ဘာစီလိုနာအသင်းတိုက်စစ်မှူး လီဝန်ဒေါစကီးသည် ချန်ပီယံလိဂ်ပွဲစဉ်၌ရရှိခဲ့သည့် ခြေချင်းဝတ်ဒဏ်ရာကြောင့် ပိုလန်လက်ရွေးစင်အသင်း၏ ယူရိုခြေစစ်ပွဲစဉ်များကို လွဲချော်မည်ဖြစ်ကြောင်း သိရသည်။
လီဝန်ဒေါစကီး (၃၅ နှစ်) သည် ဗုဒ္ဓဟူးနေ့က ပေါ်တိုအသင်းနှင့်ကစားသည့် ချန်ပီယံလိဂ်ပွဲစဉ်တွင် ခြေချင်းဝတ်ဒဏ်ရာရရှိခဲ့ခြင်းဖြစ်ပြီး ပထမပိုင်း ၃၄ မိနစ်မှာပင် လူစားလဲခဲ့ရသည်။ ၎င်း၏ဒဏ်ရာအခြေအနေကို လေ့ကျင့်ရေးကွင်း၌ စစ်ဆေးပြီးနောက် သာမန်ပွန်းပဲ့ထိခိုက်မှုမဟုတ်ဘဲ ခြေချင်းဝတ်ခေါက်သွားခြင်းဖြစ်ကြောင်း သိရသည်။
သို့ဖြစ်ရာ လီဝန်ဒေါစကီးအနေဖြင့် ယနေ့ကစားမည့် ဂရန်နာဒါအသင်းနှင့်ပွဲစဉ်အမီ ပြန်လည်ကောင်းမွန်မည်မဟုတ်သလို ပိုလန်အသင်း၏ ယူရိုခြေစစ်ပွဲစဉ်များကိုလည်း လွဲချော်တော့မည်ဖြစ်သည်။
ပိုလန်အသင်းသည် ယူရို-၂၀၂၄ ခြေစစ်ပွဲ အုပ်စု(E) တွင် ပါဝင်နေပြီး အောက်တိုဘာ ၁၂ ရက်တွင် ဖာရိုးကျွန်းစုများအသင်း နှင့် အဝေးကွင်း၊ အောက်တိုဘာ ၁၅ ရက်တွင် မော်လ်ဒိုဗာအသင်းနှင့် အိမ်ကွင်းကစားရမည်ဖြစ်သည်။
ပိုလန်အသင်းအနေဖြင့် ငါးပွဲ ကစားအပြီးတွင် နှစ်ပွဲနိုင်၊ သုံးပွဲရှုံး၊ ရမှတ် ခြောက်မှတ်ဖြင့် အဆင့် ၄ နေရာရောက်ရှိ နေသောကြောင့် လီဝန်ဒေါစကီးမပါဝင်နိုင် ခြင်းမှာ ထိုးနှက်ချက်ဖြစ်စေသည်။
ထို့ပြင် လီဝန်ဒေါစကီးသည် အောက်တိုဘာ ၂၈ ရက်တွင် ရီးယဲလ်အသင်းနှင့်ကစားရမည့် El Clasico ပွဲတွင် ပါဝင်နိုင်ရန်လည်း မသေချာသေးကြောင်း သိရသည်။
