မက်ဆီအပါအဝင် ဘာစီလိုနာကစားသမားဟောင်းများ ပါဝင်ကစားနေသည့် မေဂျာလိဂ်ကလပ် အင်တာမိုင်ယာမီအသင်းက လာမည့်နိုဝင်ဘာလတွင် တရုတ်နိုင်ငံသို့ ခြေစမ်းခရီးထွက်ခွာပြီး တရုတ်စူပါလိဂ်ကလပ်နှစ်သင်းနှင့် ယှဉ်ပြိုင်ကစားသွားမည်ဖြစ်ကြောင်း အတည်ပြုကြေညာခဲ့သည်။
အင်တာမိုင်ယာမီအသင်းသည် မေဂျာလိဂ်ပြိုင်ပွဲတွင် Playoffs ယှဉ်ပြိုင်ခွင့်မရသည့်အတွက် အောက်တိုဘာ(၂၁)တွင် ရာသီအဆုံးသတ်တော့မည်ဖြစ်သောကြောင့် ယခုကဲ့သို့ ခြေစမ်းခရီးထွက်ခွာရန် စီစဉ်ခြင်းဖြစ်ကြောင်း သိရသည်။
အင်တာမိုင်ယာမီအသင်းသည် တရုတ်နိုင်ငံသို့ ပထမဆုံးအကြိမ် ခြေစမ်းခရီး သွားရောက်ခြင်းဖြစ်ပြီး နိုဝင်ဘာ(၅)ရက်တွင် Qingdao Hainiu၊ နိုဝင်ဘာ(၈) ရက်တွင် Chengdu Rongcheng အသင်းတို့နှင့် ယှဉ်ပြိုင်ကစားမည်ဖြစ်ကြောင်း သိရသည်။
အင်တာမိုင်ယာမီအသင်းက ယခုခြေစမ်းပွဲများမှာ လာမည့် ၂၀၂၄ ရာသီအတွက် စတင်ပြင်ဆင်ခြင်းဖြစ်သည်ဟုလည်း ဆိုခဲ့သည်။
