စပါး ပရိသတ်တွေ အတွက်တော့ ပြီးဆုံး သွားခဲ့တဲ့ ဘောလုံး ရာသီ ဟာ ဆိုးရွားတဲ့ နှစ်တစ်နှစ် ဖြစ်ခဲ့ ရပါတယ် ၊ ခါးသီး မြို့ခံ ပြိုင်ဘက် အသင်းနဲ့ အမှတ် အပြတ်အသတ် ကွာခဲ့သလို ဥရောပပြိုင်ပွဲ ကစားခွင့်နဲ့လည်း လွဲချော် ခဲ့ရတာပါ ၊ ဒ့ါအပြင် ဘောလုံး ရာသီ ပြီးဆုံး သွားခဲ့တာတောင် သူတို့ ငှက်ကျားတွေကို ဂိုးပြတ် ရှုံးခဲ့တဲ့ ပွဲက အရိပ်မည်းကြီးလို လိုက်နေခဲ့ပြီး အရှက်ထပ်မကွဲအောင် ခါးသီးမြိုခံပြိုင်ဘက် အာဆင်နယ် ကို vote ပေးရမယ့်ကိန်းဆိုက်နေပါတယ် ။
ပရီးမီးယားလိဂ် ဘောလုံး အဖွဲ့ချုပ် ဟာ ဒီနှစ် ဘောလုံး ရာသီ အပြီး မှာ အကောင်းဆုံး ပွဲစဉ် ရွေးချယ်ခြင်း ပြိုင်ပွဲကို ပရိသတ်တွေ ရဲ့voting စနစ် နဲ့ ပြုလုပ် နေပါတယ် ။ ပရီးမီးယားလိဂ် ဟာ ၂၂-၂၃ ဘောလုံး ရာသီအတွက် အကောင်းဆုံး ပွဲ ၈ ပွဲ ရွေးထုတ် ခဲ့ပြီး ပရိသတ်တွေကို မဲပေး ရွေးချယ် ခိုင်းနေတာ ဖြစ်ပါတယ် ။
ပရီးမီးယားလိဂ် က ရွေးထုတ်လိုက်တဲ့ အကောင်းဆုံး ပွဲ ၈ ပွဲ ကတော့ အာဆင်နယ် ၃-၂ ဘုန်းမောက် ၊ မန်စီးတီး ၆-၃ မန်ယူနိုက်တက် ၊ လီဗာပူး ၂-၂ အာဆင်နယ် ၊ နော်တင်ဟမ်ဖောရက်စ် ၂-၃ ဘုန်းမောက် ၊ လီဗာပူး ၇-၀ မန်ယူနိုက်တက် ၊ နယူးကာဆယ် ၆-၁ စပါး ၊ အာဆင်နယ် ၃-၃ ဆောက်သမ်တန် ၊ လီဗာပူး ၄-၃ စပါးပွဲတွေ ဖြစ်ပါတယ် ။
အဆိုပါ ပွဲ ၈ ပွဲ ကို ရှုံးထွက် စနစ် နဲ့ ယှဉ်ပြိုင် စေခဲ့တာ ဖြစ်ပြီး အာဆင်နယ် ၃-၂ ဘုန်းမောက် ပွဲဟာ ကွာတားဖိုင်နယ် မှာ မန်စီးတီး ၆-၃ မန်ယူနိုက်တက်ပွဲ ၊ ဆီမီးဖိုင်နယ် မှာ လီဗာပူး ၂-၂ အာဆင်နယ် ပွဲတွေ ကို အနိုင်ယူ ကျော်ဖြတ်ပြီး ဗိုလ်လုပွဲ ရောက်လာခဲ့ပါတယ် ။
အခြား လမ်းကြောင်း တစ်ဖက်မှာလည်း နယူးကာဆယ် ၆-၁ စပါး ပွဲဟာ ကွာတားဖိုင်နယ် မှာ လီဗာပူး ၇-၀ မန်ယူနိုက်တက်ပွဲ ၊ ဆီမီးဖိုင်နယ် မှာ လီဗာပူး ၄-၃ စပါး ပွဲတွေ ကို အနိုင်ယူပြီး ဗိုလ်လုပွဲ ရောက်လာခဲ့တာပါ ။
အာဆင်နယ် ၃-၂ ဘုန်းမောက်ပွဲ ဟာ ဒီရာသီ ဒရမ်မာ အဆန်ဆုံး ပွဲတစ်ပွဲ ဖြစ်ခဲ့ပြီး ဂန်းနားတို့ နှစ်ဂိုးပြတ် ရှုံးနိမ့် နေရာကနေ ပြန်လာပြီး နယ်လ်ဆင် ရဲ့ နောက်ဆုံး မိနစ် သွင်းဂိုး နဲ့ အနိုင်ရခဲ့တဲ့ ပွဲ ဖြစ်ပါတယ် ။ အဲ့ဒီ သွင်းဂိုးကြောင့်လည်း နယ်လ်ဆင် ဟာ Game Changer of the Season ဆုကို ဆွတ်ခူး ရရှိ ခဲ့ပါတယ် ။
နယူးကာဆယ် ၆-၁ စပါး ပွဲမှာတော့ ငှက်ကျားတို့ဟာ ပထမပိုင်း ၂၁ မိနစ်မှာတင် ၅ ဂိုးပြတ် အနိုင် ရနေခဲ့တာ ဖြစ်ပါတယ်။ စပါး ပရိသတ်တွေ အနေနဲ့ သူတို့ အရှက်တကွဲ ရှုံးနိမ့် ခဲ့တဲ့ ပွဲ အကောင်းဆုံး ပွဲ အဖြစ် သတ်မှတ်မခံရရေးအတွက် အာဆင်နယ် ၃-၂ ဘုန်းမောက် ပွဲကို vote ပေးဖို့ လိုအပ်နေပါတယ် ။ Voting result ကိုတော့ ဒီကနေ့ ညနေပိုင်းလောက်မှာ ကြေညာ သွားဖို့ များပါတယ် ။
