်း ပြောကြားခဲ့သည်။ “မန်ချက်စတာယူနိုက်တက်အသင်း ရလဒ်ဆိုးနေတာကို တစ်ကမ္ဘာလုံးက ပြောနေကြပါတယ်။ တကယ်လို့ မန်ချက်စတာယူနိုက်တက်နေရာမှာ တခြားအသင်းသာဆိုရင် လူတွေ ဒီလောက်ပြောကြမှာ မဟုတ်ပါဘူး။ မန်ချက်စတာယူနိုက်တက်အကြောင်း တစ်ကမ္ဘာလုံးပြောနေကြတာဟာ သူတို့ စိတ်ဝင်စားကြလို့ပါ။ ဒီတော့ မန်ချက်စတာယူနိုက်တက် နည်းပြရော အသင်းကစားသမားတွေပါ ဒါတွေကိုကျော်ဖြတ်နိုင်ဖို့အတွက် စိတ်ခွန်အားကြီးဖို့ လိုပါတယ်”ဟု ပီတာရှမိုက်ကယ်က ပြောကြားခဲ့သည်။
