လီဗာပူးလ်အသင်း၏ အင်္ဂလန်ကွင်းလယ်ကစားသမား ဟန်ဒါဆန်သည် ဆော်ဒီကလပ် အယ်လ်အက်တီဖတ်အသင်း၏ တစ်ပတ်လစာ ပေါင် (၇)သိန်းဖြင့် ကမ်းလှမ်းမှုကို လက်ခံလိုက်ပြီဖြစ်ကြောင်း ဗြိတိန်မီဒီယာများက ဖော်ပြခဲ့သည်။
ဟန်ဒါဆန် (၃၃ နှစ်)သည် လီဗာပူးလ်အသင်း၏ အသင်းခေါင်းဆောင်အဖြစ် တာဝန်ယူနေရသူဖြစ်သော်လည်း အသက်အရွယ်ကြီးရင့်လာပြီဖြစ်သောကြောင့် အနာဂတ်မှာ မရေမရာဖြစ်လာသည်။
ယင်းအခြေအနေတွင် အယ်လ်အက်တီဖတ်အသင်း၏ ကမ်းလှမ်းမှု ရောက်ရှိလာခြင်းဖြစ်ပြီး ဟန်ဒါဆန်က လက်ခံလိုက်ပြီဟု သတင်းထွက်ပေါ်လာခြင်း ဖြစ်သည်။
ဆော်ဒီကလပ်အသင်းများ သည် ယခုနွေရာသီတွင် ဥရောပမှ ထိပ်တန်းကစားသမားများကို ဆက်တိုက်ခေါ်ယူလျက်ရှိသည့်အပြင် နာမည်ကျော်နည်းပြများကိုလည်း ခေါ်ယူနေသည်။
အယ်လ်အက်တီဖတ်အသင်းသည် လီဗာပူးလ်အသင်း၏ ကစားသမားဟောင်း စတီဗင်ဂျရတ်ကို နည်းပြသစ်အဖြစ် ခန့်အပ်ခဲ့ပြီးနောက် လီဗာပူးလ်အသင်းမှ ကစားသမားများကို ခေါ်ယူရန် ကြိုးပမ်းခဲ့ရာ ဟန်ဒါဆန်ကို သဘောတူညီမှု ရရှိခဲ့ခြင်းဖြစ်ကြောင်း သိရသည်။
အယ်လ်အက်တီဖတ်အသင်းက ဟန်ဒါဆန်ကို (၃)နှစ် စာချုပ်ချုပ် ဆိုမည်ဟု သိရသည်။
