၂၀၂၃-၂၄ ရာသီတွင် ဝတ်ဆင်မည့် ဝတ်စုံသစ်များကို မိတ်ဆက်ပြသထားသော ပရီးမီးယားလိဂ်ကလပ်အသင်း(၁၀)သင်းသည် အင်္ကျီတန်ဖိုးကို ပြီးခဲ့သည့်ရာသီထက် ဈေးနှုန်းတိုးမြှင့်ခဲ့ပြီး အာဆင်နယ်နှင့် မန်ယူအသင်းတို့မှာ (၁၄%)အထိ ဈေးနှုန်းမြင့်တက်ခဲ့ကြောင်း သိရသည်။
ဇူလိုင်(၁)ရက်နေ့အထိ ရာသီသစ်အတွက် ဝတ်စုံသစ်မိတ်ဆက်ပြသထားသည့် ကလပ်အသင်း (၁၀)သင်းသာရှိသေးပြီး အဆိုပါအသင်းများ၏ အင်္ကျီဈေးနှုန်းမှာ အနည်းဆုံး (၅)ပေါင် မြင့်တက်လာခဲ့ခြင်းဖြစ်သည်။
Daily Mail ၏ ဖော်ပြမှုအရ စပါး၊ မန်စီးတီး၊ လီဗာပူးလ်၊ အက်စတွန်ဗီလာ၊ နယူးကာဆယ်၊ အဲဗာတန်၊ ခရစ္စတယ်ပဲလေ့စ်၊ ဝုလ်ဗ်အသင်းတို့မှာ ပြီးခဲ့သည့်ရာသီထက် (၅)ပေါင်စီ ဈေးနှုန်းတိုးမြှင့်ခဲ့ပြီး အာဆင်နယ်နှင့် မန်ယူအသင်းတို့မှာမူ (၁၀)ပေါင်စီ တိုးမြှင့်ခဲ့ခြင်းဖြစ်သည်။
ယင်းနှစ်သင်း၏ အင်္ကျီတန်ဖိုးမှာ ပြီးခဲ့သည့် ရာသီတွင် ပေါင်(၇၀)သာရှိခဲ့ပြီး ယခုပေါင်(၈၀)သို့ တိုးမြှင့်လိုက်သည့်အတွက် (၁၄%)အထိ မြင့်တက်သွားခဲ့ခြင်းဖြစ်သည်။ စပါးအသင်းမှာ ပြီးခဲ့သည့်ရာသီတွင် (၇၅)ပေါင်ဖြင့် ရောင်းချခဲ့ရာမှ ယခုရာသီတွင် ပေါင်(၈၀)သို့ တိုးမြှင့်လိုက်ခြင်း ဖြစ်သည်။ ထို့ပြင် ပရီးမီးယားလိဂ်ကလပ်(၁၀)သင်း၏ အင်္ကျီများအနက် အာဆင်နယ်၊ မန်ယူနှင့် စပါးအသင်းတို့၏ အင်္ကျီများမှာ တန်ဖိုးအကြီးဆုံးဖြစ်နေကြောင်း သိရသည်။
သို့သော် ပရီးမီးယားလိဂ်အသင်းများသည် အင်္ကျီတန်ဖိုးများကို ဈေးနှုန်းမြှင့်တင်ရောင်းချခဲ့သော်လည်း ကလပ်အသင်းအနေဖြင့် အဆိုပါအင်္ကျီရောင်းချမှုမှ တစ်ထည်လျှင် ပေါင် (၄.၈၀)နှုန်းသာ ရရှိကြောင်း သိရသည်။ ထို့ပြင် အားကစားဈေး ကွက်ကျွမ်းကျင်သူ ဂျာမန်လူမျိုး ဒေါက်တာ ပီတာရိုဟာမန်းက ပေါင်(၈၀)ဖြင့် ရောင်းချသည့် အင်္ကျီတစ်ထည်အတွက် ကုန်ကျစရိတ်မှာ (၈)ပေါင်သာရှိပြီး အခွန်အခများ၊ အမြတ်အစွန်း ခွဲယူမှုများကြောင့် ပရိသတ်များလက်ထဲသို့ မူရင်းကုန်ကျ စရိတ်၏(၁၀)ဆဝန်းကျင်ဖြင့် ရောက်ရှိသွားခဲ့ခြင်းဖြစ်ကြောင်း ရှင်းလင်းပြောကြားခဲ့သည်။
အင်္ကျီတစ်ထည်အတွက် အမြတ်အစွန်းအများဆုံးရရှိသူမှာ လက်လီရောင်းချသူနှင့် Adidas၊ Nike တို့ကဲ့သို့ ဝတ်စုံထုတ်လုပ်သည့် ကုမ္ပဏီများဖြစ်ပြီး အဆိုပါကုမ္ပဏီများသည် ကလပ်အသင်းများထံ မြင့်မားသည့် စပွန်ဆာငွေကြေးများ ပေးချေနေရသည့်အတွက် အမြတ်အစွန်းများစွာ ပြန်လည်ရယူခြင်းဖြစ်ကြောင်း သိရသည်။
ပရိသတ်များအနေဖြင့်မူ ကလပ်အသင်းများ ရောင်းချသည့် အင်္ကျီ၌ ပရီးမီးယားလိဂ်အမှတ်တံဆိပ်၊ ကျောနံပါတ်နှင့် ကစားသမားအမည်များ တပ်ဆင်၍ ဝတ်ဆင်မည်ဆိုပါက ပေါင်(၂၀)ခန့် ထပ်မံကုန်ကျဦးမည်ဖြစ်ကြောင်း Daily Mail က ဖော်ပြခဲ့သည်။
ပရီးမီးယားလိဂ်ကလပ်(၁၀)သင်း၏ ရာသီသစ်အင်္ကျီဈေးနှုန်း
အာဆင်နယ် (၈၀)ပေါင်
မန်ယူ (၈၀)ပေါင်
စပါး (၈၀)ပေါင်
မန်စီးတီး (၇၅)ပေါင်
လီဗာပူးလ် (၇၄.၉၅)ပေါင်
အက်စတွန်ဗီလာ (၇၀)ပေါင်
နယူးကာဆယ် (၇၀)ပေါင်
အဲဗာတန် (၆၅)ပေါင်
ခရစ္စတယ်ပဲလေ့စ် (၆၀)ပေါင်
ဝုလ်ဗ် (၆၀)ပေါင်
