ပရီးမီးယားလိဂ်ပြိုင်ပွဲ၏ ၂၀၂၂ -၂၃ ရာသီအကောင်းဆုံးပွဲအဖြစ် နယူးကာဆယ် ၆-၁ စပါးပွဲ ရွေးချယ်ခံခဲ့ရကြောင်း သိရသည်။
အဆိုပါရွေးချယ်မှုကို ပရိသတ်များ၏ ဆန္ဒမဲဖြင့် ပြုလုပ်ခြင်းဖြစ်ပြီး ဇွန်(၁၂)တွင် အဖြေပေါ်ခဲ့ခြင်းဖြစ်သည်။
ပရီးမီးယားလိဂ်အဖွဲ့ချုပ်သည် ၂၀၂၂-၂၃ ရာသီအတွင်းမှ စိတ်လှုပ်ရှားစရာအကောင်းဆုံး (၈)ပွဲကို ရွေးချယ်ကာ ပရိသတ်များကို ဆန္ဒမဲပေးစေပြီး အကောင်းဆုံးပွဲကို ရွေးထုတ်ခဲ့ခြင်းလည်းဖြစ်သည်။
ပရီးမီးယားလိဂ်အဖွဲ့ချုပ်က ၎င်းတို့ ရွေးချယ်ထားသည့် (၈)ပွဲကို (၄)ပွဲစီ တစ်ဖက်စီခွဲခြားကာ အတွဲအဖက်များပြုလုပ်ပြီး ဆန္ဒမဲပေးစေခဲ့ခြင်းလည်းဖြစ်သည်။
အဆိုပါ(၈)ပွဲတွင် တစ်ဖက်ခြမ်း၌ အာဆင်နယ် ၃-၂ ဘုန်းမောက်၊ မန်စီးတီး ၆-၃ မန်ယူ၊ လီဗာပူးလ် ၂-၂ အာဆင်နယ်၊ နော်တင်ဟမ်ဖောရက်စ် ၂-၃ ဘုန်းမောက်ပွဲတို့ ပါဝင်ခဲ့ပြီး တစ်ဖက်ခြမ်းတွင် လီဗာပူးလ် ၇-၀ မန်ယူ၊ နယူးကာဆယ် ၆-၁ စပါး၊ အာဆင်နယ် ၃-၃ ဆောက်သမ်တန်၊ လီဗာပူးလ် ၄-၃ စပါးပွဲတို့ ပါဝင်ခဲ့သည်။
အဆင့်ဆင့် မဲပေးရွေးချယ်မှု ပြုလုပ်ခဲ့ရာတွင် နောက်ဆုံးဗိုလ်လုပွဲအဆင့်သို့ အာဆင်နယ် ၃-၂ ဘုန်းမောက်ပွဲနှင့် နယူးကာဆယ် ၆-၁ စပါးပွဲတို့ တက်လှမ်းလာခဲ့ပြီး ပရိသတ်များက နယူးကာဆယ် ၆-၁ စပါးပွဲကို ၂၀၂၂-၂၃ ရာသီ ပရီးမီးယားလိဂ်ပြိုင်ပွဲ၏ အကောင်းဆုံးပွဲအဖြစ် ရွေးချယ်ခဲ့ခြင်းဖြစ်သည်။
