ပရီးမီးယားလိဂ်ကလပ်အသင်းမန်စီးတီးက စီးရီးအေကလပ်အသင်း အင်တာမီလန်ကို အနိုင်ရပြီး ချန်ပီယံလိဂ်ဖလားဆွတ်ခူးနိုင်ခြင်းသည် အင်္ဂလန်လက်ရွေးစင်အသင်းအတွက်ပါ အကျိုးရှိကြောင်း အင်္ဂလန်မန်နေဂျာ ဆောက်ဂိတ်က ပြောဆိုလိုက်သည်။
ယခုလအတွင်း ယူရို ၂၄ ခြေစစ်ပွဲအဖြစ် မော်လ်တာနှင့် မြောက်မက်ဆီဒိုးနီးယားအသင်းတို့နှင့် ရင်ဆိုင်ရမည့် အင်္ဂလန်လက်ရွေးစင်အသင်းလူစာရင်းတွင် ဥရောပချန်ပီယံမန်စီးတီးအသင်းမှ ကစားသမား ၅ ဦးကိုဆောက်ဂိတ်က ထည့်သွင်းရွေးချယ်ထားသည်။ ထို့ပြင် အင်္ဂလန်အသင်း၏ ကွင်းလယ်အမာခံကစားသမား ရိုက်စ်သည်လည်း ဝက်စ်ဟမ်းအသင်းနှင့်အတူ ယူရိုပါကွန်ဖရန့်စ်လိဂ်ဖလား ရရှိထားခြင်းက အသင်းအတွက် များစွာအထောက်အကူပြုကြောင်း ဆောက်ဂိတ်က ဆက်လက်ပြောဆိုလိုက်သည်။
“အခုလို ဥရောပပြိုင်ပွဲတွေကနေ ဆုဖလားဆွတ်ခူးနိုင်ခဲ့တဲ့အတွက် သက်ဆိုင်ရာအသင်းတွေမှာ ပါဝင်ကစားခဲ့ကြတဲ့အသင်းသားတွေအားလုံးအတွက် အကျိုးရှိတယ်။ စပြောရရင် သူ့ကစားသမားဘဝအတွက် ပထမဆုံးဆုဖလားကို ဆွတ်ခူးနိုင်လိုက်တာက ဒက်ကလန်ရိုက်စ်အတွက် အများကြီးအကျိုးရှိပါတယ်။ သူ့အတွက် ဘယ်လောက်အဓိပ္ပာယ်ရှိလည်းဆိုတာကို ပုံရိပ်တွေကို ကြည့်ရင် သိနိုင်ပါတယ်။ ပြီးတော့ မန်စီးတီးက ကစားသမားလေးတွေကြည့်လိုက်ပါ။ သူတို့အတွက် သိပ်ကို ကောင်းမွန်တဲ့ ဘောလုံးရာသီတစ်ခုကို ရရှိခဲ့ပါတယ်။ မန်စီးတီးကလည်း သူတို့သမိုင်းမှာလိုအပ်နေတဲ့ ချန်ပီယံလိဂ်ဖလားကို ပထမဆုံးအကြိမ်ရယူလိုက်နိုင်ပါတယ်။ အခုလို အင်္ဂလန်အသင်းမှာပါဝင်တဲ့ ဘောလုံးသမားအုပ်စုတချို့က အောင်ပွဲတွေ ရရှိလိုက်တာက အသင်းနဲ့ အသင်းရဲ့စုဖွဲ့မှုအတွက် အရမ်းကို အကျိုးရှိပါတယ်”ဟု ဆောက်ဂိတ်က ပြောဆိုလိုက်သည်။
အင်္ဂလန်အသင်းကစားရမည့် မော်လ်တာနှင့်မြောက်မက်ဆီဒိုးနီးယားအသင်းတို့နှင့် ယူရို ၂၀၂၄ ခြေစစ်ပွဲများကို ဘယ်လင်ဂမ်နှင့် ဒမ့်တို့က ဒဏ်ရာကြောင့်လွဲချော်မည်ဖြစ်သည်။
