မန်ချက်စတာ ယူနိုက်တက် လူငယ် တိုက်စစ်မှုးလေး မေဆင် ဂရင်းဝုဒ် က သူ ဟာ လူငယ် ကစား သမားတွေ ဖြစ်လေ့ ဖြစ်ထ ရှိတဲ့ second season syndrome ကို အောင်အောင် မြင်မြင် ကျော်လွှား နိုင်ဖို့ အတွက် အဆင်သင့် ပြင်ဆင် ထားပါတယ် လို့ ပြောဆိုရင်း အကယ်ဒမီ စီနီယာ တစ်ဦး ဖြစ်တဲ့ မားကပ် ရက်ဖိုဒ့် ထံကနေ အကြံဉာဏ်တွေ ရယူ နေပါတယ် လို့ ဖွင့်ဟ ပြောဆို သွားခဲ့ ပါတယ် ။ ဂရင်းဝုဒ် ဟာ လက်ရှိ မှာတော့ အင်္ဂလန် လက်ရွေးစင် အသင်းနဲ့ ပြင်ဆင် လေ့ကျင့်လျက် ရှိပါတယ် ။
ဂရင်းဝုဒ် ဟာ ပြီးခဲ့တဲ့ ရာသီ တုန်းက မန်ချက်စတာ ယူနိုက်တက် အသင်းကြီး အတွက် ပထမဆုံး ရာသီပြည့် ပါဝင် ကစားခွင့် ရရှိ ခဲ့ပါတယ် ။ အဆိုပါ ရာသီမှာ ဂရင်းဝုဒ် ဟာ ပြိုင်ပွဲ အရပ်ရပ် မှာ ၁၈ ဂိုးအထိ သွင်းယူ ခဲ့ကာ နည်းပြ ဆိုးရှား အပါအဝင် စီနီယာ အသင်းသားတွေ ကို အံ့အား သင့်စေခဲ့ ပါတယ် ။
ဒီလို ပြောင်မြောက်တဲ့ စွမ်းဆောင်မှုကြောင့် ဂရင်းဝုဒ် ဟာ အသက် ၁၈ နှစ် အရွယ် မှာပဲ အင်္ဂလန် လက်ရွေးစင် အသင်းကြီး အတွက် ဆင့်ခေါ် ခံခဲ့ရပြီး ဥရောပ နေးရှင်းလိဂ် ပြိုင်ပွဲ အတွေ့ အကြုံကို ရရှိ တော့မှာ ဖြစ်ပါတယ် ။ ဒါပေမယ့် ပိုမို ခက်ခဲတဲ့ စမ်းသပ်မှု တွေက ဂရင်းဝုဒ် ကို စောင့်ကြို နေ ပါတယ် ။
လူငယ် ကစား သမား အများစု ၊ အထူး သဖြင့် ဂိုးသွင်း ရတဲ့ ရှေ့တန်းလူတွေ ဟာ သူတို့ရဲ့ ဒုတိယ မြောက် ရာသီ ( စီနီယာ အသင်း ကို ရောက်အပြီး ဒုတိယ မြောက်ရာသီ ) မှာ ခြေကျ သွားတဲ့ အဖြစ်နဲ့ ကြုံတွေ့ ရလေ့ ရှိပါတယ် ။ လူငယ်တွေ ဟာ ပထမ ရာသီတုန်းကထက် ဖိအား ပိုများ လာသလို စောင့်ကြည့်တဲ့ မျက်လုံးတွေ ကလည်း ပိုလာတာ ကြောင့် ဒီဒဏ်တွေကို မခံနိုင်ဘဲ ခြေပျက် သွားတတ်တာမျိုးတွေ ရှိခဲ့ကြ ပါတယ် ။
ဒါပေမယ့် ဂရင်းဝုဒ် ကတော့ သူ့လိုပဲ အကယ်ဒမီ ကနေ တက်လာတဲ့ စီနီယာ မားကပ် ရက်ဖိုဒ့် ဆီကနေ အကြံဉာဏ် ကောင်းတွေ ရယူထားပြီး ဒီ second season syndrome ကို ကျော်လွှား နိုင်မယ်လို့ ယုံကြည် ကြောင်း ပြောဆိုသွား ခဲ့ ပါတယ် ။
