၂၀၂၃ UEFA Nations League ပြိုင်ပွဲ ဗိုလ်လုပွဲတွင် ခရိုအေး ရှားနှင့် စပိန်အသင်းတို့ တွေ့ဆုံနေပြီး ချန်ပီယံသစ်ထွက်ပေါ်မည်ဖြစ်ကြောင်း သိရသည်။
UEFA Nations League ဆီမီးဖိုင်နယ်ပွဲစဉ်များကို ဗုဒ္ဓဟူးနှင့် ကြာသပတေးနေ့တွင် ယှဉ်ပြိုင်ကစားခဲ့ပြီး ပထမနေ့ပွဲစဉ်တွင် ခရိုအေးရှားအသင်းက နယ်သာလန်အသင်းကို မိနစ် ၉၀ အတွင်း (၂-၂) ဂိုးစီသရေ၊ အချိန်ပိုတွင် အနိုင်ဂိုး နှစ်ဂိုးသွင်းယူကာ (၄-၂) ဂိုးဖြင့် အနိုင်ရခဲ့သည်။
ဒုတိယနေ့ပွဲစဉ်တွင် စပိန်အသင်းက အီတလီအသင်းကို နောက်ကျဂိုးနှင့်အတူ (၂-၁) ဂိုးဖြင့် အနိုင်ရခဲ့သည်။ ဆီမီးဖိုင်နယ်ပွဲစဉ်များအတွက် အကောင်းဆုံးဆုကို မိုဒရစ် (ခရိုအေးရှား) နှင့် ရိုဒရီ (စပိန်) တို့ ရရှိခဲ့သည်။ စပိန်အသင်းသည် UEFA Nations League ဗိုလ်လုပွဲသို့ နှစ်ကြိမ် ဆက်တိုက် တက်ရောက်ခွင့်ရခြင်းဖြစ်ပြီး ၂၀၂၁ ပြိုင်ပွဲတွင် ပြင်သစ် အသင်းအား (၂-၁) ဂိုးဖြင့် ရှုံးနိမ့်ခဲ့သည်။
ခရိုအေးရှားအသင်းမှာမူ ယခုပြိုင်ပွဲ ဗိုလ်လုပွဲသို့ ပထမဆုံးအကြိမ် တက်ရောက်ခွင့်ရခြင်းဖြစ်သည်။ UEFA Nations League ပြိုင်ပွဲကို တတိယအကြိမ်ကျင်းပခြင်းဖြစ်ပြီး ပထမအကြိမ်တွင် ပေါ်တူဂီ၊ ဒုတိယအကြိမ်တွင် ပြင်သစ်အသင်းတို့ ဗိုလ်စွဲထားရာ ချန်ပီယံသစ်ထွက်ပေါ်မည်ဖြစ်သည်။
ဗိုလ်လုပွဲနှင့် တတိယနေရာလုပွဲကို ယနေ့ကျင်းပမည်ဖြစ်ပြီး မြန်မာစံတော်ချိန် ည ၇ နာရီခွဲတွင် တတိယနေရာလုပွဲအဖြစ် နယ်သာလန်-အီတလီ၊ တနင်္လာနေ့ နံနက် ၁ နာရီ ၁၅ မိနစ်တွင် ဗိုလ်လုပွဲအဖြစ် ခရိုအေးရှား- စပိန်ပွဲစဉ် ယှဉ်ပြိုင်ကစားရမည်ဖြစ်သည်။
ဗိုလ်လုပွဲတက်ရောက်လာသည့် နှစ်သင်းအနက် စပိန်အသင်းမှာ ၂၀၁၀ ကမ္ဘာ့ဖလား၊ ယူရို-၁၉၆၄၊ ယူရို-၂၀၀၈ နှင့် ယူရို-၂၀၁၂ ပြိုင်ပွဲ၌ ချန်ပီယံဆုရရှိဖူးပြီး ၂၀၁၂ ခုနှစ်နောက်ပိုင်း ဆယ်စုနှစ်တစ်ခုကျော်ကြာ ဝေးကွာနေသည့် ချန်ပီယံအောင်မြင်မှု တစ်ကျော့ပြန်ရယူနိုင်ရန် ကြိုးပမ်းရမည်ဖြစ်သည်။ ခရိုအေးရှားအသင်းမှာမူ နိုင်ငံတကာအဆင့်ပြိုင်ပွဲများတွင် ချန်ပီယံအောင်မြင်မှုမရဖူးဘဲ အမြင့်ဆုံးအဖြစ် ကမ္ဘာ့ဖလား ပြိုင်ပွဲ၌ ဒုတိယတစ်ကြိမ် (၂၀၁၈)၊ တတိယနှစ်ကြိမ် (၁၉၉၈၊ ၂၀၂၂) ရရှိဖူးသည်။
