ဘိုင်ယန်မြူးနစ်အသင်းသည် စပါးအသင်းမှ အင်္ဂလန်တိုက်စစ်မှူး ဟာရီကိန်းကို သြဂုတ်လ(၆)ရက်မတိုင်မီ ခေါ်ယူနိုင်ရန် မျှော်လင့်နေပြီး အသင်းတာဝန်ရှိသူနှစ်ဦးမှာလည်း အပြောင်းအရွှေ့အတွက် လန်ဒန်သို့ လာရောက်ဆွေးနွေးရန် စီ စဉ်နေပြီဖြစ်ကြောင်း သိရသည်။
ဘိုင်ယန်မြူးနစ်အသင်းသည် ပြီးခဲ့သည့်နှစ်တွင် တိုက်စစ်မှူး လီဝန်ဒေါစကီးကို ဆုံးရှုံးခဲ့ရပြီးနောက် ပြန်လည်အားဖြည့်မှုများ ပြုလုပ်ခဲ့သော်လည်း တိုက်စစ်ပိုင်းအခက်အခဲနှင့် ရင်ဆိုင်ခဲ့ရသည်။
အစားထိုးခေါ်ယူခဲ့သည့် လီဗာပူးလ်တိုက်စစ်ကစားသမား မာနေ ခြေစွမ်းမပြနိုင်ခြင်းကြောင့်လည်း ဘိုင်ယန်မြူးနစ်အသင်းအနေဖြင့် အခက်တွေ့ခဲ့ခြင်းဖြစ်သည်။
ထို့ကြောင့် ယခုနွေရာသီတွင် ထိပ်တန်းတိုက်စစ်မှူး ခေါ်ယူရန် ပြင်ဆင်နေရာ ဆုဖလားအောင်ပွဲအတွက် စပါးအသင်းမှ ထွက်ခွာရန် ဆန္ဒရှိနေသော ဟာရီကိန်းကို မျက်စိကျခဲ့ခြင်းဖြစ်ကြောင်း သိရသည်။
ယင်းအတွက် ကမ်းလှမ်းမှုနှစ်ကြိမ် ပြုလုပ်ခဲ့ပြီးဖြစ်သော်လည်း စပါးအသင်းအလိုရှိနေသည့် ပေါင် သန်း(၁၀၀)နှင့် ကွာဟမှုရှိနေသဖြင့် ပယ်ချခံခဲ့ရသည်။
ယင်း အခြေအနေတွင် တိုက်စစ်မှူး ဘာပေအား ဆုံးရှုံးရဖွယ်ရှိနေသည့် PSG အသင်းကလည်း ဟာရီကိန်းကို ခေါ်ယူရန် ချိန် ရွယ်လာကြောင်း သတင်းထွက်လာခဲ့သည်။
သို့သော် ဘိုင်ယန်မြူးနစ်အသင်းက တတိယအကြိမ်ကမ်းလှမ်းမှု ထပ်မံပြုလုပ်ရန် စီစဉ်နေသလို၊ အမှုဆောင်ချုပ် ခရစ္စတီယန်ဒရင်းဆန်နှင့် နည်းစနစ်ဒါရိုက်တာ မာကိုနက်ပယ်တို့ လန်ဒန်မြို့သို့ လာရောက်ဆွေးနွေးရန် စီစဉ်နေကြောင်း သိရသည်။
ဟာရီကိန်းသည် စပါးအသင်းနှင့်အတူ အာရှသို့ သွားရောက်ကာ ရာသီကြိုခြေစမ်းပွဲများ ယှဉ်ပြိုင်ကစားခဲ့ပြီး ယင်းခရီးစဉ်မှ ပြန်ရောက်လာချိန်တွင် အပြောင်းအရွှေ့အတွက် ဆွေးနွေးရန် ဘိုင်ယန်မြူးနစ်အသင်းက ရည်ရွယ်နေခြင်းဖြစ်ကြောင်း သိရသည်။
စပါးအသင်းသည် သြဂုတ်လ(၆)ရက်၌ အိမ်ကွင်းတွင် ရှက်တာဒိုးနက်အသင်းနှင့် ခြေစမ်းပွဲထပ်မံယှဉ်ပြိုင်မည်ဖြစ်ပြီး ယင်းပွဲမတိုင်မီ ဟာရီကိန်းကို အပြီးသတ်ခေါ်ယူနိုင်ရန် ဘိုင်ယန်မြူးနစ်အသင်း တာဝန်ရှိသူများက ပစ်မှတ်ထားနေခြင်းဖြစ်ကြောင်းလည်း သိရသည်။