“ဒုတိယရာသီ မှာ ဖြစ်တတ်တာ တွေကို အရင်က ကျွန်တော် ကြားခဲ့ဖူး ပါတယ် ။ ဒီအတွက် ပြင်ဆင် ထားပြီး သားပါ ။ နောက်ပြီး မားကပ် ( ရက်ဖိုဒ့် ) ကလည်း ကျွန်တော့ကို ဘာတွေ လိုတယ် ၊ ဘာတွေ ရှောင်ရမယ် ဆိုတာတွေ နဲ့ ပတ်သက်ပြီး သေချာ ပြောပြ ထားပါတယ်”
“အဓိက အချက်ကတော့ ပျော်အောင် နေတတ် ဖို့ပါပဲ ။ မန်ချက်စတာ ယူနိုက်တက် မှာ ကစားခွင့် ရဖို့ ဆိုတာ လူတိုင်း မတတ် နိုင်တဲ့ အရာပါ ။ ဒီလို နေရာမျိုးမှာ ၂ ရာသီ ဆက်တိုက် ကစားခွင့် ရဖို့ ဆိုတာ လွယ်တဲ့ ကိစ္စ မဟုတ်ပါဘူး ။ ဒါကိုကပဲ ကိုယ့်အတွက် ကျေနပ် ပျော်ရွှင် သင့်တဲ့ အရာပါ ။ ဒါကြောင့် နေ့တိုင်း အကောင်းဆုံး ကြိုးစားပြီး ရှေ့ ကို ဆက်လျောက် ရမှာပါပဲ”
“အသင်းထဲ မှာ အချင်းချင်း ဖေးမ ကူညီ ကြပါတယ် ။ ဒါက လူငယ်တွေ ကို ရှေ့ဆက်ဖို့ ခွန်အားတွေ ဖြစ်စေ မှာပါ ။ ကိုယ် ခြေစွမ်း ကောင်းနေတဲ့ အချိန် မျိုး ဆိုရင်တော့ ပြဿနာ မရှိပါဘူး ၊ ကစားပုံ မကောင်းတဲ့ နေ့မျိုး ၊ အမှားလုပ်မိ တဲ့ နေ့မျိုးတွေ မှာတော့ အချင်းချင်း ဖေးမ ပေးမှုတွေက အရမ်းကို အရေးပါ ပါတယ်”
“ဒါကြောင့် ဘာကိစ္စတွေပဲ ဖြစ်ဖြစ် စိတ်အေးအေး ထားပြီး ကိုယ် လုပ်စရာ ရှိတာကို ဆက်လုပ်သွား ရမှာပါ ။ ဘာလို့လည်း ဆိုတော့ ကွင်းထဲက အရာတွေကပဲ အဓိက ကျတာ မို့လို့ပါ” လို့ မေဆင် ဂရင်းဝုဒ် က ပြောဆို သွားခဲ့ ပါတယ် ။
မန်ချက်စတာ ယူနိုက်တက် ဟာ ဒေါ့မွန် တောင်ပံ ကစား သမားလေး ဂျေဒန် ဆန်ချို ကို ဦးစားပေး ပစ်မှတ် အဖြစ် သတ်မှတ် ထားပြီး ခေါ်ယူ နိုင်ဖို့ ကြိုးစား နေပါတယ် ။ ဆန်ချို ရောက်လာ ပါက ညာတောင်ပံ ကို အပိုင်စား ပေးဖို့ ရှိနေတာ ကြောင့် ဂရင်းဝုဒ် ရဲ့ ပွဲထွက်ခွင့်ဟာ ပထမ ရာသီကထက် ပိုနည်းသွားဖို့ ရှိတယ် လို့ သုံးသပ် ထားကြ ပါတယ် ။
ဒါပေမယ့် ယူနိုက်တက် ဟာ ဂရင်းဝုဒ် ကို ရောင်းထုတ် မှာ မဟုတ်သလို အငှားလည်း မထွက်ခွာ စေဘဲ အသင်းမှာ ရလာတဲ့ အခွင့်အရေးတွေ ကို အကောင်းဆုံး အသုံးချရင်း နေရာရဖို့ အတွက် ကြိုးစား အားထုတ် စေဖို့ကို မျှော်မှန်း ထားတယ်လို့ ကြားသိရ ပါတယ် ။
