မန်စီးတီးလူငယ်ကြယ်ပွင့် ဖီးလ်ဖိုဒန်က မိမိအနေဖြင့် ဒေးဗစ်ဆေးလ်ဗား ထွက်ခွာသွားသည့်နေရာကို အရယူလိုသည် ဟု ဖွင့်ဟပြောဆိုခဲ့သည်။
အသက်(၂၀)အရွယ်သာရှိသေးသည့် မန်စီးတီးအကယ်ဒမီထွက် လူငယ်ကစားသမားကြယ်ပွင့် ဖိုဒန်သည် အင်္ဂလန်လက်ရွေးစင်အသင်းတွင်လည်း ရွေးချယ်ခံထားရသူဖြစ်သည်။
ဒေးဗစ်ဆေးလ်ဗားသည် ၂၀၁၉-၂၀ ရာသီကုန်တွင် စာချုပ်သက်တမ်းကုန်ဆုံးပြီးနောက် (၁၀)နှစ်ကြာ ကစားခဲ့သည့် မန်စီးတီးအသင်းကို စွန့်ခွာကာ ဆိုစီဒက်အသင်းသို့ ပြောင်းရွှေ့ကြေးအလွတ်ဖြင့် ပြောင်းရွှေ့သွားခဲ့သည်။
ဖိုဒန်က “ဆေးလ်ဗားနေရာကို အရယူလိုပါတယ်။ ဒါပေမဲ့ အသင်းမှာ အရည်အသွေးမြင့် ကွင်းလယ်လူတွေ အများကြီးရှိနေတယ်။ ကျွန်တော်အနေနဲ့ ဒီနေရာကို လွယ်လွယ်နဲ့ရဖို့ မရှိပါဘူး။ မကြာခင်ကပဲ ကျွန်တော် ကစားခွင့် ပိုရလာခဲ့ပါတယ်။ အလုပ်ကြိုးစားပြီး နေရာတစ်နေရာကို ရယူသွားမှာပါ”ဟု ပြောကြားခဲ့သည်။
ထို့ပြင် ဖိုဒန်က မိမိအနေဖြင့် မန်စီးတီးအသင်းတွင် ဒေးဗစ်ဆေးလ်ဗားနှင့်အတူ တွဲဖက်ကစားခွင့်ရပြီး များစွာသင်ယူခဲ့ရကြောင်းလည်း ပြောကြားခဲ့သည်။
အင်္ဂလန်လူငယ်ကွင်းလယ်ကစားသမား ဖိုဒန်သည် ပြီးခဲ့သည့် ၂၀၁၉-၂၀ ရာသီတွင် မန်စီးတီးအသင်းအတွက် ပြိုင်ပွဲစုံ (၃၈)ပွဲတွင် (၈)ဂိုး သွင်းယူခဲ့သည်။
