အာဆင်နယ်အသင်းသည် အသင်း၏ ကာလရှည်ပစ်မှတ်ဖြစ်သော ဝက်စ်ဟမ်းအသင်း၏ အင်္ဂလန်လက်ရွေးစင်ကွင်းလယ်လူ ဒက်ကလန်ရိုက်စ်အားခေါ်ယူနိုင်ရန် နီးစပ်နေကြောင်း ဗြိတိန်မီဒီယာများကဖော်ပြခဲ့ကြသည်။
အသက် ၂၄ နှစ်အရွယ်ရှိ ဒက်ကလန်ရိုက်စ်သည် ပြီးခဲ့သည့် ၂၀၂၂-၂၃ ရာသီက ဝက်စ်ဟမ်းအသင်းနှင့်အတူ ယူရိုပါကွန်းဖရန့် လိဂ်ချန်ပီယံဆု ရယူနိုင်ခဲ့ပြီးနောက် အသင်းမှထွက်ခွာတော့မည်ဟု အတည်ပြုထားသူဖြစ်ပြီး ၎င်းအားခေါ်ယူရန် ပရီးမီးယားလိဂ် အသင်းကြီးများစွာ အပြိုင်ပစ်မှတ်ထားခဲ့သော်လည်း အာဆင်နယ်အသင်းက လက်ဦးမှုရယူနိုင်ရန် နီးစပ်နေခြင်းဖြစ်သည်။
အာဆင်နယ်အသင်းသည် ဒက်ကလန်ရိုက်စ်အတွက် ကလပ်အသင်းစံချိန်တင်ပြောင်းရွှေ့ကြေး ယူရိုသန်း ၁၀၀ (Add-ons ကြေးများအပါ) ပေးချေသွားမည်ဖြစ်ပြီး ၅ နှစ်စာချုပ် ချုပ်ဆိုရန် စီစဉ်ထားကြောင်းသိရသည်။ ချယ်လ်ဆီးနှင့် ဝက်စ်ဟမ်းအသင်းအ ကယ်ဒမီထွက်ကစားသမား ဒက်ကလန်ရိုက်စ်သည် ဝက်စ်ဟမ်းအသင်းအတွက် ၂၀၁၇-၁၈ ရာသီမှ ၂၀၂၂-၂၃ ရာသီအထိ ၆ ရာသီအတွင်းပြိုင်ပွဲစုံ ၂၄၅ ပွဲကစားရာတွင် ၁၅ ဂိုး သွင်းယူပေးနိုင်ခဲ့သည်။
ပြီးခဲ့သည့်ရာသီက ပရီးမီးယားလိဂ်ချန်ပီယံဆုနှင့် လက်တစ်ကမ်းအကွာရောက်ရှိခဲ့ပြီး လာမည့်ရာသီချန်ပီယံလိဂ်ဝင်ခွင့်ရရှိထားသည့် အာဆင်နယ်အသင်းသည် အသင်းအား ထိပ်တန်းအဆင့်အား ဖြည့်မှုများပြုလုပ်သွားရန်စီစဉ်နေပြီး ဒက်ကလန်ရိုက်စ်အပြင် ဘရိုက်တန်ကွင်းလယ်လူ ကိုင်စီဒို၊ မန်စီးတီးကွင်းလယ်လူ ဂွန်ဒိုဂန်၊ PSG တိုက်စစ်ကစားသမား ဇာဗီဆိုင်မွန်နှင့် ဂျူဗင်တပ်စ်တောင်ပံကစားသမား ခီယေဆာတို့ကိုလည်း ပစ်မှတ်ထားနေကြောင်း ဗြိတိန်အားကစားသတင်းစာ Sky Sports ကဖော်ပြခဲ့သည်။
